1 De nana Pentikos keyi, guru nsubiya Yesu su tala anya daa kaka. 2 Se dandani su zi mosi kankye ni totolo akusuka butu a bisi sika gizi de su zunwa ashi dirim. 3 Se su geni mbode ma kankye arishiya wuta laba sonka a kiya ni kowoni daa asu. 4 Se guru asu su sika ni Aworo Nsuseki se su para beta ni arishiya bombom yiride Aworo ba su sori de su yi.

5 Anya ni worosu su ntani Yawudawa de sua zunwa a Wurishelima, nsu bowuta Mirikisi de su butu dege kowoni kesa a durinya, 6 De su zi mosi kankye ni totolo akusuka mu, yowa ntani su zo tala, su yi mamanki, sobon su zi kowoni daa su yaa yi beta ni arishiya yiri namu. 7 Su yi mamanki soseyi, su minya nkye: <<Guru ntani de sua yi beta mu su ma ntani Galiliya na bo? 8 Yaya na guru amu mua zi su sua yi beta ni arishiya mu? 9 Sobon worosu su mu, mu ma patiyawa, Midiyawa nja Elamawa, ntani ni Mesopotamiya, ni gunduma ni Yawudiya, nja ni Kapadokiya, nja Pantu, nja Asiya, 10 Parijiya, nja Papiliya, nja Masa, nja anya de gyewe Sayiri ni kesa Libiya, ari ma bakwe butu a Roma. 11 Guru amu Yawudawa nja worede su ma Yawudawa ba de su juyi ta Yawudawa, nja worosu su amu de su ma dege Kiritawa nja Larabawa, mu zi su sua yi beta ni arishiya mu a kiya ni totolo mbode Mirikisi yi!>> 12 Guru asu su yi mamanki nja su rikishe, su minya nkiya su nkye, <<Mina ma maana ni mbo mu?>>

13 Sede, worosu su, sua yi nsubiya Yesu siya nkye, <<Su sha giya nyowa na su bugu.>>

14 Se Biturusu dege a bisi gabada nja gom sha daa, e dege murinya e yi gye yowa ntani beta nkye: <<Yayuwa na Yawudawa nja guru aku de kuma a Wurishelima, Ku zi, de ku sa Kuni ni mbode Na pala gye ku, 15 Ntani worosu mu bugu ni giya na ba, kuzukam keripi tera ni sape la! 16 Mbo mu e shiya ma mbode Mirikisi pala a baki ni anebi Juwe nkye:

17 << <Mirikisi nkye, A nana ni karishe,

Na nya guru ntani Aworo na.

Yaya aku menza nja mata sua pala mbode yaa paru a geba,

Yaya sambari aku sua geni mbo boyi,

susupe aku sua yi anansi nyowa.

18 A nana de Na nya Aworo a kiya bunwa na, menza nja mata,

Na nya Aworo na a nana ni,

tuku na sua beyi manki.

19 Na nana mbo mamanki a siki bisi

nja alama a kisi,

Zini nja wuta ni ayanki beki kiri.

20 Nana yaa juyi ma dopuwa

nja wonta yaa ma zanza kankye zini

kapi totolo nana zo ni Obagizi.

21 Nja guru nsude sua sukwa

seni ni Obagizi sua samu sila>.

22 <<Oku ntani ni Izireyila, ku zi beta mu: Yesu ni Nazere e shiya ma nseminji de Mirikisi ba ku ta anya manki, ni ANKI mbo mamanki nja alama, de Mirikisi nana anya yi a siki ku, nta yiri de oku nkiya aku ku shina. 23 Shiri Mirikisi nja yada yi na de e la Yesu ba ku; de ku kisa yi te turiki bila nsu lepi de su gidiri yi. 24 Sede Mirikisi dege yi amuntu ema leyi, butu bila Genbeki ni muntu, sobon Mirikisi yaa taba bila de muntu e man sori keyi a kumsha ba. 25 Dowuda yi beta a kiya yi nkye:

<< <Ni geni Obagizi kowoni nana anya na.

Sobon e ma keteri na kowoni nana,

Na puari geba ba.

26 Nkayomu dishiya na yaa yi perisiki baki na yaa yi yobo ni perisiki;

nki na yaa zunwa ni sadishiya,

27 sobon e ke Mirikisi ka taba bila ni a kumsha ba,

ko ka bila bunwa ake nsuseki de e rubu a siki kumsha ba.

28 E ke na ki nana ni turiki de mani leyi,

Ka sika ni nperisiki te anya ma ake nja ni.>

29 Biturusu pala nkye, <<Yayuwa, Na gye ku beta ba puari geba nkye adaatolo amu Dowuda muntu su bishina e yi, kumsha yi ma ari yawu mu. 30 Sede e ma anebi na e kwa shina de Mirikisi yi anikowori nja melese nkye yaa sa yaa ni yaa yi daa a kingbolo solota. 31 De Dowuda geni mbode yaa paru a geba, e yi beta a kiya dege ni Kiristi, yaa moshi nshi a kumsha ba, ko nki yi e rubu. 32 Mirikisi dege Yesu mu ni leyi, guru amu mu ma sheeda yi ni gaskye de Yesu kuma mani leyi. 33 Ko de su ba Yesu girima a nani dama ni Mirikisi, Adaa yi, e kwa keleba Aworo nsuseki, yiri de Mirikisi yi anikowori de e ba su mbode kwa zi nja kwa geni mu. 34 Sobon Dowuda na ta bisi ba; sede e pala nkye,

<Obagizi gye Obagizi na nkye:

Zunwa a nani dama na

35 ari nja nsu obokigeba ke a tapi seni ke.>

36 <<Nkayomu guru ntani Izireyila su shina nkye, Mirikisi sa Yesu mu, de ku gidiri yi, ma Obagizi nja Kiristi.>>

37 De ntani zi mbode Biturusu pala, e kpa su a dishiya soseyi, su gye Biturusu nja worosu su yayamanki nkye, <<Yayuwa, mina mwa yi?>>

38 Biturusu keleba nkye, <<Ku juyi bila lepi ku de su yi ku tunkwasa a siki seni Yesu Kiristi, de Mirikisi yape lepi aku; na kwa keleba kyawuta ni Aworo nsuseki. 39 Nkaa anikowori Mirikisi maana ku nja yaya aku nja guru worede su yi nyisa, osu na ma guru worede Obagizi Mirikisi amu sukwa su zo anya yi.>>

40 Biturusu ologba su ni beta nyowa e ma gila su, nkye, <<Ku sila nkiya ku dege poro de ma zo a kiya mumungu sana mu!>> 41 Worede su yeda ni manki Biturusu su yi su tunkwasa, a nana ni su ja yowa ni ntani dubu wuku.

42 Su beyi kiya su ta anya yayamanki de kokoyi nja yi zumunshi, sua si mbosi nja yi lepa gabada.

43 Womba ka Konwawa sobon Mirikisi meyi ANKI beyi mamanki nja alama nyowa te anya nsu yayamanki. 44 Guru nsu beigaskye ni Yesu su tala anya daa kaka su ma yi zumunshi gabada su ma laba mbode su ma nshi nja nkiya su. 45 Su la mbode su manshi see guru, su laba konwawa gyolo kyakya mbode konwawa ma bila 46 Kowon nana su ma sigeba ni tala a siki laki Mirikisi, Su ma si mbosi yere a gizi nkiya su, ni peri siki nja dishiya daa, 47 su ma yobo Mirikisi, su kwa mani peri zini anya ntani guru. Kowoni nana Obagizi ma ja su ntani worede su keleba Mirikisi.