1 A beyi kwana biyari Ananiya tolense pirisi te a Keseriya nja worosu toree nja loya nsu seni Tatulus, de su zo ja nja ni Bulusu a geba gomuna. 2 De su sukwa Bulusu zo a siki, Tatulu zo ni kara yi a geba ni Pelis: << Omu zi dadi ni zunwa selema a kwanki ake, kuma yikima ke zo ni sigeba a siki kesa mu 3 Kowon anya nja kowoni turiki, tolense nsu girima Pelis, omu geni mbode ki yi nyowa ni yobo. 4 Sede mwa bila de mu la kwanki ku na ba, na pata ku de ku zi toseyi mu nja ku sa kuni ke de ki zi mu.

5 <<Nseminji mu e ma nsu zon rikishi la, yaa rikishe dishiya ntani Yawudawa guru anya a durinya. e ma tolense keshi nsu yi yaruwa de sua sukwa su Nazere. 6 Ari yaa bila de yi dola ni laki lepa, na mu ka yi. 7 Sede tolense Lisiyas e zo keleba yi a nani amu nja sori. 8 Mwa so de eke ki minya yi nkiya ake de ki shina gaskye a kiya lepi guru de mwa zo nshi a kiya yi.>>

9 Yawudawa gom kiya asu yedan bashi de sua yi, su nkye mbo de su pala ema gaskye.

10 De gomuna ba Bulusu dama de yi beta, Bulusu keleba: <<Ni shina nkye ki yi shekera nyowa ki ma yi shiriya ntani kesa mu, sobon yomu ni ma yi peri siki de ma tele kiya na a geba ake. 11 Nde Ka bishikye ka shina nkye e pi nana gomu sha bi mu, de ni te a Wurishelima de ni bowuta Mirikisi. 12 Nsu bashi ni su ka ni mayi musu nja nse daa a laki lepa ba, ko rikishe nja ntani a siki kolonwa ba ko anya daa a siki totolo geri. 13 Nja sua yi yaa beyi tebeshi lepi de sua pala a kiya na ba. 14 Ko yomu, Ni yeda nkye Na bowuta Mirikisi ni nsu adaatolo amu de e ma turiki biya, de sua sukwa nsu yaruwa. Ni yeda nja guru mbode ma a siki doka Musa nja mbode e ma rubuta a siki takada anebi, 15 eni ma sadishiya yiride ntani worosu mu su ma shi anya Mirikisi, nkye dege a kumsha ma ni nsu gangasi anya Mirikisi nja mere gangasi. 16 E shina sa mmayi kokori de kowoni nana ni ma dishiya sereyi a geba Mirikisi nja ntani.

17 <<A beyi de ni ma ba shekera nyowa, Ni zo a Wurishelima de ni keikei ntani na potoruwa kyawuta nja beyi sedeka. 18 E ni ma a siki yi buki alada ni wonkye de su sani a siki laki lepa de na yi mbo mu. ntani tala anya ni nja ni ba, ko su sani a siki dama ntani ba. 19 Sede anya ni worosu su Yawudawa yiri gunduma ni Asiya, worosu de kamata de su ma anya mu a geba ke de su zo lepi nde su man mbodaa a kiya na. 20 Ku bila de worede ma anya mu su pala mumungu mbode su sa ni nshi a kwanki de Ni sakisi a geba salaki, 21 sede ema a kiya beta daa mu kede de Ni pala a kwanki de Ni sakisi a geba ku Ni nkye: <A kiya ni dege a kumsha ni worede su muntu e shiya sa Ni sakisi a geba kwa yi ni shiriya nana yawu mu> >>.

22 Se Pelis, de shina ni turiki mu soseyi, e dege shiriya nkye. <<Se Lisiyas tolense ni shoja zo,>> << Tukuna Na gye ku yiride shiriya mu yaa ma. 23 Pelis beyi doka de tolense shoja ni Roma e sa Bulusu a kerikeshi ni nsu kpanku sede su beyi yenshi nja dama de nsu oboki yi su kula nshi.

24 A beyi kwana nyowa Pelis zo nja mata e yi Durusila, de ema Yawudawa. Pelis saka sukwa Bulusu nja de su zi yi de yaa yi beta a kiya beigaskye nja Yesu kiristi. 25 Se Bulusu yi yira a kiya ni gangasi ni mirikisi, kaa nki, nja shiriya mirikisi de yaa zo, Pelis zi womba nja nkye << E deta yomu kuzukam! ka yi yaa te. De ni samu e yi ni, na saka manki sukwa ke.>> 26 A kwanki ni a geni Pelis yaa sadishiya ko Bulusu yaa beyi gyolo; na sa ema sukwa yi a kiya a kiya ema yi yira nja shi.

27 De shekera bi bise, Pokiyu Pestus ma Gomuna momoko ni Pelis, sede sobon Pelis yaa bila peri zini anya ni Yawudawa, e bila Bulusu a jaru.