1 ታርከ ማፃፋ 11

ዳዊቲ እስራኤለ ቦላ ካዎትስ

1 ሄሳፈ ጉየ፥ እስራኤለ አሳ ኡባይ እስፈ ከብሮናን ደእያ ዳዊታኮ ብድ፥ "ኑኒ ነ ሱነ ነ አሾ። 2 ካሰ ሳኦል ካዎ ግድድ ደእያ ዎደካ፥ እስራኤለ አሳ ኦላስ ካለዳይ ነና። ጎዳይ ነ ፆሳይ፥ ‘ታ አሳ እስራኤለ ኔኒ ሄማና፤ ኤንታ ቦላ ኔኒ ካዎታና’ " ያግስ። 3 እስራኤለ ጭማት ኡባይ ካዋ ዳዊታኮ ይዳ ዎደ እ ኤንታራ ከብሮናን ጎዳ ስንን ጫቅስ። ጎዳይ ሳሜላ ባጋራ ኦድዳ ቃላዳ ዳዊቲ እስራኤለ ቦላ ካዎታናዳ ኤንቲ እያ ትይዶሶና።

4 ዳዊቲነ እስራኤለ አሳ ኡባይ የሩሳላመ ካታማ ብዶሶና። ሄ ዎደ ያቡሰ አሳይ ሄ በሳን ደእያ ግሾ ሄ ካታማይ ያቡሰ ጌተቴስ። 5 ያቡሰት ዳዊታኮ፥ "ኔኒ ሀ ካታማ ገላናዉ ዳንዳአካ" ያግዶሶና። ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ ፅዮነይ ዳዊቲ ካታማ ጌተትስ። 6 ዳዊቲ ባ ኦላንቾታ፥ "ያቡሰታ ኮይሮትድ ኦልያ ኦንካ ቶራ ሞጮና ግዳና" ያግስ። ፃሩያ ናአይ እዮኣብ ኮይሮትድ ኦልድ ሀላቃ ግድስ። 7 ዳዊቲ ሄ ሚፃን ደእዳ ግሾ ሄ ካታማይ ዳዊታ ካታማ ጌተትስ።

8 ዳዊቲ ሚሎፐ ዶምድ ሄ ካታማ ዛሪድ ኬፅስ፤ አትዳ ባጋ እዮኣብ ዛሪድ ኬፅስ። 9 ኡባፈ ዎልቃማ ጎዳይ እያራ ደእያ ግሾ ዳዊቲ ምን ምን ብስ።

ምኖ ግድዳ ዳዊታ አሳታ

10 ምኖ ግድዳ ዳዊታ አሳት ሀይሳፈ ካልድ ፃፈትዶሶና። ጎዳይ እስራኤለስ ግዳ ቃላዳ ዳዊቲ ካዎታና መላ ሀ አሳት እስራኤለ አሳራ ዳሮ ማድዶሶና። ቃስ እያ ካዎተ ምንዶሶና።

11 ምኖ ግድዳ ዳዊተ አሳት ሀይሳፈ ካልድ ደኤይሳታ። ኤንታፈ ሄት ዳሮ ኤረትዳይሳታ። ሄታፐ ኮይሮይ ሀክሞና አድያ ያሾብኣማ፤ እ እስ ቶሆ ኦላን ሄ ፄቱ አሳ ባ ቶራን ዎስ። 12 እያ ካለይ፥ ሄ ምኖ አሳታፐ እሶይ አሆሀ አድያ ዶዳ ናአ አላዛራ። 13 ፍልስፄመ አሳይ ኦለታናዉ ፓስዳምማ ጌተትያ በሳ ሺቅዳ ዎደ አላዛር ዳዊታራ ደኤስ። እስራኤለ ኦላንቾት ፍልስፄመ አሳታ ስንፈ ባቃትያ ዎደ አላዛር ባንጋ ጋደን ደኤስ። 14 እነ እያ አሳት ጋድያ ግዶን ፍልስፄመ አሳራ ኦለትን፥ ጎዳይ ግታ ፆኖ እምድ ኤንታ አሽስ።

15 ፍልስፄመ ኦላንቾት ራፋይመ ዛንጋራን ዱንካንዳ ዎደ ሀስታሙ ሀላቃታፐ ሄት ዳዊቲ ደእያ አዱላማ ጎንጎሉዋን ደእያ ዛላኮ ብዶሶና። 16 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታፐ እስ ጩጋይ ቤተለመ ኦልድ ኦይክስ። 17 ዳዊቲ ሃ ኡያናዉ አሞትድ፥ "ቤተለመ ፐንግያ ማታን ደእያ ፑልቶ ሃፈ ታና ኡሻናይ ኦነ!" ያግስ። 18 ሄ ምኖ አሳት ፍልስፄመት ዱንካንዳ በሳ ካን ብድ ቤተለመ ፐንግያ ማታን ደእያ ፑልቶ ሃፈ ዱቅድ ዳዊታስ ኤህዶሶና። ሽን ዳዊቲ ኡዮና እፅድ ሃ ጎዳ ስንን ትግስ። 19 "ሀ ሃ ኡሽ ታፐ ሃኮ! ባንታ ሸምፑዋ ባይዝድ ኤህዳ ሀ አሳታ ሱ ታኒ ኡዮ? ኤንቲ ባንታ ሸምፑዋ አድ እምድ ኤህዶሶና" ያግስ። ሄሳ ግሾ፥ ዳዊቲ ሃ ኡይቤና። ሄ ምኖ አሳት ሄሳ ኦዶሶና።

20 እዮኣባ እሻይ አብስ ሀስታሙ ኦላንቾታስ ሀላቃ። እ ባ ቶራን ሄ ፄቱ አሳ ዎድ፥ እካ ሀ ሄታዳ ኤረትዳ አስ ግድስ። 21 አብስ ሄታራ ታይበቶና እፅኮካ፥ እ ሄታፐ አድ ቦንቸትዳ አስ፤ እ ኤንታዉ ሀላቃ ግድስ።

22 ቃብፄላ አደይ ዮዳሄ ናአይ ባናይ ምኖ አስ፤ እ ምኖ ኦሶ ኦስ። እ ናምኡ ኤረትዳ ሞአበ አሳታ ዎስ። ቃስ ሻች ዎዳ እስ ጋላስ ኦላ ግዶ ገልድ ጋሞ ዎስ። 23 ባናይ እቻሹ ዋ ግድያ ግብፀ አድያ ዎስ። ግብፀ አድያ ኩሸን ዋንዳራሸ መላ ቶር ደኤስ፤ ሽን ባናይ ፃምአ ኦይክድ አድያኮ ብድ እያ ኩሽያን ደእያ ቶራ ዳፍ ኤክድ እያ ቶራን እያ ዎስ። 24 ዮዳሄ ናአይ ባናይ ሀይሳ ኦስ። እያ ሱንይ ሄ ሄታይሳዳ ኤረትስ። 25 እ ሀስታማታ ግዶን ዳሮ ቦንቸትስ፤ ሽን እ ሄታ ታይቡዋን ዴና። ዳዊቲ እያ ባና ናገይሳታ ሀላቃ ኦስ።

26 ምኖ አሳት እዮኣባ እሻ አሳሄላ፥ ቤተለመ አድያ ዶዳ ናኣ ኤልያና፥ 27 ሀሮዳ አድያ ሳሞታ፥ ፕሎና አድያ ሰለሳ፥ 28 ተቁሄ አድያ ኤስካ ናኣ እራ፥ አናቶታ አድያ አብኤዘራ፥ 29 ኩሳታ አድያ ሳባካ፥ አሆሀ አድያ ኤላያ፥ 30 ናፆፋ አድያ ኖኤራነ ባናሀ ናኣ ሄለዳ፥ 31 ብንያመን ደእያ ግብአ አድያ ራባያ ናአ ኤታያ፥ ፕርአቶና አድያ ባናያሳ፥ 32 ጋኣሳ ዛንጋራ ማታፐ ይዳ ኡራያ፥ አራባ አድያ አብኤላ፥ 33 ባርሁማ አድያ አዝሞታ፥ ሳአልቦና አድያ አብኤላ፥ 34 ግዞና አድያ ሀሰማ፥ ሀራራ አድያ ሻገ ናአ ዮናታና፥ 35 ሀራራ አድያ ሳካራ ናአ አህኣማ፥ ኡረ ናኣ ኤልፋላ፥ 36 ማኬራ አድያ ሄፌራ፥ ፕሎና አድያ አክያ፥ 37 ቃርመሎሳ አድያ ሄፅራ፥ ኤዝባያ ናኣ ናእራያ፥ 38 ናታና እሻ እዩኤላ፥ ሀግራ ናኣ ምብሃራ፥ 39 አሞነ አድያ ፀለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ አድያ ናህራያ፥ 40 ያትራ አድያ እራነ ጋሬባ፥ 41 ህተ አድያ ኦርዮና፥ አህላያ ናኣ ዛባዳ፥ 42 ሮቤላ ኮቸ ግድዳ ሺዛ ናኣ አድና። እ ሮቤላ ኮቻታ ሀላቃ፤ ሀስታማት እያራ እስፈ ደኦሶና። 43 ሀራ ምኖ አሳት ማእካ ናኣ ሀናና፥ ምታነ አድያ እዮሳፈፃ፥ 44 አስታሮታ አድያ ኦዝያና፥ አሮኤራ አድያ ሆታማ ናይታ ሻማአነ ይኤላ፥ 45 ሽምራ ናኣ ይድኤላነ እያ እሻ ቲፃ አድያ ዮሀ፥ 46 ማሃዋ አድያ ኤልኤላ፥ ኤልናማ ናይታ ይርባያነ ዮሻዋ፥ ሞአበ አድያ ይትማ፥ 47 ፆባ አድያ ኤልኤላ፥ ኦቤዳነ ያእስኤላ።