1 A kwanki de nsu yayagizi su ja yowa, se Yawudawa de su ma zi Helenanshi su ma sesebeta a kiya Yawudawa de sua beta ni arishiya ni Aramaya sobon mata makeyi su meyi samu sua nto asiki lobo ni mbode su ma laba su nshi kowon nana ba. 2 Se gom sha bi ni sukwa nsubiya Yesu guru anya daa su nkye, <<Yaa yi kyawu de mu bila manki beta Mirikisi de mwa yi mu laba mbosi ba. 3 Nkayomu, yayuwa ku zabi ntani bokwe de ku shina su sika ni Aworo Nsuseki nja simi, de mu ba su loni ANKI laba mbosi mu. 4 Se omu mu beyi kiya mu ba lepa nja ANKI kokoyi beta Mirikisi.>>

5 Guru ntani zi dadi beta de yayamanki yi. Se su zabi Isitipanu, nseminji de sika ni beigaskye nja Aworo Nsuseki, nja Pilibu, nja Burokora nja Nikano, nja Timo, nja Barimina, nja Nikola nsebeki ni Antakiya, de ma Yawudawa ba sede e juyi biya Obagizi Yawudawa. 6 Nsubiya Yesu ka yi su te anya yayamanki, su sa su nani a kiya su yi su lepa.

7 Se beta Mirikisi ma te ja yowa. Yayagizi de ma a Wurishelima ja yowa soseyi, pirisi nyowa osu ma beigaskye.

8 Kuzukam Isitipanu, nseminji de aniyeri nja sori Mirikisi ma nja shi, e yi totolo mbo mamanki nja mbo geni a siki ntani. 9 Sede worosu su dege siki ntani de su ma sukwa su ntani kolonwa yenshi ntani su dege meyi geba nja Isitipanu, su ma Yawudawa na dege Sayiri nja Alezandiriya. Osu nja worosu su Yawudawa dege guduma ni Kilikiya nja kesa Asiya. para musu nja Isitipanu, 10 Sede su yi yaa sakisi yi geba nja Isitipanu ba nkaa e ma yi beta ni simi Aworo Mirikisi de e beyi.

11 Se su lelebe ntani a boyi de su pala nkye, <<Su zi Isitipanu ma basi anebi Musa nja Mirikisi.>> 12 Yomu na su dege ankeli ntani nja toree nja male kokoyi doka Musa. Su ka Isitipanu ta geba nsu shiriya. 13 Ntani woroni su beyi sheeda yaruwa, su pala nkye, <<Nseminji mu zi yi meyi mumungu beta a kiya anya nsuseki nja a kiya Kokoyi doka Musa. 14 Mu zi ma pala nkye Yesu ni Nazere mu yaa juru anya mu de e shenja alada de anebi Musa bila mu nshi.>>

15 Guru worede zunwa anya salaki kapa ndani asu ANKI ni Isitipanu, Se su geni pusika yi mayi asikye kankye pusika meleku Mirikisi.