Apocalipse 14

ዶርሳነ 144,000 አሳታ

1 ሄሳፈ ጉየ፥ ዶርሳይ ፅዮነ ዙማ ቦላ ኤቅዳይሳ በአስ። እያራ እያ ሱንይነ እያ አዋ ሱንይ ኤንታ ሶምኦን ፃፈትዳ፥ 144,000 አሳይ ደኤስ።✝14:1 ህዝ 9:4፤ ቆን 7:3. 2 ሳሎፐ ግታ ሃ ጉንነ ዳዳ ጉን ዳንያ ዎልቃማ ግርስ ስአስ። ቃስ ታ ስእዳ ግርሳይ ዲ ዲፅሽን ስኤትያ ግርሳ መላ። 3 144,000 አሳይ አራታ ስንን፥ ኦይዱ ደኦን ደእያ መተታ ስንንነ ጭማታ ስንን ኤቅድ ኤንታፈ ሀራ ኦንካ ታማራናዉ ዳንዳኦና ኦራ ማዝሙረ የፅዶሶና። 4 ሀይሳቲ ማጫሳራ ባንታና ቱንሶና ናግዳ ጌሻታ። ኤንቲ ዶርሳይ ብያ በሲ ኡባ ካሎሶና። ኤንቲ ፆሳስነ ዶርሳስ ባይራ ግድድ፥ ሺቃናዉ ሳአ አሳ ግዶፈ ዎዘትዶሶና። 5 ኤንቲ ዎርዶይነ ቦረይ ባይና አሳታ።✝14:5 ሶፎ 3:13.

ሄ ኪታንቾታ

6 ሄሳፈ ጉየ፥ መርና ዎንገላ ሳአ ቦላ ደእያ ካዎተ ኡባስ፥ ኮቸ ኡባስ፥ ያራ ኡባስነ ዱማ ዱማ ዶና ኡባስ ማርካታናዉ ሳሎራ ፕራያ ሀራ ኪታንቾ በአስ። 7 ሄ ኪታንቾይ ባ ቃላ ቁ ኦድ፥ "ፆሳይ አላምያ ፕርድያ ሳተይ ጋክዳ ግሾ ፆሳስ ያይተ፤ እያ ቦንችተ። ሳሎ፥ ሳኣ፥ አባነ ፑልቶ ሃ መዳ ፆሳ ጎይንተ" ያግስ።

8 ኮይሮይሳ ካልድ ሀራ ናምአን ኪታንቾይ፥ "ደረ ኡባ ቱናነ ማይያ ዎይነ ኡሽዳ፥ ግታ ባብሎነይ ኩንዳሱ! ኩንዳሱ!" ያግድ ዋስስ።✝14:8 እሳ 21:9፤ ኤርም 51:8፤ ቆን 18:2.

9 ሄን ኪታንቾይ ኤንታ ካልድ፥ ባ ቃላ ቁ ኦድ፥ "ዶኣነ እያ ምስልያ ጎይንያ ቃስ እያ ማላ ባ ሶምኦን ዎይኮ ባ ኩሸን ዎያ ኦንካ ደእኮ፥ 10 እያ ሀንቆ ፁአን ኩምዳ ፆሳ ሀንቆ ዎይንያ ኡያና። ኤንቲ ጌሻ ኪታንቾታ ስንንነ ዶርሳ ስንን ኤፅያ ዲነ ታማን ዋየታና።✝14:10 እሳ 51:17፤ መ 19:24፤ ህዝ 38:22. 11 ኤንታ ዋይያ ጩያይ መር መርናዉ ጩይሸ ዳና። ዶኣነ እያ ምስልያ ጎይነይ ቃስ ሄ ዶኣ ሱን ማላይ ደእያ ኦንካ ቃማነ ጋላስ ሸምፖይ ባይና ካኤታና" ያግስ።✝14:11 እሳ 34:10.

12 ፆሳ ኪታ ናገይሳትነ የሱሳ አማነተይሳት ገንጭያ ምኖተይ ቆንጭያ ዎደይ ሄሳ።

13 ሄሳፈ ጉየ፥ "ህዛፐ ጎዳን ሀይቀይሳት አንጀትዳይሳታ" ግያ ቃላ ሳሎፐ ስአስ።

አያናይ፥ "ኤ ቱማ፥ ኤንታ ኦሶይ ኤንታ ካልያ ግሾ፥ ኤንቲ ባንታ ዳቡራፐ ሸምፓና" ያጌስ።

ካ ሺሾ ዎደ

14 ሄሳፈ ጉየ፥ ቦ ሻራ ቦላ ኡትዳ አሳ ናአ ዳነይሳ በአስ። እ ባ ሁጰን ዎርቃ ካላቻ ዎስ፤ ቃስ ባ ኩሸን ባጫ ኦይክስ።✝14:14 ዳነ 7:13-14. 15 ሀራ ኪታንቾይ ፆሳ ኬፈ ከይድ፥ ሻራ ቦላ ኡትዳይሳኮ ባ ቃላ ቁ ኦድ፥ "ካ ሺሾ ዎደይ ጋክዳ ግሾ ነ ባጫ የዳዳ ካ ጫካ፤ ሳአን ደእያ ካይ ጋክስ" ያግስ።✝14:15 እዩ 3:13. 16 ያትን ሻራ ቦላ ኡትዳይስ ባ ባጫ ሳአ የድድ፥ ሳአን ደእያ ካ ጫክስ።

17 ቃስካ ሳሎን ደእያ ፆሳ ኬፈ ሀራ ኪታንቾይ ከይስ፤ እያዉካ ኦጮ ባጭ ደኤስ።

18 ታማ ቦላ ማት ደእያ ሀራ ኪታንቾይ ያርሾ በሳፈ ከይስ። እ ባ ቃላ ቁ ኦድ ኦጮ ባጫ ኦይክዳ ኪታንቹዋኮ፥ "ዎይነ አይፈይ ቴርዳ ግሾ ኔኒ ኦጮ ባጫ የዳዳ፥ ሳአን ደእያ ዎይንያፐ ቃንፃ" ያግስ። 19 ሄ ኪታንቾይ ባ ባጫ የድድ፥ ሳአን ደእያ ዎይንያፐ ቃንፅድ፥ ፆሳ ግታ ሀንቁዋ ጉምእያ በሳን የግስ። 20 ኤንቲ ካታማፐ ጋፃን ደእያ ዎይነ አይፈ ጉምእያ በሳን የትዶሶና። ሱ ዎይነ ጉምእያ በሳፈ ከይድ እስ ሙኩሉነ ኡሱፑን ፄቱ ክሎ ምትረ መላ ሃክድ፥ ፓራ ፑሎ ጋክድ፥ ቁ ግድ ኤልስ።✝14:20 እሳ 63:3፤ ምላ 1:15፤ ቆን 19:15.