1 Sede nseminji daa seni ma Ananiya, nja mata e yi saparatu, osu du su la mbode su man shi se. 2 Ni shina mata e yi, Ananiya butu gyolo boyi a gizi, se e keyi ririgye zo nshi a geba yayamanki.

3 Biturusu nkye, <<Ananiya, mina sa de obiri yuru a dishiya ake de sa ki yi Aworo Nsuseki yaruwa, ki sua mbodaa a siki gyolo bikiya ake boyi? 4 E ma na ke na kapi de ki la see bo? Ko de ki la see waa ka ke nsori de ki ka yi gyolo zo nshi? Mina zo a dishiya ake de ki yi yomu? Nsebeki na ki yi yaruwa ba Mirikisi na ki yi.>> 5 De Ananiya zi mbode Biturusu pala, e puari muntu; guru worede zi mbode paru su yi womba. 6 Se yaya sambari zo lende nki Ananiya ni peri su keyi ta a woze te bishina.

7 A beyi keripi wuku mata yi yuru a siki, e shina mbode paru ba. 8 Biturusu minya mata e yi nkye, gye mu da mu e shiya ma gyolo ni bikiya de e ke nja Minzi ake ku la see?>>

Saparatu keleba nkye, <<Ee,>> <<mbode mu la see naka.>>

9 Biturusu gye yi nkye, Mina sa de ku yeda de ku gwada Aworo Obagizi? Zi tapi seni worede bishina minzi ake su ma a baki kopa, e ke ma sua ka yi ke te bishina du.>>

10 Dandani Saparatu puari a geba Biturusu muntu. Se yaya sambari yuru a siki, su geni yi muntu. Su leyi ta woze te bishina a keteri minzi yi. 11 Se totolo womba yi nsubiya Yesu nja guru worede zi mbode paru nja Ananiya nja mata yi.

12 Yayamanki su yi mbo mamanki nja alama nyowa a siki ni ntani. Guru nsubiya Yesu su gomu gabada a pili kolonwa ni Sulemanu. 13 Nseda dege siki ntani de yeda hada kiya nja yayamanki ba, ko de ntani su ma ba su girima. 14 Nzun yomu worede yeda ni Obagizi Yesu menza ni mata su ma te ja yowa. 15 Sobon mbode paru, ntani kwa yi worede su mayi suwo zo nya a turiki, turiki ni kalanga asu de kuruma Biturusu e biya kiya su nde yaa bise. 16 Ntani geri geri de gyowe Wurishelima, su keyi worede mayi suwo nja worede mumungu aworo ma ba su wuya; se guru asu su worikye.

17 Se tolense Pirisi nja worede ma nja shi, nja keshi ni Sadokiyawa, su ma yi geba ni mbode yayamanki su ma yi. 18 Sobon yomuna su ka yayamanki sa a jaru. 19 Sede ndederi ni meleku Mirikisi zo bure kopa jaru butu su a woze. 20 Meleku gye su nkye, <<Ku te, ku sakisi a siki laki Mirikisi, de ku gye ntani gaskye manki sabuwa leyi mu.>>

21 De anya kwa yi su yuru a siki laki Mirikisi, yiride meleku Mirikisi gye su, se su para kokoyi ntani.

De tolense pirisi nja ntani yi su keyi, su sukwa guru salaki gomu, nja guru toree ni Izireyila saka su ta jaru de su zo yayamanki. 22 Sede su keyi jaru, su geni nseda anya ni ba. Su kuman beyi te pala manki nkye, 23 <<Mu geni jaru riripe, nsu kpanku sakisi a baki kopa; sede mu bure kopa, mu geni nseda a siki yi ba.>> 24 De tolense ni pirisi nja tolense ni nsu kpanku laki Mirikisi su zi mbo mu se su yanzi, su yi mamanki ko yaya na mbo mu paru.

25 Se nseda zo gye su nkye, <<Geni! Ntani de ku sa su a jaru naka sakisi a laki Mirikisi ma kokoyi ntani ka!>> 26 Se tolense ni nsu kpanku jaru nja yayagizi yi su te ka yayamanki. Su yi anpani ni sori ba, sobon su yi womba ntani kede su kutiri su dunsi. 27 De su keyi yayamanki zo nshi a geba toree, se tolense Pirisi e minya su nkye. 28 Mu ja ku kuni kede ku kokoyi a siki seni Yesu ba,>> <<Sede ku sika Wurishelima ni kokoyi nja ku samu de mu kwa yi a laki ni zini nseminji mu.>>

29 Biturusu nja worosu su yayamanki keleba nkye, <<Dole mu beyi girima nja Mirikisi, ba nsebeki ba! 30 Mirikisi ni adaa amu de dege Yesu a kumsha, de ku kisa la yi lete a gidiri. 31 Mirikisi ba Yesu girima a nani dama yi kankye yaa seleki nja nsu sila ntani bila mungu mbo nja nsu yape lepi Izireyila. 32 Mu ma sheeda ni mbode paru, Yomu na Aworo nsuseki, de Mirikisi ba worede su beyi girima nja Yesu.

33 De toree ni pirisi zi mbo mu, su yi anwashi sua bila de su kisa yayamanki. 34 Sede nseminji parisiyawa de seni yi ma Gamaliya, male doka Musa, de guru ntani sua beyi girima, dege sakisi a bisi a geba salaki e beyi doka nkye su butu menza worosu mu a woze ni kwanki piri. 35 Se Gamaliya gye Salaki nkye: <<Ntani ni Izireyila, ku shina mbode kwa bila de ku yi ntani worosu mu. 36 Kwanki de bise nse daa nsu seni Tuda butu e la nkiya yi kankye e ma mbodaa, ntani deri wuru sadishiya anya yi. Su kisa yi, guru nsubiya yi su yaapi a woze yomuna ma karishe asu. 37 A beyi yi, Yawuda de e ma nseminji Galiliya butu a kwanki ni kiriga; jaa ntani su biya yi. Su kisa yi du, nsubiya yi guru yaapi a woze konse la turiki yi. 38 Nkayomu, Na pala gye ku a kwanki mu, Kede ku kpa ntani mu. Bila su de su te ma su! Nde ANKI asu ma ni nsebeki na, sua puari. 39 Sede nde ANKI asu e butu dege anya Mirikisi na, kwa yi yaa nana su ba. Kede ku ma nsu yi geba nja Mirikisi!>>

Su biya showura ni Gamaliya. 40 Se su sukwa yayamanki ta siki su dukwa su. Se su gye su nkye kede su sakye sukwa seni Yesu gagaba; se su bila su te.

41 Yayamanki bila geba ni nsu shiriya, su ma yi peri siki, sobon Mirikisi geni su deta de su Genbeki sobon seni Yesu. 42 Kowon nana, a siki laki Mirikisi nja su ma biya gizi gizi, su ma kokoyi nja beyi nabari kyakyawu nkye Yesu e shiya ma kiristi.