ዳዊቲ አሳ ታይብስ
(2 ሳሜ 24:1-25)
1 ፃለሄይ እስራኤለ ቦላ መቶ ኤሀናዉ ኮይድ፥ ዳዊቲ እስራኤለ አሳ ታይባና መላ ደንስ። 2 ዳዊቲ እዮኣባኮነ ቶራ ሞጮናታኮ፥ "ዳነፐ በርሳበ ጋካናዉ ብድ፥ እስራኤለ አሳ ታይብተ። ያትድ፥ አሳ ታይቦይ አፑነኮ ታና ኤርስተ" ያግስ።
3 ሽን እዮኣብ፥ "ጎዳይ፥ ሀ ደእያ ባ አሳ ቦላ ፄቱ ኩሸ ጉጆ! ታ ጎዳዉ፥ ካዋዉ፥ ኤንቲ ኡባይ ታ ጎዳ አይለታ ግዶኮናዬ? ታ ጎዳይ ሄሳ መላባ ኦናዉ አይስ ኮዪ? እስራኤለ ቦላ አይስ ባላ ኦይ?" ያግስ። 4 ሽን ካዋ ቃላይ እዮኣባ ፆንን፥ እዮኣብ ከይድ እስራኤለ ቢታ ኡባ ዩይድ የሩሳላመ ስምስ። 5 እዮኣብ ታይብዳ አሳ ታይቡዋ ዳዊታስ እሚስ። እስራኤለ ቢታ ኡባን ማሻን ኦለታናዉ ዳንዳእያ እስ 1,100,000 አሳት ደኦሶና። ቃስ ይሁዳ ቢታን ማሻን ኦለታናዉ ዳንዳእያ 470,000 አሳት ደኦሶና። 6 እዮኣብ ካዋ ኪታ ዶስቦና ግሾ ሌወታነ ብንያመ ኮቻታ ታይቤና።
7 ፆሳይ ሄሳን ኡፋይትቦና ግሾ እስራኤለ ሴርስ። 8 ዳዊቲ ፆሳኮ፥ "ታኒ ሀይሳን ግታ ናጋራ ኦስ። ሽን ሀእ ነና ዎሳይስ፤ ነ አይልያ ናጋራ አቶ ጋ፤ ታኒ ዳሮ ኤያባ ሀናስ" ያግስ።
9 ጎዳይ ዳዊታ ቆንጨ በእያ ጋደኮ ሀይሳዳ ያግስ፤ 10 "ባዳ ዳዊታኮ፥ ጎዳይ፥ ‘ታኒ ነና ሄ ዶሮ በሳይስ፤ ታኒ ነ ቦላ ኦና መላ ኤንታፈ ታዉ እሱዋ ዶራ’ ያጌስ" ያጋ።
11 ጋድ ዳዊታኮ ብድ፥ "ጎዳይ ሀይሳታፐ እሱዋ ዶራ ያጌስ፤ 12 ሄ ላይ ኮሻ ዎይኮ ሄ አጌና ነ ሞርከታ ኩሸን አዳ እመታናይሳ ዎይኮ ሄ ጋላስ ጎዳ ማሻይ ነ ቢታ ሾጫናይሳነ ጋዶ እስራኤለ ቦላ ኤህያ ሀይቆ ኪታንቾ ኪተይሳፈ አዉሳ ዶራይ? ታና ኪትዳይሳስ ኦዳናባ ታዉ ኦዳ" ያግስ።
13 ዳዊቲ ጋደኮ፥ "ታኒ ዳሮ ኡንኤታስ። ጎዳ ማሮታይ ግታ ግድያ ግሾ ታኒ እያ ኩሸን ኩንዳና፤ አሳ ኩሸን ኩንድከ" ያግስ።
14 ሄሳ ግሾ፥ ጎዳይ እስራኤለ ቦላ ጋዶ የድን፥ 70,000 እስራኤለ አሳት ሀይቅዶሶና። 15 ፆሳይ የሩሳላመ ይሳናዉ ኪታንቾ ኪትስ። ሽን ኪታንቾይ የሩሳላመ ይሳናዉ ዶምዳ ዎደ ጎዳይ አዛንስ። ይስያ ኪታንቹዋኮ፥ "አጋ! ህዛ ግዳና!" ያግስ። ሄ ዎደ ጎዳ ኪታንቾይ ያቡሰ አድያ ኦርና ዉዱማ ማታን ኤቅስ።
16 ኪታንቾይ ባ ማሻ ባ ኩሸን ኦይክድ የሩሳላመ ይሳናዉ ሳአፐነ ሳሎፐ ግዶን ኤቅዳይሳ ዳዊቲ በእስ። ሄ ዎደ ዳዊቲነ ጭማት ካዮ ማኦ ማእድ፥ ሳአን ጉፋንዶሶና። 17 ዳዊቲ፥ "አሳይ ታይበታና መላ ኦዳይ ታና ግድክና? ናቅዳይነ ኢታባ ኦዳይ ታና። ሽን ሀ ዶርሳት አይ ኦዶና? አቤት ጎዳዉ፥ ታ ፆሳዉ፥ ሀያና ነ ኩሸይ ታናነ ታ ሶ አሳ ሴሮ። ነ ኩሸይ ነ አሳ ሴሮፖ!" ያግስ።
18 ጎዳ ኪታንቾይ ጋደኮ ሀይሳዳ ያግስ፤ "ዳዊቲ ያቡሰ አድያ ኦርና ዉዱማ ብድ ጎዳስ ያርሾ በሲ ግምባና መላ ኦዳ" ያግስ። 19 ጎዳ ሱንን ጋድ ኦድዳይሳ ስእድ ዳዊቲ ብስ።
20 ሄ ዎደ ኦርንነ እያ ኦይዱ አደ ናይት ዉዱማን ግስተ ቆፆሶና። እ ጉየ ስሚድ ኪታንቾ በእስ፤ እያራ ደእያ ኦይዱ ናይት በእድ ቆሰትዶሶና። 21 ዳዊቲ ኦርናኮ ይዳ ዎደ ኦርን እያ በእድ፥ ዉዱማፈ ጋፃ ከይድ ዝግድ ሳሮስ።
22 ዳዊቲ፥ "ጋዶይ አሳ ቦላፈ ክቻና መላ ታኒ ጎዳስ ያርሾ በሲ ኬፃና መላ ነ ዉዱማ ታዉ ባይዛ። ታኒ ነዉ ኩመ ጋትያ ቃንፃና" ያግስ።
23 ኦርን፥ "ኤካ፤ ታ ጎዳይ ካዎይ ባና ኡፋይስያባ ኦ። ሄኮ፥ ቦራት ፁሳ ያርሾስ፥ ካ ቡክያ ሚሽያ ኤናዉ፥ ግስተ ካ ያርሾስ እማና። ታኒ ሀ ኡባ ነዉ እማና" ያግስ።
24 ሽን ካዎይ ዳዊቲ፥ "አካይ፥ ታኒ ኩመ ጋተ ቃንፃዳ ሻማና። ታኒ ነባነ ታ ሚሸን ሻሞናባ ኤካዳ ፁሳ ያርሾ ኦዳ ጎዳስ ያርሽከ" ያግስ።
25 ዳዊቲ ዉዱማ ኡሱፑን ፄቱ ዎርቃ ሳንትመን ሻምስ። 26 ዳዊቲ ያን ጎዳስ ያርሾ በሲ ኬፅስ። ያትድ ፁሳ ያርሾነ እስፈተ ያርሾ ያርሽስ። ጎዳ ዎስን፥ ጎዳይ ፁሳ ያርሹዋ ቦላ ሳሎፐ ታማ የድድ እያዉ ዛርስ።
27 ጎዳይ ኪታንቹዋ ኪትን፥ ኪታንቾይ ባ ማሻ ሾሁዋን ዛርስ። 28 ዳዊቲ፥ ጎዳይ እያ ዎሳ ዛርዳይሳ በእድ፥ ያቡሰ አድያ ኦርና ዉዱማን ዛሪድ ያርሽስ። 29 ሙሰይ መላ ቢታን ጊግስዳ፥ ጎዳ ዱንካነይነ ፁሳ ያርሾ በሳይ ሄ ዎደ ጋባኦናን ጎይንያ ቃ በሳን ደኤስ። 30 ሽን ዳዊቲ ጎዳ ኪታንቹዋ ማሻ ያይዳ ግሾ ፆሳ ኦይቻናዉ ሄ በሳ ባናዉ ዳንዳእቤና።