1 ያትድ፥ ኪታንቾይ ታና ፆሳ ካዎተ አራታፐነ ዶርሳ ካዎተ አራታፐ ጎግያ ማስቶተዳ ጶልያ ደኦ ሃ ሻፋ በስስ።✝22:1 ህዝ 47:1፤ ዛካ 14:8. 2 ሄ ሻፋይ ካታማ ኦግያ ግዶራ ዱገ ጎጌስ። ሻፋፐ ሄፍን ባጋራነ ሀፍን ባጋራ አጌናን እስ ቶሆ፤ ላይን ታማነ ናምኡ ቶሆ አይፍያ ደኦ ም ደኤስ። ሄ ም ቦንጮይ ካዎተታ ኡባ ሀርገፈ ፓስ።✝22:2 መ 2:9.

3 ሄ ካታማን አይብ ባደካ ዴና። ፆሳ ካዎተ አራታይነ ዶርሳ ካዎተ አራታይ ሄ ካታማን ዳና። ፆሳ አይለት ፆሳስ ኦና።✝22:3 ዛካ 14:10. 4 ኤንቲ እያ ሶምኡዋ በአና፤ እያ ሱንይ ኤንታ ሶምኦን ፃፈታና። 5 ህዛፐ ቃም ዴና፤ ጎዳ ፆሳይ ኤንታዉ ፆምፐ ግድያ ግሾ ኤንታዉ ፆምፐ ዎይኮ አዋ ፖኦ ኮሸና። ኤንቲ መር መርናዉ ካዎታና።✝22:5 እሳ 60:19፤ ዳነ 7:18.

6 ኪታንቾይ ታኮ፥ "ሀ ታ ኦድያ ቃላይ ቱማነ አማንይሳ። ጎዳይ፥ ናበታ ባ ጌሻ አያናን ኪትያ ፆሳይ፥ ማታን ሀናናባ ባ አይለታ በሳናዉ ባ ኪታንቹዋ ኪትስ" ያግስ። 7 የሱሲ፥ "ሄኮ ታ ኤለሳዳ ያና፤ ሀ ማፃፋን ደእያ ትንብተ ቃላ ናግያ ኦንካ አንጀትዳይሳ" ያግስ።

8 ታኒ፥ ዮሃንስ፥ ሄ ኡባባ ስአስ፤ በአስ። ታኒ ሄሳ ስእዳ ዎደነ በእዳ ዎደ ሄሳ ታና በስዳ ኪታንቹዋ ጎይናናዉ እያ ቶሁዋ ቦላ ኩንዳስ። 9 ሽን ኪታንቾይ ታኮ፥ "ሄሳ ኦፋ! ታኒ ኔዳ፥ ናበታዳ ነ እሻታዳነ ሀ ማፃፋን ደእያ ኡባ ኪተትያ አይለታ መላ፤ ፆሳ ጎይና" ያግስ።

10 ኪታንቾይ ዛሪድ፥ "ሀ ኡባይ ፖለትያ ዎደይ ማታትዳ ግሾ ሀ ማፃፋን ፃፈትዳ ትንብተ ቃላ ማታመን ጎርዶፋ። 11 ኢታ ኦይ ጉጅድ ኢታ ኦ፤ ቱነይ ጉጅድ ቱኖ። ሎኦ ኦይ ጉጅድ ሎኦ ኦ፤ ጌየይ ጉጅድ ጌዮ" ያግስ።✝22:11 ዳነ 12:10.

12 የሱሲ፥ "ሄኮ፥ ታኒ ኤለሳዳ ያና። እሱዋስ እሱዋስ እያ ኦሱዋዳ እማናዉ ታ ዎይቶይ ታራ ደኤስ።✝22:12 እሳ 40:10፤ 62:11፤ ማዝ 28:4፤ ኤርም 17:10. 13 ታኒ አልፋነ ኦመጋ፤ ኮይሮነ ዉርሰ፤ ዶመነ ፖሎ።✝22:13 ቆን 1:8፥ 17፤ 2:8፤ እሳ 44:6፤ 48:12.

14 "ባንታ ማኡዋ ሜጭድ ጌሸይሳት አንጀትዳይሳታ። ደኦ ም አይፍያ ማናዉነ ካታማ ፐንግያራ ገላናዉ ኤንታዉ ማት እመትስ።✝22:14 መ 2:9፤ 3:22. 15 ሽን ካናት፥ ብተይሳት፥ ላይማተይሳት፥ ሸምፖ ዎይሳት፥ ኤቃ ጎይነይሳት፥ ዎርዶ ዶሰይሳትነ ኦይሳት ካረን ደኦሶና።

16 "ታኒ፥ የሱሲ፥ ሀ ማርካተ ህንተዉ፥ ዎሳ ኬታስ ኦዳና መላ ታ ኪታንቹዋ ኪታስ። ታኒ ዳዊታ ሼሽነ ኮቸ። ታኒ ፖእያ ጉራ ባካላ" ያግስ።✝22:16 እሳ 11:1.

17 ጌሻ አያናይነ ገላናዉ ጊግዳ ማጫስያ፥ "ሃያ" ያጎሶና። ቃስ ሀይሳ ስእያ ኦንካ፥ "ሃያ" ያጎ። ሳሞትዳ ኦንካ ሃዮ፤ ደኦ ሃ ኮይያ ኦንካ ጮ ኤኮ።✝22:17 እሳ 55:1.

18 ታኒ ሀ ማፃፋን ፃፈትዳ ትንብተ ቃላ ስእያ ኦናካ ዞራይስ። ኦንካ ሀ ቃላ ቦላ እስባ ጉጅኮ፥ ፆሳይ ሀ ማፃፋን ፃፈትዳ ቦሻ እያ ቦላ ጉጃና።✝22:18 ዛረ 4:2፤ 12:32. 19 ኦንካ ማፃፋን ደእያ ትንብተ ቃላፐ እስባ ፓጭስኮ፥ ፆሳይ ሀ ማፃፋን ፃፈትዳ ደኦ ም አይፍያፐነ ጌሻ ካታማፐ እያ ቃዳ ፓጭሳና።

20 ሀ ኡባ ማርካተይስ፥ "ቱማ፥ ታኒ ኤለሳዳ ያና" ያጌስ።

አምንእ፤ ጎዳ የሱሳ፥ ሃያ።

21 ጎዳ የሱስ ክርስቶሳ አ ኬሀተይ ህንተ ኡባራ ግዶ። አምንእ።