1 Nana daa Biturusu nja Yaaya su ma ta laki Mirikisi kyakya keripi wuku ni nana de kwanki lepa yi. 2 Anya ni nseminji daa de su yapu yi ma gurugu su la yi ta baki kopa de su ma sukwa yi nkye kyakyawu, anya de su ma sayi kowon nana de yaa ologba worede su ma yuru a laki Mirikisi. 3 De e geni Biturusu nja Yaaya su ma yuru a laki Mirikisi, e minya su gyolo. 4 Biturusu nja Yaaya kone yi tiriri. Se Biturusu nkye, <<Kone mu!>> 5 Se nseminji ni ba su ankeli yi, pekye de e samu mbo daa anya asu.

6 Se Biturusu nkye, <<Aziripa ni zinari Ni man shi ba, Sede mbode Ni manshi de Na ba ke: a siki seni Yesu Kiristi ni Nazere dege de ki yi tepiya!>> 7 Biturusu ka yi a nani yi ni dama, e sua yi e dege a bisi, dandani wuya seni nseminji ni nja jijiya nki yi su yi sori; 8 E tirimi dege sakisi a bisi, nseni yi, e para tepiya gyewe. Se e yuru a siki laki Mirikisi nja su, e mayi tepiya e ma tirimi e ma yobo Mirikisi. 9 De guru ntani geni yi mayi tepiya ma yobo Mirikisi, 10 su gane nkye nseminji mu na ma zunwa a kopa ni laki Mirikisi de su ma sukwa nkye kyakyawu, yaa pata gyolo, se su yi mamanki soseyi ni mbode paru nja shi.

11 De gurugu de su worikye yi a kyakyawu kopa mu ka Biturusu nja Yaaya, guru ntani su zo ngudu su ma yi mamanki anya de sua sukwa yi kolonwa ni Sulemanu. 12 De Biturusu geni ntani, e gye su nkye, <<Oku ntani ni Izireyila, Mina sa de mbo mu yaa ba ku mamanki? Ko mina sa de kwa kone mu nta mwa yi mbo mu nja sori nkiya mu ko ni gangasi amu na mu sa nseminji mu mayi tepiya? 13 Mirikisi ni Abireyi, Ishaku nja Yakubu, Mirikisi ni nsu adaatolo amu, e ba Yesu bunwa yi totolo girima. Sede ku la yi beyi de su kisa yi, ku kwa ki yi a geba Bilatu, kode Bilatu bila de e shika yi. 14 Sede ku ki nsuseki nja gangasi, ku nkye Bilatu e bila ku nsu kisa ntani. 15 Ku kisa nsude tutiri leyi, sede Mirikisi dege yi a kumsha. Mu ma sheeda ni dege yi. 16 Yomuna te anya sori seni Yesu na nseminji mu samu sori nki. Mbode kuma geni ku kwa shina e paru te anya beigaskye a siki seni yi la; te anya beigaskye a siki seni Yesu na nseminji mu worikye, guru ku kuma sheeda ni mbom.

17 <<Kuzukam, yayuwa, Ni shina nkye mbode oku nja toree aku ku yi Yesu ma arishi shina na. 18 Sede yomu na beta Mirikisi yaa sika de e pala te anya anebi nkye Kiristi yi yaa Genbeki; na e sayi paru a turiki mu. 19 Sobon yomu ku juyi bila mumungu mbo aku, de ku biya Mirikisi, de e yape lepi aku, de Obagizi wonkye dishiya aku, 20 yaa saka Yesu, de ma Kiristi de Mirikisi zabi ku nshi tun a beyi. 21 E ma dole na Yesu zunwa bisi ari kwanki de Mirikisi yaa sa guru mbo su ma sabuwa, yiri de Mirikisi pala te anya anebi yi nsu seki a kwanki de bise. 22 Musa pala nkye, <Obagizi Mirikisi aku yaa saka ku anebi daa, yiride e saka ni, yaama daa dege siki ntani aku na. E ma dole na ku zi guru mbode yaa gye ku. 23 Guru nsude zi anebi mu ba sua butu yi bila siki ntani Mirikisi.>

24 <<Na gye ku, Guru anebi butu a kiya Samela nja worede su zo a beyi, nyowa a siki asu su yi beta a kiya kwanki mu. 25 Anikowori de Mirikisi yi te anya nsu anebi yi su ma sobon nja aku la, oku na kwa si gado ni seda de Mirikisi yi nja nsu adaatolo aku. yiride e gye Abireyi nkye, <Butu a juriya Abireyi na sa guru ntani durinya anabirika.> 26 Mirikisi zabi bunwa yi, e saka yi npari ta anya, de e sa ku anabirika te anya juyi ku bila mumungu turiki.>>