1 De su shiriya mu dege a kwanto ta kesa Italiya, Bulusu nja worosu su yaya jaru su la su ba tolense ni shoja ni Roma de seni yi ma Yuliyus, nsude mani keshi shoja ni seleki Augustus. 2 De mu yuru a kwanto ni Adaramitiya de yaa yi shiri ni dege te a gunduma ni Asiya, mu para tepiya a keteri totolo riki. Aristakus, nse ni Tasalonika ni kesa Makidoniya, ma nja mu.

3 De anya kwa yi mu sonka a kesa sidon; se Yuliyus yi Bulusu aniyeri, e bila yi de e te anya nsu oboki yi de su beyi mbode yaa bila. 4 De mu bila anya ni, mu yuru a kwanto se akusuka sa mu a geba, sobon yomuna mu kuma biya beyi Sayipuru anya de akusuka man sori ba. 5 A beyi de mu nyenteri totolo riki ni kesa Kilikiya nja Papiliya, mu sonka a Mira ni kesa Likiya. 6 De mu keyi anya ni tolense ni shoja samu kwanto ni Alezandiriya de yaa ta kesa Italiya su sa mu a siki yi. 7 Mu la kwanki nyowa de mwa yi tepiya ni ankeli ni Genbeki kapi de mu lesa Kinidus. de akusuka nana mu sigeba ni tepiya, mu biya keteri ni geri de riki gyowe yi a Kirit, kusa ni Salmoni. 8 Mu Genbeki tepiya a kwanto a keteri riki mu zo keyi anya de sua sukwa yi anya boyi kyakyawu, kusa ni geri Lisiyas.

9 Mu la kwanki nyowa, nja tepiya a kwanto mu ma a siki totolo aseri sobon kuzukam yaa ma a beyi de kwanki ni azimi peri siki ni yape lepi rigye bise, se Bulusu ba showura su, 10 Nkye <<Menza, Ni geni kankye tepiya mu yaama mu damuwa a geba yaa ja mu totolo ni asara ni kwanto nja lesa ni keikei amu kede ba, ari nja la yi amu du.>> 11 Sede tolense shoja ni Roma, ki yeda ni beta de Bulusu pala, e biya shewura ni nsu tunkwa kwanto nja nsu kwanto. 12 Tunde anya boyi kwanto ni Lisiyas yi kyawu a kwanki meka ba, ntani nyowa yeda de su sigeba ni tepiya, sua sa dishiya ko mua keyi pinikiya nde mwa keyi geri ni Kirit, de yaa kone arewa ni nyema nja kudu ni nyema.

13 De agaguwa ni kudu para wula piri piri, su sa dishiya nkye sua samu mbode sua bila; se su sa akurigya de yaa tele kwanto de sua biya keteri totolo riki ni geri ni Kirit. 14 E dede ba, se agaguwa nsu sori butu ni arewa ni anse dukwa geri de gyowe ni riki. 15 De agaguwa totolo dukwa kwanto ari e kasa sakisi anya de akusuka butu ashi; se nsu tunkwa kwanto biya turiki de akusuka wula su te. 16 De mu biya beyi ni dende geri de riki gyowe yi sua sukwa yi kawuda. Anya ni mu geni wuya tukuna mu yi yaa la dende kwanto mu sa a siki totolo kwanto. 17 De su ja dende a kwanto sa a siki totolo kwanto na su domuna e yi ni angwe a lelenga ni totolo kwanto de kede su wokye. De sua zi womba kede akusuka kiri kwanto ta nyashi ni Siritisi de sua yi yaa tunkwa ba, na su sonka ni akurigya ni tele kwanto. 18 Sobon riki tuku mayi somiya, de geri shekeri su para kwa yi keikei de ma a siki kwanto kutiri a siki riki. 19 A nana ni wuku, su kwa yi keikei ni ANKI kwanto ni nani su kutiri. 20 Kwanki nyowa mu geni nana ko kemu ba, totolo akusuka ma sigeba ni wula nsori, se sadishiya mu ni sila butu.

21 A beyi de su la kwanki nyowa su si mbosi ba, Bulusu dege sakisi a sedeka su nkye, <<Da ku zi beta na de ni nkye kede ku bila kesa Kirit; da mwa samu kiya mu a siki ni aseri mu nja rishi mu ba. 22 Sede kuzukam E ni mma ja ku sori dishiya, sobon ba nseda de yaa lesa leyi yi ba; kwanto na kede yaa bebeta. 23 Sobon ndederi jiya meleku ni Mirikisi de Ni ma na yi de ni kwa biya yi zo anyana 24 nkye, <kede ki zi womba, Bulusu! E ma dole na de ki sakisi a geba ni Kesar. Kone te anya ke na Mirikisi sila leyi ni guru ntani de su ma kwanto nja ke.> 25 Sobon yomu ku yi sori dishiya, oku ntani! Sobon ni beigaskye ni Mirikisi nkye yaa paru yiride su gye ni. 26 Sede e ma dole na de akusuka la mu kutiri a kesa de riki gyowe yi.>>

27 Sede a dederi ni kwana gom sha wuru, totolo akusuka ma te kiri mu a siki totolo riki ni Meditereniya. A dende sisika dederi nsu tunkwa kwanto su ma geni kankye su kusa ni anya de kesa ma. 28 De su gonta nyisa riki e keyi seni deri ni ashirin ni kisi; de su ja te piri yomu se su kwa gonta ema seni teseyin ta kisi. 29 Mu womba de kede kwanto buga a kiya dunsi, na su kutiri kurigya ni kwanto guda wuru dege siki kwanto nja su yi lepa de anya e kwa yi. 30 Sede nsu tunkwa kwanto bilade su yi gudu butu a kwanto; se nsu tunkwa kwanto sonka dende kwanto a siki riki kankye sua bila su sa kurigya de su tele kwanto a kisi. 31 Sede Bulusu gye tolense ni shoja ni Roma nkye, <<Nde ntani worosu mu sakisi a siki kwanto mu ba, kwa taba sila ba.>> 32 De shoja zi yomu su yenkye angwe de ka dende kwanto su bila riki ma te nshi.

33 De anya kusa kwa yi, Bulusu ologba su guru de su si mbosi: <<Yawu ma kwana gom sha wuru naka, a siki kwanki mu guru ku si mbosi daa ba. 34 Nkayomu mmayi ologba ku de ku si mbosi; ku si mbosi de ku ma nleyi. Tunde nseda a siki ku yaa lesa ko gesa kiya yi ndandaa ba.>> 35 A beyi na pala da mu, na la mbosi worosu su na e gbede Mirikisi a geba su guru. anya ni e laba yi para suku. 36 Na guru su samu sori de su si mbosi nkiya su. 37 Guru gabada mu ma ntani deri da ni Sebeyii ni shida de mu ma a kwanto. 38 De su si yiri de sua bila, su rigye loni ni kwanto su kwa yi alikama kutiri a siki totolo riki.

39 De anya kwa yi, nsu tunkwa kwanto su gane kesa de su ma ba, sede su geni ogbo nyashi, na su yeda de su juyi kwanto de su te anya ni. 40 Na su yenkye kurigya de sua tele kwanto, na su bila su a siki riki nja su kunshe angweyi de domina mbo juyi kwanto. Anya ni su butu woriki de ma a geba ni kwanto de sa yi tepiya seberi. na su sa kiya zo keteri ni riki. 41 Sede kwanto keyi anya de riki gomu na kwanto te yuru a nyashi na e yaa yi moshi nja tepiya gagaba, na kwanto para wokye sobon ni ni agaguwa ni riki de yaa buga kwanto.

42 Na shoja su bila de kisa yaya jaru kede daa a siki asu e yuru riki de su yi gudu e sila. 43 Sede tolense ni shoja ni Roma yaa bila de sila nleyi ni Bulusu, se nana su de yi mbode sua bila yi. E beyi doka nkye guru worede su yi yaa riki su para tirimi dege kwanto de su puari a siki riki de su te a woze riki. 44 Ririgye ntani su runguma katakpo kwanto, ko a siki ongbomu ni kwanto. a karishe kowoni nse a keyi woze ni lapiya.