1 Samuel 13

ሳሜል ሳኦላ ሀንቀትስ

1 ሳኦል ካዎትያ ዎደ እያዉ ላይ ሀስታማ፤ እ እስራኤለ ቦላ ናምኡ ላይ ካዎትዳፐ ጉየ፥ 2 እስራኤለታ ግዶፈ ሄ ሙኩሉ አስ ዶርስ። ኤንታፈ ናምኡ ሙኩሉ አሳይ ምክማሳንነ ደረይ ዳርያ ቤተለ ቢታን ሳኦላራ ደኤስ። እስ ሙኩሉ አሳይ ቃስ ብንያመን ደእያ ግብአን ዮናታናራ ደኤስ፤ አትዳ አሳ ሳኦል ኤንታ ሶ ሶ የድስ።

3 ዮናታን ግብአን*13:3 ጋባኦናን ደእያ ፍልስፄመ ኦላንቾታ ኦልስ፤ ፍልስፄመ አሳይ ሄሳ ስእዶሶና። ሄሳፈ ጉየ፥ ሳኦል፥ "እብራወት ሀይሳ ስኦ" ግድ ቢታ ኡባን ሞይዘ ፑንስስ። 4 ሳኦል ፍልስፄመ አሳ ኦልድ ፆንዳይሳ እስራኤለ አሳይ ስእዶሶና፤ እስራኤለ አሳይ ፍልስፄመ አሳ ማታን እፀትዳይሳታ ግደይሳ ኤርዶሶና። እስራኤለ አሳይ ሳኦላ ካላናዉ ፄገትድ ጋልጋላን ሺቅዶሶና።

5 ፍልስፄመ አሳይ እስራኤለ አሳ ኦላናዉ ሄ ሙኩሉ ፓራ ጋረታራ፥ ኡሱፑን ሙኩሉ ፓራ አሳታራነ አባ ዶናን ደእያ ሻፈዳ ዳርዳ ኦላንቾታራ ሺቅዶሶና። ኤንቲ ብድ፥ ቤት-አዌናፐ ዶሎሀ ባጋራ ደእያ ምክማሳን ዙግድ ኡትዶሶና። 6 እስራኤለ አሳይ ሳእ ኤንታዉ ኢታ ግደይሳነ ኦላንቾት ዳጋምዳይሳ በእዳ ዎደ ጎንጎሎን፥ ቡረን፥ ዛላ ግዶን፥ ካካን፥ ሃ ኦላን ቆሰትዶሶና። 7 እብራወታፐ ጉት ዮርዳኖሰ ሻፋ ፕንድ፥ ጋደነ ጋላዳ ቢታ ብዶሶና። ሽን ሳኦል ጋልጋላን አትስ፤ እያራ ደእያ ኦላንቾት ኡባይ ያሻን ኮኮርዶሶና።

8 ሳኦል ሳሜል ኬርዳ ላፑን ጋላስ ጋካናዉ ጋምእስ፤ ሽን ሳሜል ጋልጋላ ይቤና፤ ያትን፥ ሳኦላራ ደእያ ኦላንቾት ላለተ ዶምዶሶና። 9 ሄሳ ግሾ፥ ሳኦል፥ "ፁሳ ያርሾነ እስፈተ ያርሾታ ታዉ ኤህተ" ያግድ፥ ፁሳ ያርሾ ያርሽስ። 10 ሳኦል ፁሳ ያርሹዋ ያርሽድ ፖልዳፐ ጉየ ሳሜል ይስ። ያትን፥ ሳኦል ሳሜላ ሞካናዉ ካረ ከይስ።

11 ሳሜል፥ "ሀ ኔኒ ኦዳባይ አይቤ?" ያግድ ሳኦላ ኦይችስ።

ሳኦል፥ "አሳይ ላለታናዉ ማትዳይሳ፥ ነካ ግዳ ዎድያን ያናዉ ጋምእዳይሳነ ፍልስፄመት ምክማሳን ሺቅዳይሳ ታኒ በአስ። 12 ሄሳ ግሾ፥ ‘ፍልስፄመት ታራ ኦለታናዉ ጋልጋላ ዎና ሀኖሶና፤ ታኒ ጎዳ ማዶ ኦይቻብከ’ ጋዳ ቆፓስ። ያትን፥ ፁሳ ያርሾ ያርሻናይስ ታዉ አቶናባ ግድስ" ያግድ ዛርስ።

13 ሳሜል፥ "ኔኒ ቦዛባ ኦዳሳ፤ ጎዳይ፥ ነ ፆሳይ ነዉ እምዳ ኪታ ናጋባካ። ኔኒ ናግዳኮ ጎዳይ ሀች ነ ካዎተ እስራኤለ ቦላ መርናዉ ምንናሽን። 14 ሽን ሀእ ነ ካዎተይ ጋምኤና፤ ኔኒ ጎዳ ኪታ ናጋቦና ግሾ፥ ጎዳይ ባ ዎዛናዳ ኦያ አስ ደምስ፤ ባ አሳ ካለና መላ እያ ዶርስ" ያግስ።

15 ሳሜል ጋልጋላፐ ደንድድ፥ ብንያመን ደእያ ግብአ ብስ። ሳኦል ባራ ደእያ አሳ ታይብን፥ አሳይ ኡሱፑን ፄቱ ግድስ። 16 ሳኦል፥ እያ ናኣ ዮናታንነ ኤንታራ ደእያ አሳይ ብንያመን ደእያ ግብአን ጋምእዶሶና፤ ፍልስፄመ አሳይ ምክማሳን ዱንካንዶሶና። 17 ፍልስፄመ ኦላንቾት ሄ ጩጋን ሻከትድ ከይዶሶና። ኤንታፈ እስ ጩጋይ ሹኣላ ቢታን ደእያ ኦፍራኮ ስሚድ ብስ፤ 18 ናምአንይ ቤት-ሆሮናኮ ብስ፤ ሄን ጩጋይ መላ ቢታ ስንን ደእያ ሳቦይማ ዛንጋራ ዱገ ፄልያ ዛዋ ኦግያ ኦይክድ ብስ።

19 ፍልስፄመ አሳይ፥ "እብራወት ማሸነ ቶራ ቆፆፎ" ግዳ ግሾ፥ እስራኤለ ቢታን ብራታ ቆፅያ አስ ባዋ። 20 ሄሳ ግሾ፥ እስራኤለ አሳይ ባንታ ማራሻ፥ ኮንተ፥ ካልታነ ባጫ ፖሽሳናዉ ፍልስፄመ ቦሶና። 21 ማራሻነ ኮንተ ፖሽሳናዉ ሆስፑን ግራመ ዴፅያ ብራ ቃንፆሶና፤ ካልታነ ፆፀ ፖሽሳናዉ ኦይዱ ግራመ ቃንፆሶና። 22 ሄሳ ግሾ፥ ኦላ ጋላስ ሳኦልነ እያ ናኣ ዮናታን አትሽን፥ ሀራታ ኩሸን ቶርነ ማሽ ባዋ። 23 ፍልስፄመ ጩጋይ ምክማሳ ፕን ባናዉ ከይስ።