1 ሳሜል ኦድዳ ቃላይ እስራኤለ ኡባ ጋክስ። እስራኤለት ፍልስፄማታራ ኦለታናዉ ከይዶሶና፤ እስራኤለት አበንኤዘራን ዱንካንን፥ ፍልስፄመት አፌቃን ዱንካንዶሶና። 2 ፍልስፄመት ጩጋን ጩጋን ግድድ፥ እስራኤለታራ ኦለታናዉ ደንድዶሶና፤ ኦላይ ምንዳ ዎደ ፍልስፄመት እስራኤለታ ፆንድ ኦይዱ ሙኩሉ ግድያ አሳ ዎዶሶና። 3 ኦላንቾት ዱንካንዳ ጉታ ስምዳ ዎደ እስራኤለ ጭማት፥ "ሀች ጎዳይ ኑና ፍልስፄመታ ኩሸን አይስ አድ እምዴ? ኑራ ባና መላነ ኑ ሞርከታ ኩሸፐ ኑና አሻና መላ ጎዳ ታቦትያ ሴሎፐ አነ ኤሆስ" ያግዶሶና። 4 ሄሳ ግሾ፥ አሳይ ሴሎ ኪትን፥ ክሩበታ ግዶን አራታን ኡትያ ኡባፈ ዎልቃማ ጎዳ ታቦትያ ኤህዶሶና። ኤል ናይት ናምአይ አፍናንነ ፍንሃስ ጫቆ ታቦትያራ ያን ደኦሶና።

5 ጎዳ ጫቆ ታቦተይ አሳይ ዱንካንዳ ጉታ ጋክዳ ዎደ እስራኤለ ኡባይ ቢት ቃፃና ጋካናዉ ባንታ ቃላ ቁ ኦድ፥ "ጎዳ ጫቆ ታቦተይ ጋክስ" ያግድ ዋስዶሶና።

6 እስራኤለታ ዋሱዋ ፍልስፄመት ስእድ፥ "እብራወታ ጉታን ስኤትያ ዎልቃማ ዋሶይ አይቤ?" ያግዶሶና።

ጎዳ ታቦተይ ኤንታ ጉታ ይዳይሳ ፍልስፄመት ኤርዳ ዎደ፥ 7 ያይድ ሀይሳዳ ያግዶሶና፤ "ፆሳይ ኤንታ ጉታ ይስ፤ ኑና አየ! ሀይሳ መላባይ ሀይሳፈ ካሰ ሀን ኤረና። 8 ኑና አየ! ሀ ዎልቃማ ፆሳ ኩሸፐ ኑና አሻናይ ኦኔ? ሀ ፆሳይ ግብፀታ መላ ቢታን ዱማ ዱማ ጋዶን ሾጭስ። 9 ህንተኖ ፍልስፄመቶ፥ ምንተ! አደ ግድተ! ሄስ ሀኖና እፅኮ፥ ህንተ ኤንታ ካሰ አይለተን ሃርዳይሳዳ ኤንቲ ህንተና ሃራና። አደ ግድተ፤ ኦለትተ" ያግዶሶና።

10 ፍልስፄመት ኦለትድ፥ እስራኤለታ ፆንን እስራኤለት ባንታ ሶ ሶ ባቃትዶሶና። ሄ ኦላን ዳሮ አሳይ ሀይቅዶሶና፤ እስራኤለ ቶሆ ኦላንቾታፐ ሀስታሙ ሙኩሉ አሳይ ሀይቅዶሶና። 11 ፆሳ ታቦተይ ድኤትስ፤ ኤል ናይት ናምአይ፥ አፍናንነ ፍንሃስ ሀይቅዶሶና።

12 ሄ ጋላስ ብንያመ ኮቸ ግድዳ እስ አደይ ኦላ ደምባፈ ዎፅሸ ይድ ሴሎ ጋክስ። ባ አዛኑዋ ኤርሳናዉ እ ባ ማኡዋ ዳክድ፥ ባ ሁጰን ቢታ ቆልስ። 13 ሄ አደይ ጋክያ ዎደ ኤል ባ ዎዛናን ፆሳ ታቦትያስ ህርግዳ ግሾ ናግሸ ኦገ ዶናን ደእያ ባ ኦይድያን ኡትስ። አደይ ካታማ ገልድ፥ ሀንዳባ ኦድን፥ ካታማ ኡባይ ዋሶ ጎች አግስ።

14 ኤል ሄ ዋሱዋ ስእድ፥ "ሀይስ አይብ ዋሶ?" ያግስ።

አደይ ኤለስ ብድ ኤልስ ኦድስ። 15 ኤል ኡዱፉን ታማነ ሆስፑን ላይ ግድዳ ጭማ፤ እያ አይፈይ ዳቡርድ ፄሎ አግስ። 16 አደይ ኤልኮ፥ "ኦላ ደምባፈ ይዳይ ታና፤ ታኒ ሀች ያፐ ባቃታዳ ያስ" ያግስ።

ኤል፥ "ታ ናአዉ፥ ያትን ዋንዴ?" ያግድ ኦይችስ።

17 አደይ፥ "እስራኤለት ፍልስፄመታ ስንፈ ባቃትዶሶና፤ ዳሮ አስ ዉርስ፤ ነ ናይት ናምአይ አፍናንነ ፍንሃስ ሀይቅዶሶና፤ ፆሳ ታቦተይ ድኤትስ" ያግስ።

18 አደይ ፆሳ ታቦትያባ ኦድዳ ዎደ ፐንግያ ማታን ደእያ ባ ኦይድያፐ ኤል ጉየ ኩንድስ። እ ጭማነ ሞሎ ግድያ ግሾ ሞርገይ መቅን ሀይቅስ። ኤል እስራኤለ ቢታ ኦይታሙ ላይ ሃርስ።

19 ኤል ናኣ ፕንሃሳ ማችያ የላናዉ ዎደይ ዉርዳ ቃን። ፆሳ ታቦተይ ድኤተ፥ ባ ቦሉዋነ ባ አዝና ሀይቁዋ ስእዳ ዎደ ቆፖና እቀ እዮ ኦይክን የላሱ። 20 እ ሸምፖይ ከይያ ዎደ የልሰይሳት፥ "አደ ናአ የላዳሳ፤ ያዮፋ" ያግዶሶና። ሽን ኤንታዉ አይኮካ ዛራቡኩ፤ ኤንቲ ግያባካ ስአቡኩ። 21 እያ ባ ናኣ እካቦዳ*4:21 እካቦዳ፦ እብራወ ዶናን ሀ ሱን ብርሸይ "ቦንቾይ ባዋ" ጉሱ። ጋዳ ሱንሱ፤ ፆሳ ታቦተይ ድኤትዳ ግሾነ ባ ቦሎይነ ባ አዝናይ ሀይቅዳ ግሾ፥ "ቦንቾይ እስራኤለፐ ሻከትስ" ያጋሱ። 22 እያ፥ "ፆሳ ታቦተይ ድኤትዳ ግሾ ቦንቾይ እስራኤለፐ ሻከትስ" ያጋሱ።