Rute 1

8 Na’oomi «Yooni hado hanookibaa me’itine amuwwa ha’noonni welit hedhdhe; ani’aanna ha’nooke reyemmake aro’uwwi’a eloxxa assitinemmashshan iittanni Duuchchi Woddik Gootti ha’no’aanna eloxxa assowwaal. 9 Higgeenna herundinaake mine’n elo qicinni galdine hossinaashsha Duuchchi Woddik Gootti ha’no qarqaarowwaal» hite.

Ookkoneechchi uduma Na’oomi insa’nee nage’ik hedhdhe hita’n suunqexxe. Insa’nenna hiiqqinse oo’na’n, 10 «No’onna atinni welti gosa atixxiba’aa me’inanno malee’e ati birii’ni gantabo’non» hine.

11 Na’oominna insa’nee «Anxe oose maganneten higge; aninni welti me’itino’a hassina’neek mayeete? Ha’no dhaaldaaxxa oose ila dande’aanechcho labba’nee? 12 Ha’nooke hadibaa me’e; ani wele labbalo’n heerumabo’noshsha cimeennen; heerumaannelchonna kaddeele telcho heerumennexxi labbaxxa oose ilennele, 13 Insa’ne nophphine aadha genna qico’n ca’li hitine insa’nee heqqedha dandeetina? Tenne daafen wele labbalo’n heerundinebaang gattina? Anxe oosse haranga dandeessissabaaxxe kaddeexxa egendine’en; Duuchchi Woddik Gootti ane’ni mufateen; matanga tenne ha’no’n gelteexxe rakko’a lumoshsha yaadannen!» Hite.

14 Insa’nenna higgeenna hiiqqinse oo’ne; eettene yanna’n Orfa ballo isexxa Na’oomii sunqexxeexxi nage’ik hedhi hite hadi isekibaa me’ite. Ruuti kinni ballo isexxenaa’ni gargarit higabo’non hite mudhdhite.