1 <<Yayuwa na nja nsu adaa na, ku zi ni kuzukam de ni gye ku mbode paru Nka de ni sere kiya na>>.

2 De su zi Bulusu yaa yi beta nja su ni arishiya Aramaya, su yi shuru.

Se Bulusu nkye: 3 <<E ni mma Yawudawa na, su yapu ni a Tasu ni Kilikiya, sede ni yi girima a siki totolo geri ni na. Ni yi karatu na a kerikeshi Gamaliya de e kokoyi ni a siki doka ni nsu adaatolo amu ni ma ni memeri beta Mirikisi yiri de oku ma kwa yi a yawu mu. 4 Ni sa nsubiya turiki da mu su sha Genbeki ari su muntu, ni ma ka menza nja mata ni ma sa su a siki jaru, 5 yomu na tolense pirisi nja guru salaki sua yi yaa beyi sheeda. De ni keleba takada ni dama dege anya tolense pirisi de te anya yayuwa de su ma a Dimasiku, ni te anya ni de ni ka yi nsubiya Yesu kankye yaya jaru de ni ba su poro a Wurishelima.

6 <<De nana keyi a sisika ni zo kusa ni Dimasiku, se asikye ni wuta zo asikye butu pawu dege bisi gyowe ni. 7 Ni pauri a kisi ni zi murinya man nkye, <Shawulu! Shawulu! mina sa de ka ba ni Genbeki? >

8 Ni minya yi <<Waa ma eke, Obagizi?>

<<<E ni na Yesu ni Nazere, de ka beyi Genbeki,> Yesu keleba. 9 Ntani de sua yi tepiya nja ni su geni asikye, sede su zi murinya de yaa yi beta nja ni ba.

10 Ni minya nkye << <Mina Na ka bila de ni yi, Obagizi?>

Obagizi nkye << <Dege a bisi,> <De ki ta a siki Dimasiku. Anya ni sua gye ke guru mbode ni shiriya de ka yi.> 11 Worede mwa yi tepiya gabada su ka ni a nani te a siki Dimasiku, sobon dereja asikye wuta sa ni ma makapi.

12 <<Nseminji daa seni yi ma Ananiya e zo de e geni ni. E shi ema nsu biya doka mu la, guru Yawudawa de su zunwa a Dimasiku sua beyi girima. 13 E sakisi a keteri na nkye, <Yayiwa shawulu, geni jaja!> dandani se ndani yi bure e meyi geni anya.

14 Se nkye: <Mirikisi ni nsu adaatolo amu zabi ke de ki shina nupi e yi nja de e geni nse gangasi ni Mirikisi nja de zi kelima beta butu a baki e yi. 15 Oku kwa ma sheeda e yi anya ni guru ntani a kiya mbode ku geni nja de ku zi. 16 kuzukam mina kwa pekye? Dege a bisi, de su yi ke tunkwasa nja wonkye lepi ake, de ki sukwa seni Obagizi.>

17 <<De Ni kuma ta Wurishelima de mma yi lepa a gizi Mirikisi, Mirikisi bure ni ndani 18 se ni geni Obagizi Yesu yaa yi beta. E gye ni nkye <Yi seberi!> <Ki bila Wurishelima, sobon sua yeda ni sheeda ake a kiya na ba.> 19 Ni keleba nkye, <<<Obagizi,> ntani mu shina nkye E ni ni ma biya kolonwa daa ta daa ni ma ka su sa a jaru nja dukwa worede su yeda nseni ake. 20 De su kisa Isitipanu, Ni sakisi anya ni ni beyi sheeda mbo de paru nja ni kpanku keikei worede su kisa Isitipanu.>

21 <<Se Obagizi gyeni nkye, <Dege; Na saka ke ta anya nsu nyisa anya worede su ma Yawudawa ba.>>>

22 Ntani nyowa su ma zi beta Bulusu ari e pala kelima de su ma so ba. Se su dege murinya su yi kuruwa nkye, <<Ku butu yi bila beyi kesa e kamata de e man leyi ba!>>

23 De su sigeba ni kuruwa ni ribi riga asu nja dege kula a bisi, 24 sobon yomu tolense shoja Roma beyi doka de su butu bulusu a sisika asu te nshi a gizi shoja. Se e beyi dama de su dukwa Bulusu nja de su minya e yi mina sa de ntani sua yi kuruwa yomu. 25 Sede de su domuna de su dukwa yi, Bulusu gye tolense shoja ni Roma de sakisi a geba yi, <Ema dede na de e ke ki dukwa yaa kesa ni Roma ko e yi lepi ni mbodaa ba?>>

26 De tolense shoja ni Roma zi yomu e te anya ni nsugizi e yi e minya e yi nkye. <<Mina ka so ki yi?>> <<Nseminji mu e ma yaa kesa Roma.>>

27 Se tolense shoja te anya Bulusu e minya nkye, <<Gye ni, ki ma yaa kesa ni Roma na?>> E keleba nkye,

<<Ee yomu na>>

28 Se tolense shoja nkye, <<E ni ma ni biya gyolo nyowa de ni ma yaa kesa.>>

<<Bulusu keleba, Sede su yapu ni ma yaa kesa.>>

29 Worede sua bila de su minya yi beta su jan beyi dandani. Se tolense shoja zi nkye Bulusu ma yaa kesa ni Roma na, e zi womba e kwa rigye domuna yi ni serika

30 Nana ni bii, tolense shoja yaa bila de e shina mbode sa Yawudawa su ja Bulusu yaruwa, e kunshe yi se e sukwa toree pirisi nja salaki geri su zo gom guru asu. Se e keyi Bulusu zo sakisi a geba asu