1 ታርከ ማፃፋ 15

ታቦተይ የሩሳላመ ስምስ

1 ዳዊቲ ባ ካታማን ባዉ ኬ ኬፅስ፤ ፆሳ ታቦትያስ በሰ ጊግስድ፥ ዱንካነ ኤስስ። 2 ዳዊቲ፥ "ፆሳ ታቦትያ ቶካናዳነ መርናዉ ፆሳስ ኦናዳ ጎዳይ ዶርዳይ ሌወታ ግድያ ግሾ ሀር ኦንካ ፆሳ ታቦትያ ቶካናዉ በሰና" ያግስ። 3 ዳዊቲ ጎዳ ታቦትያስ ጊግስዳ በሳ ታቦትያ ኤሀና መላ እስራኤለ አሳ ኡባ የሩሳላመ ሺሽስ። 4 ካልድ ዳዊቲ አሮና ኮቻታነ ሌወታ ፄግድ ሺሽስ። 5 ቃሃታ ያራፐ ሀላቃይ ኡርኤልነ እስ ፄታነ ላታሙ እያ ዳቦት ይዶሶና። 6 ማራራ ያራፐ ሀላቃይ አሳይነ ናምኡ ፄታነ ላታሙ እያ ዳቦት ይዶሶና። 7 ገድሶና ያራፐ ሀላቃይ እዩኤልነ ፄታነ ሀስታሙ እያ ዳቦት ይዶሶና። 8 ኤልዛፋና ያራፐ ሀላቃይ ሻማእነ ናምኡ ፄቱ እያ ዳቦት ይዶሶና። 9 ከብሮና ያራፐ ሀላቃይ ኤልኤልነ ሆስፑን ታሙ እያ ዳቦት ይዶሶና። 10 ኡዝኤላ ያራፐ ሀላቃይ አምናዳበይነ ፄታነ ታማነ ናምኡ እያ ዳቦት ይዶሶና።

11 ዳዊቲ ካህነታ ሳዶቃነ አብያታራ፥ ሌወታ ኡርኤላ፥ አሳያ፥ እዩኤላ፥ ሻማአ፥ ኤልኤላነ አምናዳበ ፄግስ። 12 ኤንታኮ፥ "ህንተ ሌወ ኮቻስ ሀላቃታ። ጎዳ እስራኤለ ፆሳ ታቦትያ ታኒ ጊግስዳ በሳ ኤሀናዉ ህንተነ ህንተ ዳቦት ጌይተ። 13 ህንተ ሌወት ኮይሮ ፆሳ ታቦትያ ቶክቦና ግሾነ ኑኒ እያ ዎጋ መላ ዋት ኤፋነኮ ፆሳ ኦይችቦና ግሾ፥ ጎዳይ ኑ ፆሳይ ኑና ሴርስ" ያግስ።

14 ጎዳ እስራኤለ ፆሳ ታቦትያ ኤሀናዉ ካህነትነ ሌወት ባንታና ጌሽዶሶና። 15 ጎዳይ ሙሰ ባጋራ ካሰ ኪትዳይሳዳ ሌወት ፆሳ ታቦትያ ባንታ ሀሽያን ካሶራ ቶክዶሶና።

16 ዲ፥ ማስንቆነ ዳላ ካእሸ ኡፋይሳ የ የፃና መላ ባንታ ዳቦ ግድዳ ሌወታፐ ዛማረታ ሹማና መላ ዳዊቲ ኪትስ። 17 ሌወት እዩኤላ ናኣ ሄማና፥ እያ ዳቦታፐ ባራካ ናኣ አሳፋነ ኤንታ ዳቦታፐ ማራራ ያራ ቁሳያ ናኣ ኤታና ሹምዶሶና። 18 ቃስ ናምአን ደን ዛካርያሳ፥ ያዝኤላ፥ ሻምራሞታ፥ ይኤላ፥ ኡና፥ ኤልኣባ፥ ባናያ፥ ማእሰያ፥ ማትታ፥ ኤልፋላ፥ ምቅነያነ ፐንገ ናግያ አብድዩነ ይኤላ ሹምዶሶና።

19 ናሰ ዳላ ቃና መላ ሄማን አሳፍነ ኤታን ሹመትዶሶና። 20 ቃስ ዛካርያስ፥ ያእዝኤል፥ ሻምራሞት፥ ይኤል፥ ኡን፥ ኤልኣብ፥ ማእሰይነ ባናይ ማስንቆ ካኦሶና። 21 ማትታ፥ ኤልፋል፥ ምቅነይ፥ አብድዩይ ይኤልነ አዛዘይ ዲ ዲፆሶና።

22 ሌወታ ሀላቃይ ካናነይ ማዝሙረ ኤርያ ግሾ ኤንታ ካለናዉ ሹመትስ። 23 ባራክነ ኤልቃን ታቦትያ ዱንካንያ ፐንግያ ናጋናዉ ዶረትዶሶና። 24 ካህነት ሳባን፥ እዮሳፈፅ፥ ናትናኤል፥ አማሳይ፥ ዛካርያስ፥ ባናይነ አላዛር ፆሳ ታቦትያ ስንን ሞይዘ ፑናናዉ ዶረትዶሶና። ኦቤድ-ኤዶመይነ ይሄይ ታቦትያ ናጋናዉ ዶረትዶሶና።

25 ዳዊቲ፥ እስራኤለ ጭማትነ ሻላቃት ጎዳ ጫቆ ታቦትያ አብዳራ ሶፐ ኤሀናዉ ኡፋይትሸ ብዶሶና። 26 ጎዳ ጫቆ ታቦትያ ቶክዳ ሌወታ ፆሳይ ማድዳ ግሾ ኤንቲ ላፑን ኮርማነ ላፑን ማራዘ ያርሽዶሶና። 27 ዳዊቲ፥ ታቦትያ ቶክዳ ሌወት፥ ማዝሙረ የፀይሳትነ ኤንታ ሀላቃይ ካናነይ ሊኖፐ ኦሰትዳ ማኦ ማእዶሶና። ዳዊቲካ ሊኖፐ ኦሰትዳ ኤፉደ ማእስ። 28 ሄሳዳ ኦድ፥ እስራኤለ ኡባይ ኡፋይትድ ሞይዘነ ዛየ ፑንሸ፥ ዳላ ቃሸ፥ ዲነ ማስንቆ ካእሸ ጎዳ ጫቆ ታቦትያ ኤህዶሶና።

29 ጎዳ ጫቆ ታቦተይ ዳዊታ ካታማ ገልዳ ዎደ ሳኦላ ናእያ መልኮላ ካዎይ ዳዊቲ ኡፋይትድ ዱርሽንነ ካእሽን ማስኮተራ በአዳ ባ ዎዛናን ካሱ።