1 Pirisi nja tolense ni nsu kpanku laki Mirikisi nja Sadokiyawa zo anya Biturusu nja Yaaya de su ma kiya beta nja ntani. 2 Su zi anwashi sobon yayamanki su ma kokoyi ntani nkye worede muntu sua dege nleyi yiride Yesu dege a kumsha nleyi. 3 Sobon yomu na su ka Biturusu nja Yaaya, su sa su a jaru ari geri shekeri, sobon nyema rigye yi. 4 Sede ntani nyowa de su zi manki mu su yeda, se guru nsubiya Yesu su ja yowa keyi dupu biyari.

5 De geri shekeri toree Pirisi, nja salaki nja male kokoyi doka Musa su tala a Wurishelima. 6 Anasi totolo pirisi ma anya ni, nja Kayapa, Yaaya, Alezanda, nja worosu su toree ni gizi pirisi. 7 Su sa Biturusu nja Yaaya sakisi a sedeka asu su ma minya su nkye, <<Ni Woni sori na ko ni woni seni ku mayi mbo?>>

8 Biturusu, shika ni Aworo Nsuseki, gye su nkye, <<Nsu solota nja toree geri: 9 nde kwa minya mu beta a kiya ni aniyeri de mu yi gurugu mu nja yiride e samu worikye, 10 se ku shina mbo mu, oku nja guru ntani ni Izireyila, a siki seni Yesu Kiristi ni Nazere, de ku gidiri yi de Mirikisi dege yi a kumsha, e shina sa nseminji de sakisi a geba ku mu worikye. 11 E shiya ma Yesu de ma rubuta a siki takada beta Mirikisi nkye

<<<Dunsi de nsu gini ki,

e shina ma dunsi nsu anpani a gini.

12 Te anya Yesu na kede mwa samu sila, ba seni daa a kisi bisi de Mirikisi beyi de mwa samu sila se anya Yesu.>>

13 De Toree Yawudawa geni sori dishiya ni Biturusu nja Yaaya, su gane nkye su yi makaranta ba, su ma ntani kokowe la, su yi mamanki se su nkye ntani worosu mu su ma nsubiya Yesu la. 14 Sede de su geni nseminji de su worikye sakisi nja Biturusu nja Yaaya, su lesa mbode sua pala. 15 Su sa su bila geba salaki Su yi showura nja nkiya su. 16 Su nkye. <<Mina mwa yi ntani worosu mu?>> <<Guru ntani de su ma a Wurishelima su shina nkye su yi totolo mbo mamanki, ba yiride mwa yi musu mbode su yi ba. 17 Sede yiride mwa nana mbo mu kede e baza anya ntani guru ba, mu ja su kuni kede su kara yi nseda beta a siki seni Yesu kuma ba.>>

18 Se su sukwa Biturusu nja Yaaya su gye su nkye kede su sakye yi beta ko su kokoyi nseda a siki seni ni Yesu ba. 19 Sede Biturusu nja Yaaya keleba nkye, <<Ku shiriya nkiya ku ko e yi kyawu de mu zi beta aku pi beta Mirikisi. 20 Sede omu mwa yi yaa yi shuru a kiya mbode mu zi mu kwa geni ba.>>

21 A beyi de su ja Biturusu nja Yaaya kuni se su bila su. Su shina yiride sua yi de su poro su ba, nkaa guru ntani su ma yobo Mirikisi a kiya mbode paru. 22 Nseminji de su worikye ni mamanki mu e mani shekera aribeyi.

23 De su bila Biturusu nja Yaaya, su kuma ta anya ntani asu su gye guru mbode totolo pirisi nja toree gye su. 24 De nsubiya Yesu zi mbom, su dege murinya asu su yi lepa te nja Mirikisi. <<Su nkye Obagizi Mirikisi nsu girima,>> Ki yi bisi nja kisi nja totolo riki nja guru mbode ma a siki asu. 25 Se Aworo Mirikisi yi beta a baki ni bunwa ake, adaa mu Dowuda, de nkye,

<Mina sa worede su shina Mirikisi ba su ma yi anwashi

mina sa ntani su ma yi tunani wopi?

26 Seleki ni durinya su shiriya nkiya su de su yi yanki nja Mirikisi

nsu solota su gomu anya daa kaka

su ma yi geba nja Obagizi nja Kiristi.>

27 Ni gaskye Seleki Yiridu nja Buntu Bilatu gomu a siki totolo geri mu nja worede su ma Yawudawa ba nja ntani Izireyila su ma yi geba Yesu nja bunwa ke nsuseki, de ki zabi. 28 Su gomu de su yi mbode ki rigye shiriya nkye yaa paru te anya sori ake nja nupi ake. 29 Kuzukam, Obagizi, kone yiride sua bila de su nana mu ANKI ake, ba bunwa ake, sori dishiya de su beyi manki ake ba womba. 30 Mirikisi munka nani ake de ki worikye ntani ake, nja yi ANKI mamanki ni alama nja totolo ni ANKI a siki seni bunwa ake Yesu nsuseki.>> 31 A beyi de nsubiya Yesu yi lepa, anya de su tala zizika. Guru asu su sika nja Aworo nsuseki, su ma yi beta Mirikisi ba womba.

32 Guru nsu beigaskye ni Yesu nupi asu ma daa na nja beta dishiya asu ma daa. Ba nsude nkye mbode e ma nshi ma na yi ba, sede su laba guru mbode su ma nshi nja nkiya su. 33 Ni totolo sori yayamanki su sigeba ni beyi sheeda ni dege Obagizi Yesu a kumsha, aniyeri nyowa ma a kiya asu guru. 34 Nseda a siki asu lesa mbodaa ba. Worede man bikiya ko gizi su la see, su keyi gyolo zo nshi, 35 su ma la sa a geba ni yayamanki; su ma laba ba konwawa ni yiri mbode yaa bila.

36 Yusupu, de ma nsugizi Lawi, dege juriya Sayipuru, de yayamanki su ma sukwa yi nkye Barnaba mane yi ma nsu beyi sori guyam, 37 e la bikiya yi se e keyi gyolo zo nshi anya yayamanki.