1 ሶረ ካዎይ በን-ሀዳድ ባ ኦላንቾታ ኡባ ሺሽስ። ሀስታማነ ናምኡ ካዎታን፥ ኤንታ ፓራታንነ ፓራ ጋረታን ማደትድ፥ ሳማረ ካታማ ተቅድ፤ እያ ኦልስ። 2 እስራኤለ ካዋ አካባኮ አሰ ኪትድ ሀይሳዳ ያግስ፤ 3 "ነ ብራይነ ነ ዎርቃይ ታባ፤ ነ ማቸትነ ነ ናይታፐ ሎኦት ታባ" ያግስ።

4 እስራኤለ ካዎይ ዛሪድ፥ "ኤ፥ ታ ጎዳዉ ካዋዉ፥ ነ ግዳይሳ መላ፤ ታካ ታዉ ደእያባ ኡባይ ነባ" ያግስ።

5 ቃስካ፥ ኪተትዳ አሳት ናምአን ብድ፥ "በን-ሀዳድ ሀይሳዳ ያጌስ፤ ‘ነ ብራነ ነ ዎርቃ፥ ነ ማቸታነ ነ ናይታ ታዉ ሼ’ ጋዳ ኪታስ። 6 ሽን ዎንቶ ሀኖደ ነ ካዎ ጋዋነ ነ ሞርናታ ኬ ፕልጋና መላ ታ ኦሳንቾታ የዳና። ኤንቲ ነ ሎኦባ ጋዳ ዎዳባ ኡባ ኤፋና" ያግዶሶና።

7 እስራኤለ ካዎይ ቢታ ጭማታ ኡባ ሺሽድ፥ "ሀ አደይ ኑና ይሳናዉ ኮየይሳ በእተ። እ ታ ማቸታነ ታ ናይታ፥ ታ ብራነ ታ ዎርቃ ኤካናዉ ኪትን፥ ታ እፃብከ" ያግስ።

8 ጭማትነ አሳ ኡባይ፥ "እ ኦድያባ ስኦፓ! ዎይኮ እያዉ ኤሮ ጎፓ" ያግዶሶና።

9 ሄሳ ግሾ፥ አካብ በን-ሀዳድ ኪትዳ አሳታኮ፥ "ህንተ ታ ጎዳ ካዋ፥ ‘ኔኒ ኮይሮ ኪትዳ ኪታ ታ ፖላና፤ ሽን ሀ ናምአን ኪታ ፖላናዉ ዳንዳእከ’ ያጌስ ግድ ኦድተ" ያግስ።

ኪተትዳ አሳት ብድ ሄሳ በን-ሀዳዳስ ኦድዶሶና። 10 በን-ሀዳድ፥ "ታና ካልያ አሳስ ሳማረ ካታማን እስ ኩጫ ቢት ጋክኮ ፆሳት ታና ፕርዶ" ያግስ።

11 እስራኤለ ካዎይ ኪተትድ ይዳይሳታኮ፥ " ‘ቱማ ኦላንቾይ ኦላፐ ስምሸ ጋይረስፐ አትሽን፥ ቡሮ ብሸ ጋይረና’ ያግድ ኦድተ" ያግስ።

12 በን-ሀዳድነ ካዎት፥ ባንታ ዱንካንያ ግዶን ኡሹ ኡይሸ ሄሳ ስእዳ ዎደ ካዎይ ባ ኦላንቾታኮ፥ "ኦላናዉ ሳልፕተ" ያግድ ኪትን፥ ኤንቲ ካታማ ኦላናዉ ሳልፕዶሶና።

13 ሄኮ፥ እስ ናበይ እስራኤለ ካዋ አካባኮ፥ "ጎዳይ ‘ሀ ዳሮ ኦላንቾታ ኡባ በአ? ታኒ ሀች ኤንታ ነ ኩሸን አዳ እማና፤ ታ ጎዳ ግደይሳ ኔኒ ሄ ዎደ ኤራና’ ያጌስ" ያግስ።

14 አካብ፥ "ኦላ ዶማናይ ኦኔ?" ያግስ።

ናበይ፥ "አዉራጃ ሃረይሳት ኪትያ ናአተ ኦላንቾት ዶሞ" ያግስ።

ካዎይ፥ "አትያ ኦላንቾታ ኦን ኪታኔ?" ያግስ።

ናበይ፥ "ኔኒ ኪታ" ያግስ።

15 ሄሳ ግሾ፥ አካብ አዉራጃ ሃረይሳት ኪትያ ናአተ ኦላንቾታ፥ 232 ሺሽስ። ቃስ 7,000 አትዳ እስራኤለ አሳ ሺሽስ።

16 በን-ሀዳድ ባና ማድዳ ሀስታማነ ናምኡ ካዎታራ እስፈ ዱንካንያን ኡትድ ኡሻን ማትዳሽን፥ ሴታ ጋላስ እስራኤለ ኦላንቾት ኦላስ ከይዶሶና። 17 አዉራጃ ሃረይሳት ኪትያ ናአተ ኦላንቾት ኮይሮ ከይድ ብዶሶና።

በን-ሀዳድ ፆሞሳና መላ ኪትዳ አሳት፥ "ሳማረፐ አሳይ ከይድ ዩሳ ቦላ ደኤስ" ያግድ ኦድስ።

18 በን-ሀዳድ፥ "ኤንቲ ስገታናዉ ይን፥ ዎይኮ ኦለታናዉ ይን፥ ኤንታ ፓፃ ኦይክተ" ያግስ።

19 አዉራጃ ሃረይሳት ኪትያ ናአተ ኦላንቾት ሳልፕድ፥ ካታማፐ ጋፃ ከይዶሶና፤ እስራኤለ ኦላንቾት ኤንታ ካልድ ከይዶሶና። 20 እሶይ እሶይ ባራ ኦላ ጋሄትዳ ሞርክያ ዎዶሶና። ሶረ አሳይ ባቃትን፥ እስራኤለ አሳት ካልድ የደዶሶና። ቃስ ሶረ ካዎይ በን-ሀዳድ ባ ፓራ አሳታራ ባ ፓራን ከስ ኤክድ ብስ። 21 እስራኤለ ካዎይ ኦላስ ከይድ፥ ፓራታነ ፓራ ጋረታ ድእስ፤ ሶረ አሳካ ዎ ቡስ።

22 ሄሳፈ ጉየ፥ ናበይ እስራኤለ ካዋኮ ብድ፥ "ባዳ ነና ምን። ኦናዉ በሲያባ አኬካዳ ኦ። ዎንቶ ላይ ቦነ ሶረ ካዎይ ነና ናምአን ኦላናዉ ያና" ያግስ።

23 ሶረ ካዋ ሞርናት እያ ሀይሳዳ ያግድ ዞርዶሶና፤ "ኤንታ ፆሳት ደረ ፆሳታ፤ ኤንቲ ኑና ፆንዳይ ሄሳ ግሾሳ። ሽን ኑ ኤንታራ ደንባን ኦለትያኮ ቱማ ኑ ኤንታ ፆናና። 24 ኔኒ እስባ ኦ፤ ሀስታማነ ናምኡ ካዎታ ኪትያ ሀላቃተፈ ደንዳ ኤንታ በሳን ሀራ ሀላቃታ ሹማ። 25 ኑኒ እስራኤለታራ ደንባን ኦለትድ ፆናናዉ ዳንዳአና መላ ነዉ ካሰ ዉርዳ ኦላንቾታ በሳን ኦላንቾታ፥ ፓራታ በሳን ፓራታ፥ ፓራ ጋረታ በሳን ፓራ ጋረታ ዎዳ ጊግሳ" ያግዶሶና። ካዎይ በን-ሀዳድ ኤንታ ዞርያ ኤክድ ሄሳዳ ኦስ።

26 ካልያ ላይ ቦነ በን-ሀዳድ ሶረ ኦላንቾታ ሺሽድ፥ እስራኤለታራ ኦለታናዉ አፌቃ ብስ። 27 እስራኤለ ኦላንቾት ሺቅድ፥ ሽንቀነ ኦላ ሚሸ ኤክድ፥ ኤንታራ ኦለታናዉ ናምኡ ጩጋ ግድድ ከይዶሶና። እስራኤለት ናምኡ ጉ ዴሻ ዉደ ዳንድ፥ ኤንታኮ ስሚድ ኡትዶሶና፤ ሽን ሶረት ጋፃርያ ኡባ ማእዶሶና።

28 እስ ፆሳ ናበይ እስራኤለ ካዋኮ ብድ፥ "ጎዳይ ሀይሳዳ ያጌስ፤ ‘ሶረ አሳይ፥ ፆሳይ ደረ ፆሰፈ አትሽን፥ ደምባ ፆሲ ግደና ያግዳ ግሾ፥ ሀ ዳሮ ኦላንቾታ ታኒ ነ ኩሸን አዳ እማና። ሄ ዎደ ታኒ ጎዳ ግደይሳ ኔንነ ነ አሳይ ኤራና’ " ያግስ።

29 ሶረትነ እስራኤለት ዎልኮ ስም ሳልፕድ፥ ላፑን ጋላስ ታክዶሶና። ላፑን ጋላሳን ኦላ ጋሄትዶሶና። እስራኤለት እስ ጋላሳን ሶረ አሳፐ 100,000 ቶሆ አሳ ዎዶሶና። 30 ኤንታፈ አትዳይሳት ከስ ኤክድ፥ አፌቃ ካታማ ገልዶሶና። ገልዳይሳታፐ 27,000 አሳ ቦላ ካታማ ድርሳ ግምበይ ኩንድድ ዎስ።

በን-ሀዳድ ካታማ ግዶ ባቃትድ፥ እስ ኬ ቆልአን ቆሰትስ። 31 እያ ሞርናት፥ "ሄኮ፥ እስራኤለ ካዎት፥ ማርያ ካዎታ ግደይሳ ኑ ስእዳ። ኑኒ ካዮ ማኦ ማእድ፥ ኑ ፄሳን ዎዶሮ ዳንጭድ፥ እስራኤለ ካዋኮ ቦስ፤ ኦን ኤር፥ እ ነና ፓፃ አሾና አገና" ያግዶሶና። 32 ኤንቲ ካዮ ማኦ ማእድ፥ ዎዶሮ ባንታ ፄሳን ዳንጭድ፥ እስራኤለ ካዋኮ ብዶሶና። እያኮ "ነ አይለይ በንሀዳድ፥ ታና ዎፓ ያግድ ዎሴስ" ያግዶሶና።

ካዎይ፥ "እ ሀኖ ጋካናዉ ፓፃ ደኢ? እ ታ እሻ" ያግስ።

33 አካብ ሎኦ ማላ ሃሳያ ዳንን፥ አሳት እያ ኦዳ ኤለስ ኤክድ፥ "ኤ፥ ነ እሻይ በንሀዳድ ፓፃ ደኤስ" ያግዶሶና።

እ ኤንታኮ፥ "ብድ እያ ሃ ኤክድ ዪተ" ያግስ። በንሀዳድ ይን፥ አካብ እያ ባ ፓራ ጋርያ ቦላ ከስድ ኡትስስ።

34 በንሀዳድ አካባኮ፥ "ታ አዋይ ነ አዋፐ ኤክዳ ካታማታ ታ ነዉ ዛራና። ታ አዋይ ሳማረን ግያ ኤስዳይሳዳ ነካ ዳማስቆን ግያ ኤሳ" ያግስ።

አካብ ዛሪድ፥ "ታኒ ሀ ጫቁዋ ጋሶያዳ ነና የዳና" ያግስ። እያራ ጫቅድ እያ የድስ።

35 ናበታ ጩጋፐ እስ አደይ፥ ጎዳይ ኪትን፥ እስ ባ ላገ ናብያኮ፥ "ታና ሾጫ" ያግስ፤ ሽን ሄ ናበይ ሾጮና እፅስ። 36 ሄ ናበይ እያኮ፥ "ኔኒ ጎዳ ኪታ እፅዳ ግሾ፥ ሄኮ፥ ነ ታፐ ሻከታዳ ብያ ዎደ ነና ጋሞይ ዎና" ያግስ። ናበይ እያፐ ሻከትድ ብያ ዎደ ጋሞይ ከይድ እያ ዎስ።

37 ናበይ ሀራ እስ አደ ደምድ፥ "ታና ሾጫ" ያግስ። አደይ እያ ሾጭን፥ ናበይ ማዱንፅስ።

38 ናበይ እያ ኦናተይ ኤረቶና መላ ጉሉንትድ ካዋ ናግሸ ኦገ ዶናን ኤቅስ። 39 ካዎይ አያ ዎደ፥ ናበይ ካዋ ፄግድ፥ "ታኒ ነ አይለይ ኦላን ደእሽን፥ ሄኮ፥ እስ አደይ ታኮ ይድ፥ ‘ሀ ድኤትዳ አድያ ናጋ። ሀ አደይ ይያባ ግድኮ፥ ነ ሸምፖይ እያ ሸምፑዋራ ጋደ ዎይኮ 3,000 ብራ ሳንትመ ቃንፃሳ’ ያግስ። 40 ታኒ ነ አይለይ ኦሶይ ዳርን፥ ያ ሃ ግሽን፥ አደይ ከስ ኤክድ ይስ" ያግስ።

እስራኤለ ካዎይ፥ "ኔኒ ነ ቦላ ፕርዳዳሳ" ያግስ።

41 ናበይ ባ ጉሉን ቃር የግያ ዎደ ናበታፐ እሱዋ ግደይሳ ካዎይ ኤርስ። 42 ናበይ ካዋኮ፥ "ጎዳይ፥ ‘ታኒ፥ እ ሀይቃናዉ በሴስ ያግዳ አድያ ነ የድዳ ግሾ፥ ነ ሸምፖይ እያ ሸምፑዋ በሳን፥ ነ አሳይ እያ አሳ በሳን ግዳና’ " ያግስ። 43 እስራኤለ ካዎይ ይሎትሸነ አዛንሸ ሳማረን ደእያ ባ ጋ ስምስ።