1 Yayuwa na, ku shina mbode mma bila de ni mpala, sobon guru aku ku shina mbode mma pala a kiya doka. Doka mani sori a kiya ntani kwanki de su mani leyi na kin. 2 E ma kankye doka na a kiya mase amere, de e ma nja minjiyi tunde e man leyi; sede nde minjiyi muntu, doka amere ma a kiya e yi gagaba. 3 Sobon yomu nde e bila minzi daa a kwanki de minjiyi mani leyi, sua sukwa yi nkye mese kilaki. Sede nde minzi e yi muntu, doka amere ma kiya e yi gagaba sua sukwa yi mese kilaki ba, ko e bila minzi daa. 4 Sobon yomu, yayuwa na, oku ma du ku muntu te anya nki Kiristi, de kuma ni Kiristi de Mirikisi dege yi amuntu, de mu mani anpani anya ANKI Mirikisi. 5 Sobon de mua yi zunwa a siki arinya nsebeki, mungu memeri meyi ANKI a siki nkimu te anya kokoyi doka Musa, sobon ANKI mu guru e muntu. 6 Sede kuzukam, mu mani yenshi a kiya doka Musa de domuna mu, yomuna mua bowuta Mirikisi a siki sabuwa ANKI ni Aworo yi, wuri ni bowuta de mu yi te anya doka Musa de rubuta e bise.

7 Mina mua pala, Doka Musa e ma lepi na? Yi e ma lepi naba! sede doka e shina sa ni shina mbode ma lepi. Nde doka pala nkye, <<Kede ki yi memeri mbode ma ni nseda ba,>> Na taba shina mina ma memeri nki ba. 8 Sede te anya doka mu, lepi yi ampani ni dama ni doka, se e sa kowoni yiri memeri a siki na. Mba sobon doka ba, lepi anya na e man nsori ba. 9 A beyi de doka ma ba Ni mani leyi; sede kwanki de doka zo, lepi dege mani leyi, 10 Ni muntu. Se doka de e kamata e ba ni leyi, anya na e zon muntu. 11 Sobon lepi samu dama, e yi ampani ni sori doka shishirigye ni, e kwa kisa ni. 12 Sobon yomu, doka nkiya yi e man seki, mere lepi, nja kyakyawu.

13 Sede e yi nupi nkye mbo kyakyawu mu e sani muntu naka? Yi! Yomu na ba! Sede mu shina nkye lepi na kisa ni; e yi ampani ni mbo kyakyawu, lepi zoni muntu, sobon te anya doka lepi yaa zo pelesa a pili. Yomuna, te anya doka lepi nana mungu yi.

14 Mu shina nkye doka Musa e ma mbo gangasi la; sede E ni ni ma a siki arinya nki, de su la ni see kankye bunwa ba lepi. 15 Ni shina ko mina ni yi ba, mbode Na bila de ni yi e shiya mma yi ba, sede mbode Na bila de ni yi ba e shiya mmayi. 16 Tunde mbode mma bila de Ni yi e shina mmayi ba, E nana nkye doka e ma kyakyawu. 17 Tunde Yiride e ma; ba E ni na ni gaskye mmayi mbo mu ba, sede sori lepi de ma a siki na. 18 Ni shina nkye mbodaa kyakyawu ma a siki na ba, wato, a siki nkina. Kode nkye Ni mani memeri ni yi mbo kyakyawu, sede Ni yi yaa yi ba. 19 Sede Mmayi mbo kyakyawu de Na bila de ni yi ba; sede mbo mumungu de Na bila de Ni yi ba e shina mmayi. 20 Kuzum nde Ni yi mbode Na bila de Ni yi ba, e nana nkye E ni na Ni yi ba, sede sori lepi de ma a siki na. 21 Se Ni geni nkye doka mu yaa yi ANKI: de Na bila yi mbo kyakyawu, se ngeni mbo mumungu na ma dishiya na. 22 Sobon a siki dishiya na Ni yeda ni doka Mirikisi. 23 Sede Ni geni doka daa mbom yaa yi ANKI a siki nki na, doka de yaa yi geba ni mbode dishiya na sani. E sa ni ma yaa jaru ni lepi a siki doka de yaa yi ANKI a siki nki na. 24 Gbotuma na Ni ma mbo toseyi! Waa butu ni dege nki de yaa keyi ni te muntu? 25 Mgbede Mirikisi, de sila ni te anya Obagizi mu Yesu Kiristi!

Sobon yomu, E ni a siki dishiya na Ni ma bowuta doka Mirikisi, kode nkye sori lepi e tuku ma a siki nki.