1 De rikishi sakisi, Bulusu sukwa nsubiya Yesu se, beyi de e ba su sori guyam, e gye su nkye se nana daa, se dege ta kesa Makidoniya. 2 De Bulusu biya geri geri, e yi kelima yowa de ba nsubiya Yesu sori guyam, a karishe e ta kesa Helas. 3 Anya de zunwa wonta wuku. Sede toree ni Yawudawa su shiriya mungu mbo a kiya e yi nta yiri de yaa so bila yuru a kwanto de ta Suriya, se Bulusu shiriya de e kuma beyi ta Makidoniya. 4 Worede su sa yi ma Su pata Yaa ni Purus dege geri Biriya, nja Aristakus nja Sakundus ntani Tasalonika, nja Gayusu ni Darbe, nja Timoti du nja Tikikus nja Taropimus ntani kesa Asiya. 5 Ntani worosu mu te a geba amu su pekye mu a Taruwasa. 6 Sede mu yuru a kwanto dege Pilibi beyi buki ni buredi de man darigaza ba, nja beyi kwana biyari mu san su a Taruwasa, anya ni mu yi kwana bokwe.

7 Se a nana ni pari a siki mako mu tala anya daa de mu laba mbosi. Bulusu yi beta nja ntani, sobon yaa bila de bilasu nde geri shekeri, e sigeba ni beta ari sisika dederi. 8 Pitila nyowa ma wuta a gizi bisi anyade mwa gom. 9 Yaa Sambari daa seni yi ma Yutikus zunwa a siki taga ni laki bisi, kwana leyi soseyi de Bulusu sigeba ni yi su beta. De kwana yuru ANKI soseyi, e butu puari a kisi dege laki bisi ni wuku. De su la yi a bisi ema gan. 10 Bulusu sonka te a kisi, e dunkye a geba yaa sambari se e runguma yi. Bulusu gye su nkye, <<Kede ku da mu,>> <<E man la yi!>> 11 Se e te a gizi bisi jaja e sua buredi suku. Se sigeba ni beta ari anya kwa yi, se dege te mayi. 12 Ntani la yaa sambari mu ta a gizi nleyi su yi perisiki soseyi.

13 Mu sigeba te yuru a kwanto te ni Asus, anya de mua te la Bulusu a kwanto. E shiriya yomu sobon yaa yi tepiya nse ni. 14 De e san mu Asus, mu la yi a kwanto ta Mitilin. 15 Nana ni bi mu mu la kwanto dege anya ni mu lesa kesa Kiyos. Gerishekeri mu te a keteri Samos, gerishekeri se mu lesa Miletus. 16 Bulusu shiriya yaa yuru a kwanto te ni Apisa de kede e kisa kwanki a kesa Asiya, sobon yaa yi seberi de keyi Wurishelima, nde yaa yi kyawu a nana ni Pentikos.

17 Sede Bulusu keyi Miletus, e saka manki ta Apisa anya toree ni nsubiya Yesu. 18 De su lesa anya ni Bulusu, e gye su nkye: <<Ku shina yiri ni zunwa de ni yi guru kwanki de Ni ma nja ku, dege nana ni pari de ni zo a kesa Asiya. 19 Ni bowuta Obagizi Yesu ni soki kiya nja anwe yi, ari sua gwada ni a kiya mungu shiri ntani Yawudawa. 20 Ku shina nkye Na bila beyi manki kowon mbo de yaa sua ku to te nja ku sede ni kokoyi ku apili nja dege gizi ta gizi. 21 Ni gila Yawudawa nja worosu de su Yawudawa ba nkye su juyi te a turiki ni Mirikisi de su juyi su beigaskye nja Obagizi Yesu.

22 <<Nja kuzukam, sede Aworo na yaa gye ni, Eni na ta Wurishelima, ni shina mbo de yaa paru ni anya ni ba. 23 Bulusu nkye mbode e shina ma kowoni geri de ni te Aworo nsuseki gila ni nkye jaru nja sha Genbeki yaa pekye ni. 24 Ni damu ko mina yaa sani ba, Nisa leyi na a baki mbo daa ba, e ni ma bila de ni gama tatarigye nja ANKI de Obagizi Yesu ba ni, ANKI ni beyi sheeda nabari kyakyawu a kiya aniyeri Mirikisi.

25 <<Ni shina nkye Kuzukam ba nseda a siki aku de ni yi ku doka a kiya solota gizi bisi. Kwa taba saki geni ni ba. 26 Nkaa yomu, Na so de ku tabata yawu nkye ni ma ni a laki zini nseda a kiya na ba. 27 Sobon ni ki de ngye ku guru nupi Mirikisi ba. 28 Ku sigeba nkpanku kiya aku nja keshi yaya timshiya nsude Aworo nsuseki la sa anani ku. Ku ema nsu kpanku ntani Mirikisi, de su ma na yi de see te ni zini Yaa yi. 29 Ni shina nkye a beyi de Ni bila ku, kere bikiya sua zo a siki aku sua kwa bila gerikye ni ba. 30 Ari dege siki ntani aku worosu sua butu sua yi beta de ma turiki ba de su ja yayagizi Yesu ta anya asu. 31 Sobon yomu ku tele kiya aku! Ku Turunwa nkye shekera wuku aka Ni bila ja kuni aku ba ni dederi nja nana mma yi anwe sobon oku. 32 <<Kuzukam Ni la ku ba Mirikisi nja kelima ni aniyeri yi, de yaa kuma gina ku yaa ba ku gado nja guru worede su ma nsuseki. 33 Ni sa ndani a zinari ko azuripa ko keyi ni nse daa ba. 34 Oku nkiya aku ku shina nkye nani na na yaa biya ni guru mbode na so nja ni worede su ma nja ni 35 A siki mbo guru de na yi, Ni nana ku nkye anya ANKI soseyi de mma yi na, Ni sua worede su man sori ba to turunwa kelima de Obagizi Yesu nkiya e yi pala: <Mirikisi nkye e pi ma ni anabirika de ki beyi nja de ka keleba,> >> 36 De Bulusu pala yomu, e dure nja guru asu su yi lepa. 37 Se guru asu su yi anwe de su runguma Bulusu. 38 Mbode sa su yi beki siki soseyi e shina ma beta de pala nkye sua geni yi gagaba. Se su sa yi te a baki riki de e yuru a kwanto.