እስራኤለ ቶራ ሞጮናታ
1 ባንታ ጩጋን ጩጋን ካዎተ አይስያ እስራኤለ ሶ አሳ ሀላቃት፥ ሻላቃትነ ማቶ ሀላቃት ሀይሳፈ ካልድ ፃፈትዳይሳታ። እስ እስ ጩጋን 24,000 አሳት ደኦሶና። እስ እስ ጩጋይ ላይን እስ አጌና ማራን ማራን ካዎተ ኦሶ ኦናዉ ከዬስ።
2 ኮይሮ አጌናን ከያ ጩጋ ካለይ ዛብድኤላ ናኣ ያሾብኣማ፤ እያ ጩጋን 24,000 አስ ደኤስ። 3 ያሾብኣም ፓረሳ ኮቸ፤ እ ኮይሮ አጌናስ ቶራ ሞጮናታ።
4 ናምአን አጌናን ከይያ ጩጋ ካለይ አሆሀ አድያ ዶዳያ፤ እያ ጩጋን 24,000 አስ ደኤስ። ሄ ጩጋ ካለያ ናምአን ሀላቃይ ምክሎታ።
5 ሄን አጌናን ከይያ ጩጋ ካለይ ካህንያ ዮዳሄ ናኣ ባናያ፤ እያ ጩጋን 24,000 አስ ደኤስ። 6 ባናይ ሀስታሙ ኤረትዳ አሳታ ግዶን ምኖ አስ፤ ቃስ ሀስታማታ ሀላቃ። እያ በሳን እያ ናአይ አምዛባድ ሀላቃ ግድስ።
7 ኦይዳን አጌናን ከይያ ጩጋ ካለይ እዮኣባ እሻ አሳሄላ፤ እያ ጩጋን 24,000 አስ ደኤስ። እያ በሳን እያ ናአይ ዛባድ ሀላቃ ግድስ።
8 እቻሻን አጌናን ከይያ ጩጋ ካለይ ይስሃራ ያራፐ ሻምሁታ፤ እያ ጩጋን 24,000 አስ ደኤስ።
9 ኡሱፑን አጌናን ከይያ ጩጋ ካለይ ተቁሄ አድያ እስካ ናኣ እራ፤ እያ ጩጋን 24,000 አስ ደኤስ።
10 ላፑን አጌናን ከይያ ጩጋ ካለይ ኤፍሬማ ኮቸ ግድዳ ፕሎና አድያ ሰለሳ፤ እያ ጩጋን 24,000 አስ ደኤስ።
11 ሆስፑን አጌናን ከይያ ጩጋ ካለይ ሁሻ አድያ ስባካያ፤ እያ ጩጋን 24,000 አስ ደኤስ። ስባካይ ይሁዳ ኮቸነ ዛራ ያራ።
12 ኡዱፉን አጌናን ከይያ ጩጋ ካለይ ብንያመ ኮቸ ግድዳ አናቶተ አድያ አብኤዘራ፤ እያ ጩጋን 24,000 አስ ደኤስ።
13 ታማን አጌናን ከይያ ጩጋ ካለይ ናፆፋ አድያ ዛራ ያራ ግድዳ ማህራ፤ እያ ጩጋን 24,000 አስ ደኤስ።
14 ታማነ እስን አጌናን ከይያ ጩጋ ካለይ ኤፍሬማ ኮቸ ግድዳ ፕርአቶና አድያ ባናያ፤ እያ ጩጋን 24,000 አስ ደኤስ።
15 ታማነ ናምአን አጌናን ከይያ ጩጋ ካለይ ጎቶንያላ ያራፐ ግድዳ ናፆፋ ሄልዳያ፤ እያ ጩጋን 24,000 አስ ደኤስ።
እስራኤለ ሞርናታ
16 እስራኤለ ኮቻታ አይሳናዉ ሹመትዳይሳት ሀይሳፈ ካልድ ፃፈትዳይሳታ።
ሮቤላ ኮቻ አይሰይ ዝክራ ናኣ አላዛራ።
ስሞና ኮቻ አይሰይ ማእካ ናኣ ሳፋፃ።
17 ሌወ ኮቻ አይሰይ ቃሙኤላ ናኣ ሀሳባያ።
አሮና ኮቻ አይሰይ ሳዶቃ።
18 ይሁዳ ኮቻ አይሰይ ዳዊታ እሻ ኤልሁ።
ይሳኮራ ኮቻ አይሰይ ምካኤላ ናኣ ኦምራ።
19 ዛብሎና ኮቻ አይሰይ አብድዩ ናኣ ያሽማያ።
ንፍታለመ ኮቻ አይሰይ አዝርኤላ ናኣ ያርሞታ።
20 ኤፍሬማ ኮቻ አይሰይ አዛዛ ናኣ ሆሰአ።
ምናሰ ኮቻፈ ባጋ አይሰይ ፓዳያ ናኣ እዩኤላ።
21 ጋላዳን ደእያ ምናሰ ኮቻፈ ባጋ አይሰይ ዛካርያሳ ናኣ እዶ።
ብንያመ ኮቻ አይሰይ አበኔራ ናኣ የእስኤላ።
22 ዳነ ኮቻ አይሰይ ይሮሃማ ናኣ አዛርኤላ።
ሀይሳቲ እስራኤለ ኮቻ አይሰይሳታ።
23 ጎዳይ እስራኤለ አሳ ሳሎ ፆልንቶዳ ዳርሳና ግዳ ግሾ ዳዊቲ ላታሙ ላይነ እያፐ ጋርሳራ ደኤይሳታ ታይቦን ገልስቤና። 24 ፃሩያ ናአይ እዮኣብ አሳ ታይቦ ዶምድ ዉርሶና አግስ። አሳ ታይብዳ ግሾ ጎዳይ እስራኤለ አሳ ቦላ ሀንቀትዳ ግሾ ኤንታ ታይቦይ ካዋ ዳዊታ ታርከ ማዝጋበን ፃፈትቤና።
ካዋ ቡቁራ አይስያ አሳታ
25 ካዎ ቡቁራ ምንጅያ በሳ አዋተን አይስያ አሳ ሱንይ ሀይሳፈ ካልድ ፃፈትዳይሳታ። አድኤላ ናኣ አዝሞት ካዎ ኬ ቡቁራ አዋተን አይሴስ።
ኦዝያና ናአይ ዮናታን ጋፃረን፥ ካታማንነ ጉታን ደእያ ካዎ ኬ ሚሸታ አዋተን አይሴስ። 26 ካሉባ ናአይ እዝር ጎሻንቾታ አዋተን አይሴስ። 27 ራማ አደይ ሳመእ ዎይነ ጋደታ አዋተን አይሴስ። ሳፋማ አደይ ዛብድ ዎይነ ኡሻ ምንጅያ ኬ አዋተን አይሴስ።
28 ጋዳራ አደይ ባአል-ሀናን ዙማ ቦላ ደእያ ዛይተ ሻማሁዋነ ቦባ አዋተን አይሴስ። ዛይተ ዎያ ኬ አዋተን አይሰይ እዮኣሳ። 29 ሳሮና ደንባን ሄመትያ መህያ አዋተን አይሰይ ሳሮና አድያ ሳፅራ። ዛንጋራን ሄመትያ መህያ አዋተን አይሰይ አድላያ ናኣ ሻፋፃ። 30 ግማለታ አዋተን አይሰይ እስማኤላ አድያ ኡብሳ። ሀረታ አዋተን አይሰይ መሮኖታ አድያ የህዳያ። 31 ዶርሳታነ ዴሻታ አዋተን አይሰይ አጋራ አደይ ያዝዛ። ሀይሳቲ ኡባይ ዳዊታ ሻሉዋ ቦላ አዋተይሳታ።
32 ዳዊታ አዋ እሻይ፥ ፃፈይ ዮናታን አኬካነ ካዋ ዞርያ አስ። ሀክሞና ናአይ ይኤል ካዋ ናይታ ታማርሴስ። 33 አክፆፈል ካዋ ዞረይሳ። አርካ አደይ ኩስ ካዋ ላገ። 34 አክፆፈል ሀይቅን፥ እያ በሳን ባናያ ናአይ ዮዳሄይነ አብያታር ካዋ ዞርያ አስ ግድዶሶና፤ እዮኣብ ካዋ ቶራ ሞጮና።