1 Bulusu kone salaki a ndani tiriri nkye, <<Yayuwa na, Ni ma sika ANKI na anya Mirikisi ni guru kyakyawu dishiya zo ari a nana da mu.>> 2 De Ananiya tolense pirisi zi yomu e gye worede su sakisi mala Bulusu de su mari yi a baki. 3 Se bulusu gye yi nkye, <<Mirikisi yaa mari ke du, eke munabuki ki ma kankye bongo de shapa yi penti! Ki zunwa anya ni de ki yi ni shiriya a kiya doka Musa, ari kuzukam e ke nkiya ake ki keriya doka, de ki nkye su mari ni!>>

4 Worede su sakisi anya ni nja Bulusu su nkye, <<E ke ka yi womba basi bunwa ni Mirikisi tolense ni pirisi bo?>>

5 Bulusu keleba, <<Yayuwa, E ni shina nkye e ma tolense ni pirisi ba; sobon e ma rubuta a siki takada ni Mirikisi: <Kede ki yi mumungu beta a kiya tolense ni ntani ake ba>>>

6 Se Bulusu, shina nkye worosu su asu su ma Sadokiyawa nja worosu su su ma Parisiyawa, se e dege murinya yi sukwa a geba Salaki, <<Yayuwa na, Ni ma Parisiyawa na, Yaa ni Parisiyawa. Ni sakisi ayan shiriya sobon sadishiya na a kiya Mirikisi de e dege worede su muntu.>> 7 De e pala yomu, musu yuru a sisika ni Parisiyawa nja Sadokiyawa, na ntani laba kiya. 8 Sadokiyawa pala nkye dege a kumsha ma ba, nja mbode ma kankye meleku ko nsu aworo ba, Parisiyawa su yeda su guru.

9 Anya ni totolo musu dege, nja worosu su male ni doka de su ma parisiyawa su dege a bisi na sua musu soseyi, << mu samu mbodaa mumungu nja nse minzi mu ba,>>su pala. <<Mina nde aworo ko meleku na yi beta nja nshi?>> 10 De musu yi seneni se tolense shoja ni Roma yi womba kede su sisiya Bulusu. Se e beyi doka de shoja su keleba Bulusu bila su ni sori de su te nshi a bariki shoja.

11 De dederi yi Obagizi sakisi a geba ni Bulusu nkye, <<sakisi ni sori kede ki puari geba! Yiride ki beyi sheeda a kiya na a Wurishelima, dole na ka beyi sheeda na a Roma.>>

12 De anya kwa yi Yawudawa su gomu gabada su gama baki asu de su ni melese nkye sua si ko sha ba se su kisa Bulusu. 13 Menza pi aribeni de su saa kiya su a siki shiri mu. 14 Se su te anya tolense ni pirisi nja toree su nkye, <<Mu melese guru mu nkye mwa si ko sha mbodaa ba se mu kisa Bulusu. 15 Kuzukam, se oku nja salaki ku saka tolense ni shoja de zo Bulusu keyi ku nshi a geba ku de ku yi kankye kwa bila de ku shina ko mina paru, mu ma nshiri de mu kisa yi kapi de yaa keyi anya ni.>>

16 Sede yaa ni yayiwa ni Bulusu ni mase zi shiri de sua yi, se e te a gizi ni shoja te gye Bulusu.

17 Se Bulusu sukwa tolense ni shoja na e gye yi, <<La yaa sambari mu de ki te nshi anya tolense aku; e ma ni mbodaa de yaa gye yi.>> 18 Se e la yi te aya tolense asu.

Tolense shoja gye yi, <<Bulusu, yaa jaru, saka manki anya na e gye ni de ni keyi yaa sambari mu anya ke sobon e man mbodaa de yaa gye ke.>>

19 Se tolense shoja la yaa sambari mu a nani, jaa yi ta keteri se e minya yi, <<Mina ka bila de ki gye ni?>>

20 Yaa sambari nkye: <<Yawudawa su yeda de su gye ke de ki zo Bulusu keyi su a geba ni Salaki gobe de su shina ko mina paru. 21 Kede ki yeda nsu ba, sobon menza pi aribeni su boyi sua pekye ke a sanwa. su melese de sua si ko sha ba se su kisa e yi. sua pekye ke yiride ka ologba su.>>

22 Se tolense shoja seleme yaa sambari se e ja yi kuni, kede ki gye nse daa nkye ki gye ni beta mu.>>

23 Se tolense shoja Roma sukwa bi a siki toree se e ba su doka, <<Ku shiriya de ku ta keseriya a keripi tera ni dederi nja shoja deri bi, nsu nyunwa doki Sebeyii nja nsu ripi manta deri bi de su te a keseriya ni keripi tera ni dederi. 24 ku bila doki de Bulusu yaa nyunwa te anya ni gomuna Pelisi lapiya.>>

25 Tolense shoja rubuta takada pala yomu:

26 Kalaudiyu Lisiyas,

Te nja Tolense Gomuna Pelis:

Gesuwa tolense Pelis.

27 Nseminji mu Yawudawa ka yi sua bila de su kisa yi, sede Ni zo nja keshi shoja na se ni butu yi, se ni shina nkye e ma yaa kesa ni Roma na. 28 Na so de nshina mina sa de sua bashi yi, se ni zo nshi a geba salaki. 29 Ni zi sua pala yaruwa beta e ma de sua minya yi a kiya doka asu, sede ni geni lepi daa a kiya yi de deta e muntu ko e te a jaru ba. 30 De su gye ni shiri de su yi a kiya nseminji mu, na dandani ni saka yi zo anya ke. Ni kuma beyi doka gye nsu kara yi su pala mungu mbode a geba ke. 31 Se shoja, biya mbode su gye su, su la Bulusu nja su ndederi su zo nshi ari Antipatiri. 32 Nana ni bi su la shoja de su te nja shi, se su kuma te gizi shoja 33 De shoja lesa Keseriya, su la takada ba Gomuna nja su la Bulusu beyi a nani e yi 34 De Gomuna karanta takada se e minya woni gunduma na e butu. E gane e butu dege kesa Kilikiya na, 35 Nkye, <<Na zi kara ake nde nsude yi kara ake zo anya mu.>> Se e beyi doka de su boyi Bulusu a pada Seleki Yiridu de gina.