1 ዳዊታስ ሀይቅያ ዎደይ ማትን፥ ባ ናኣ ሶሎሞነ ሀይሳዳ ያግድ ኪትስ፤ 2 "ታ ሀይቅያ ዎደይ ማትስ። ሄሳ ግሾ፥ ምና፤ አሰ ግዳ። 3 ጎዳይ ነ ፆሳይ ኪትዳባ ናጋ፤ እያ ኦግያን ሄመታ፤ ሙሰ ማፃፋን ፃፈትዳ እያ አዋጁዋ፥ እያ ኪታ፥ እያ ህግያነ እያ ዎጋ ናጋ። ሄሳ ነ ኦኮ፥ ነ ኦያባ ኡባይነ ነ ብያ በሳ ኡባይ ነዉ እንጀታና። 4 ጎዳይ፥ ‘ነ ኮቻት ባንታ ደኡዋን ናገትድ ደእኮ፥ ኤንቲ ታ ስንን ባንታ ኩመ ዎዛናፐነ ባንታ ኩመ ሸምፑዋፈ አማነትድ ሄመትኮ፥ እስራኤለ አራታን ኡትያ አስ ነዉ የና’ " ያግዳ ኡፋይሳ ቃላ ታዉ ፖላና።

5 ጉጅድካ፥ "ፃሩያ ናአይ እዮኣብ እስራኤለ ናምኡ ቶራ ሞጮናታ ኔራ ናኣ አበኔራነ የተራ ናኣ አማሳ ዎድ፥ እ ኦዳባ ነ ኤራሳ። ሄስካ፥ ኦል ባይናሽን ሳሮ ዎደ ኤንታ ዎድ፥ ሄ ሱን ባ ፄሳ ሳቅያነ ባ ቶሁዋ ጫማ ትይስ። 6 ነ እያ ነ ጭንጫተዳ ኦ፤ እ ጬግድ ሳሮ ሀይቃናዳ ኦፋ።

7 "ሽን ታኒ ነ እሻ አበሰሎመፐ ባቃትያ ዎደ ኤንቲ ታዉ ምየ ግድዳ ግሾ፥ ጋላዳ ቢታን ደእያ ባርዝለ ናይታስ ኬሀባ ኦ፤ ኤንቲ ነ ጋይታፐ ምያ አሳራ ሞ።

8 "ታኒ ማሀናይማ ካታማ ብዳ ዎደ ታና ኢታ ባደ ባድዳ ብንያመ ቢታን ብራቅማ ካታማፐ ይዳ ጌራ ናኣ ሳም ኔራ ደኤይሳ ቆፓ። እ ታራ ጋሄታናዉ ዮርዳኖሰ ሻፋ ይዳ ዎደ፥ ‘ታ ነና ዎከ’ ጋዳ ጎዳን እያዉ ጫቃስ። 9 ሽን ሀእ ኔኒ እያ ፅሎ አሳዳ ታይቦፓ። ነ ጭንጫ አስ ግድያ ግሾ አይ ኦነኮ ኤራሳ። ነ ሄ ጭማ አድያ ሱራ ሞጋ" ያግስ።

10 ዳዊቲ ሀይቅድ፥ ባ ማይዛታን ጋሄትስ፤ ባ ካታማን ሞገትስ። 11 ዳዊቲ እስራኤለ ቦላ ኦይታሙ ላይ ካዎትስ፤ ከብሮናን ላፑን ላይ፥ የሩሳላመን ሀስታማነ ሄ ላይ ካዎትስ። 12 ሶሎሞነይ ባ አዋ ዳዊታ አራታን ኡትስ፤ እያ ካዎተይ ዳሮ ምንስ።

13 ሃግታ ናአይ አዶንያስ፥ ሶሎሞነ አየ በርሳብኮ ብን በርሳባ፥ "ነ ታኮ ሳሮ ያዲ?" ያጋዳ እያ ኦይቻሱ።

እ፥ "ኤ፤ ሳሮ ያስ" ያግድ ዛርስ። 14 ጉጅድካ፥ "ታኒ ነና ኦይችያባይ ደኤስ" ያግስ።

እያ፥ "ኦይቻ" ያጋሱ።

15 አዶንያስ፥ "ካዎታናዉ በሰይ ታና ግደይሳነ እስራኤለ አሳ ኡባይ ታና ባንታዉ ካዎዳ ፄለይሳ ኔኒ፥ ነ ሁጰን ኤራሳ። ሽን ሀኖይ ፆሳፈ ግድዳ ግሾ ኦዳይ ላመትን ካዎተይ ታ እሻኮ ዩይስ። 16 ሀእ ታኒ ነና እስባ ኦይቻና። ሀያና ታና ዬላዮፓ" ያግስ።

እያ፥ "ኦይቻ" ያጋሱ።

17 እ፥ "ካዎይ ሶሎሞነይ ነና እፃስ ጌና፤ ሄሳ ግሾ፥ ሱናማ ማጫስዉ አብሶ ታዉ ማቾ ኦዳ ኤካና መላ ሀያና ታዉ እያ ኦይቻርክ" ያግስ።

18 በርሳባ፥ "ዳሮ ሎኦ፤ ታ ሄሳ ካዋስ ኦዳና" ያጋሱ።

19 ሄሳ ግሾ፥ በርሳበይ አዶንያሳ ኪታ ኦዳናዉ ሶሎሞነኮ ገልን፥ ካዎይ ደንድ ኤቅድ፥ እዉ ዝግስ። ባ አራታን ኡትስ፤ ባ አየስ ሀራ አራታ ኤህስድ፥ ባፐ ኡሻቻ ባጋን ኡትስስ።

20 በርሳባ፥ "ታ ነና እስ ጉባ ኦይችያባይ ደኤስ፤ ሀያና ታና ዬላዮፓ" ያጋሱ።

ካዎይ ዛሪድ፥ "ታ አየ፥ ኦይቻ። ታ ነና ዬላይከ" ያግስ።

21 እያ፥ "ሱናማ ማጫስዉ አብሶ ነ እሻይ አዶንያስ ማቾ ኦድ ኤካናዉ ኮይያ ግሾ እያዉ እማርክ" ያጋሱ።

22 ካዎይ ሶሎሞነይ ዛሪድ፥ "ሱናማ ማጫስዉ አብሶ ነ አዶንያስ አይስ ኦይቻይ? እ ታ ባይራ ግደኔ? ኔኒ እያዉ ካዎተ አይስ ኦይችኪ? ቃስ ካህንያ አብያታርነ ፃሩያ ናአይ እዮኣብ እያራ ደኦሶና ግዶኮና?"

23 ካዎይ ሶሎሞነይ ጎዳን ጫቅድ፥ "አዶንያስ ሀይሳ ኦይችዳ ግሾ ታኒ እያ ዎና እፅኮ፥ ጎዳይ ታና ፕርዶ! 24 ታና፥ ታ አዋ ዳዊቲ አራታን ኡትስድ፥ ታ ካዎተ ምን ኤስድ፥ ታ ኮቻታስ ባ ቃላ ፖልዳ ጎዳይ ኤርያ መላ፥ አዶንያስ ሀች ሀይቃና!" ያግስ። 25 ካዎይ ሶሎሞነይ ዮዳሄ ናአ ባናያ ኪትን፥ እ ብድ አዶንያሳ ሾጭድ ዎስ።

26 ሄሳፈ ጉየ፥ ካዎይ ሶሎሞነይ፥ ካህንያ አብያታራኮ፥ "ኔኒ ነ ቢታ አናቶታ ባ። ኔኒ ሀይቃናዉ በሳሳ፥ ሽን ታ ነና ዎከ። ኔኒ ታ አዋ ዳዊቲ ስንን ኡባ ሃርያ ጎዳ ታቦትያ ቶካዳሳ፤ ቃስ ታ አዋ መቱዋ ኡባ እያራ ኤካዳሳ" ያግስ። 27 ሶሎሞነይ፥ አብያታር ጎዳ ካህነ ግድዳ በሳፈ ድግድ፥ ጎዳይ ሴሎን ኤለ ሶ አሳስ ኦድዳ ቃላ ፖልስ።

28 አበሰሎመ እፅድ፥ አዶንያሳ ማድዳ እዮኣባ ሀ ኦዳይ ጋክን፥ ባቃትድ ጎዳ ዱንካንያኮ ብድ፥ ያርሾ በሳ ካጨታ ኦይክስ። 29 እዮኣብ ባቃትድ ጎዳ ዱንካንያኮ ብድ፥ ያርሾ በሳ ማታን ደኤይሳ ካዋ ሶሎሞነይ ስእዳ ዎደ፥ ዮዳሄ ናኣ ባናያ፥ "ባዳ እያ ዎ" ግድ ኪትስ። 30 ባናይ ጎዳ ዱንካንያ ግዶ ገልድ እዮኣባኮ፥ "ካዎይ ነና ሀ በሳፈ ከያ ጌስ" ያግስ።

ሽን እ ዛሪድ፥ "ከይከ! ታ ሀይሳን ሀይቃና" ያግስ።

ባናይ፥ ብድ እዮኣብ ግዳይሳ ካዋስ ኦድስ።

31 ካዎይ፥ "እ ግዳይሳዳ እያ ኦ፤ እያ ዎዳ ሞጋ! እዮኣብ ፅሎ አሳ ሱ ጉስዳ ዳፋፐ ታናነ ታ አዋ ሶ አሳ ጌሻሳ። 32 እ ጉስዳ ሱ አጩዋ ጎዳይ እያዉ ቃንፃና። እ፥ ታ አዋ ዳዊቲ ኤሮናሽን፥ ባፐ ፅሎ ግድዳ ናምኡ አሳታ ማሻን ዎስ። እስራኤለ ቶራ ሞጮናይ፥ ኔራ ናአይ አበኔርነ ይሁዳ ቶራ ሞጮናይ የተራ ናአይ አማስ፥ ሱረ አስ ሽን ዎስ። 33 እዮኣብ ሀ አሳታ ዎዳ ግሾ፥ ኤንታ ሱ አጮይ መርናዉ እዮኣባ ቦላነ እያ ኮቻ ቦላ ዎ። ዳዊቲ ቦላነ እያ ሶ አሳ ቦላ፥ እያ ኮቻ ቦላነ እያ አራታ ቦላ መርናዉ ጎዳ ሳሮይ ግዶ" ያግስ።

34 ሄሳ ግሾ፥ ዮዳሄ ናአይ ባናይ ከይድ፥ እዮኣባ ሾጭድ ዎን፥ እ መላ ቢታን ደእያ ባ ጋደን ሞገትስ። 35 ካዎይ ዮዳሄ ናኣ ባናያ እዮኣባ በሳን ቶራ ሞጮና ኦድ ሹምስ፤ ቃስ አብያታራ በሳን ካህንያ ሳዶቃ ሹምስ።

36 ሄሳፈ ጉየ፥ ካዎይ ሶሎሞነይ ሳማ ፄግድ፥ "ነዉ የሩሳላመን ኬ ኬፃዳ፥ ያን ደአ፤ ሀራ ሶ አዉካ ቦፓ። 37 ነ ካታማፐ ከያዳ፥ ቀድሮና ዛንጋራ ፕንዳ ጋላስ ሀይቃናይሳ ኤራ። ነ ሱ ጎመይ ነና ኦይካና" ያግስ።

38 ሳሚ ዛሪድ፥ "ኔኒ ገይስ ሎኦ፤ ታኒ ነ አይለይ ነ ታ ጎዳይ ካዎይ ግዳይሳዳ ኦና" ያግስ። ሳም የሩሳላመን ዳሮ ዎደ ደእስ።

39 ሽን ሄ ላይፈ ጉየ፥ ሳማ አይለታፐ ናምአት ማእካ ናኣ፥ ጋተ ካዋ አንኩሳኮ ብድ፥ "ነ አይለት ጋተን ደኦሶና" ግድ ሳማስ ኦድዶሶና። 40 እ ባ ሀርያ ኮርድ፥ ባ አይለታ ኮያናዉ አንኩሳኮ ጋተ ብድ፥ ያፐ ባ አይለታ ዛሪድ ኤህስ።

41 ሳሚ የሩሳላመፐ ጋተ ብድ ስምዳይሳ ሶሎሞነይ ስእዳ ዎደ፥ 42 ሳማ ፄግድ፥ "ኔኒ የሩሳላመፐ ሀራ ሶ ብዳ ዎደ ሀይቃናይሳ ኤራ" ጋዳ ታ ነና ጎዳን ጫቅሳብክና? ሄ ዎደ ኔኒ፥ "ነ ገይስ ሎኦ፤ ኤሮ፥ ታ ኪተታና" ጋዳሳ።

43 ያትን፥ "ጎዳን ጫቅዳ ጫቁዋነ ታ ኪታ አይስ ናጋብኪ? 44 ታ አዋ ዳዊታ ቦላ ነ ኦዳ ኢታ ኦሶ ኡባ ነ ዎዛናይ ኤሬስ። ነ ኦዳ ኢታ ኦሱዋ ጎዳይ ነዉ ዛራና። 45 ሽን ካዎይ ሶሎሞነይ አንጀታና፤ ዳዊታ አራታይ ጎዳ ስንን መርናዉ ሳሮ ዳና" ያግስ።

46 ካዎይ፥ ዮዳሄ ናኣ ባናያ ኪትን፥ እ ብድ፥ ሳም ሾጭድ ዎስ።

ያትን፥ ካዎተይ ሶሎሞነ ኩሸን ምንድ አትስ።