1 A beyi kwana wuku de e keyi gunduma, Pestus butu yiri keseriya te Wurishelima, 2 Anya de tolense ni pirisi nja toree ni Yawudawa butu zo a geba e yi su te kara su a kiya Bulusu. 3 Su yi seseberi minya Pestus, de yi su aniyeri, de su kuma Bulusu ta a Wurishelima, dun sua bila de su kpanku yi a turiki de su kisa e yi. 4 pestus keleba, <<Bulusu e ma sere a Keseriya, E ni ma na te anya ni ba ni dede ba. 5 Bila toree aku worosu su de su te Keseriya nja ni de ku pala mbo mumungu de nseminji mu yi anya ni.>>

6 A beyi de e kisa nana takusi ko gom nja su, E ta keseriya, anya kwa yi e sukwa zunwa ni shiriya se e beyi doka de su keyi Bulusu zo a geba e yi. 7 De Bulusu butu zo, se Yawudawa de su zo yere a Wurishelima sakisi gyewe yi, su pala lepi yowa a kiya yi, de su yi yaa tabata ba a kiya yi.

8 Se Bulusu butu kiya e yi nkye: <<Ni yi mbo mumungu a kiya doka ni Yawudawa ko ni yi geba ni laki lepa ko a kiya seleki Kesar.>>

9 Pestus, so de e yi Yawudawa aniyeri, e gye Bulusu nkye, <<Ki man shiri de ka ta Wurishelima de ki sakisi a geba shiriya anyana a kiya lepi worosu mu?>>

10 Bulusu keleba nkye: <<Eni kuzukam Ni rigye sakisi a geba ni seleki Kesar, anya de e kamata sua yi ni shiriya. Ni yi Yawudawa lepi mbodaa ba, yiride e ke ki shina soseyi. 11 Nde, Ko Eni mma lepi ni mbodaa de kamata ni muntu, Ni ki de ni muntu ba. Sede nde lepi de Yawudawa zo shi akyiyana ma gaskye ba, nseda deta de yaa la ni ba su ba. Mmayi ologba ke seleki kesar!>>

12 A beyi de Pestus bila showura nja nsu beyi showura, e pala geba gedi: <<E ke ki ologba te nja seleki Kesar. Anya ni Kesar na ka te!>>

13 beyi nana piri Seleki Agiripa nja Banisi su ka yi Keseriya de su beyi girima asu te nja Pestus. 14 Tunde osu sua yi kwana ni yowa anya ni, Pestus gye seleki beta a kiya shiriya ni Bulusu. nkye: <<Yaa minzi daa ni jaru ma anya mu de Pelis bila e yi. 15 De Ni te a Wurishelima, toree pirisi nja toree Yawudawa pala lepi a kiya yi de su samu turiki bebeta yi nki.

16 <<Sede Ni gye su nkye e ma alada ni Roma naba de su la nsebeki ba oboki gebeyi a nani kapi de e samu turiki sere nki yi a kiya lepi de su pala a kiya e yi. 17 De su zo anya mu nja ni, Ni beta kwanki ni shiriya ba, sede ni zunwa kingbolo na ni shiriya se ni beyi doka de su zo nseminji mu nde anya kwa yi. 18 De nsu oboki geba Bulusu dege a bisi de su yi beta, su pala mumungu lepi daa a kiya e yi de na so nzi ba. 19 Sede, su man worosu su rikishi nja shi a kiya yaa minji daa de muntu de seni yi ma Yesu de Bulusu pala nkye e ma ni leyi. 20 Ni lesa ko mina Na yi a kiya beta mu, anya ni Ni minya yi nde yaa yeda de ni te a Wurishelima de su yi shiriya anya ni a kiya mbode su pala a kiya yi. 21 Sede Bulusu yi ologba ni totolo seleki; e pala de su tele ke ni nsu kpanku ari de kesar e yi beta a kiya yi. Na beyi doka de su tele ke ni nsu kpanku ari de na kiri yi ta anya seleki kesar.>>

22 Se Agiripa gye Pestus, <<E ni mma bila de zi yaa minzi mu nkiya na.>>

E keleba, <<Gobe ka zi yi.>>

23 De anya kwa yi Agiripa nja Banisi zo nja girima yiri ni seleki su yuru a siki laki shiriya nja toree shoja nja toree geri, Na Pestus beyi manki de su zo Bulusu a siki anya de su ma. 24 Pestus pala: <<Seleki Agiripa, nja guru worede su ma anya mu nja mu, ku geni nse minzi mu! guru ntani Yawudawa su yi kara naa a kiya yi a Wurishelima nja anya mu a Keseriya, su yi kuruwa nkye e kamata de e ma nleyi ba. 25 Ni samu yi ni lepi mbodaa de deta muntu ba, sede sobon e yi ologba yi anya ni totolo Seleki E ni ni yeda de su keyi te a Roma. 26 Sede Ni ma mbodaa nsu sori de Na rubuta te nja tolense a kiya yi ba. Sobon yomu na Ni zo nshi a geba ku guru, musama a geba ke, seleki Agiripa, dun a beyi de ku binshikye ko Na samu mbo nsu sori a kiya yi de Na rubuta. 27 De ni yi tunani yaa yi kyawu ba de ni te yaa jaru mu ba kara ni mbodaa mumungu a kiya e yi ba.>>