Daniel 8

ዳነል በእዳ ዶርሰነ ዴሸ

1 ብልፃሶር ካዎትዳ ሄን ላይን፥ ታኒ፥ ዳነል፥ ካሰ በእዳ ቆንጨፈ ሀራ ቆንጨ በአስ። 2 ሄ ቆንጨን፥ ኤላማ ቢታን፥ ሱሳ ካታማን፥ ኡባላ ሻፋ ማታን ኤቃዳ ታና ደማስ። 3 ሄ ሻፋ ማታን ናምኡ አዱሳ ካጨት ደእያ ዶርስ ኤቅስ። ናምኡ ካጨታፐ እሶይ ጉየፐ ዶልስ፤ ሽን ኮይሮ ዶልዳይሳፈ አዱሰ። 4 ሄ ዶርሳይ ባ ካጭያን ቃይጫናዉ፥ ዉሎሀ፥ ፑደሀነ ዱገሀ ባጋ ኮልሽን በአስ። እያራ ኤቀታናዉነ እያ ዎልቃፈ ከስ ኤካናዉ አይ መሄይካ ዳንዳእቤና። እ፥ ባ ኮይዳባ ኦስ፤ ያትድ ግታ ግድስ።

5 ታኒ ሀ ቆንጨባ ቆፕሽን፥ እስ ዴሽ ዉሎሀ ባጋፈ ከይድ፥ ቢታ ካንድ፥ ቶሆይ ሳአ የና ይስ። እያ ናምኡ አይፈታፐ ግዶን እስ ግታ ካጨይ ደኤስ። 6 እ፥ ዳሮ ይሎራ፥ ሻፋ ማታን ታኒ በእዳ ናምኡ ካጨራ ደእያ ዶርሳኮ ይስ። 7 እ፥ ዳሮ ይሎትድ፥ ታ በእሽን፥ ዶርሳ ካጨት ናምአይ መቃና ጋካናዉ፥ ኢታ ዶምኤ ዶምእስ። ዶርሳይ እያራ ኤቀታናዉ ዎልቅ ይስ፤ ዴሻይ እያ ሳአን የግድ የድ ኤቅስ። ዴሻ ዎልቃፈ ሄ ዶርሳ አሽያባይ ባዋ። 8 ሄ ዴሻይ ዳሮ ዎልቃምስ፤ ሽን እያ ዎልቃይ ዳርሸ ብን፥ እያ ግታ ካጨይ መቅስ። እያ በሳን ኦይዱ ግታ ካጨት ቢታ ኦይዱ ባጋ ስሚድ ድጭዶሶና።

9 ሀ ኦይዱ ካጨታፐ እሱዋ ቦላ ሀራ ጉ ካጨይ ዶልድ፥ ዱገሀ፥ ዶሎሀነ እስራኤለ ቢታኮ ስሚድ ዎልቃራ ድጭስ። 10 እ፥ ብድ ሳሎን ደእያ ኦላንቾታ ጋካናዉ ድጭድ፥ ሳሎ ፆልንቶታፐ ጉታ ሳአን የግድ ኤንታ የስ።✝8:10 ቆን 12:4. 11 ሳሎ ቶራ ሞጮና ግድዳ ፆሳራ ባና ልክሳና ጋካናዉ ቁ ቁ ግስ። እያዉ ጋላስ ጋላስ ያርሸትያ ያርሹዋ ድግስ፤ እያ ኬካ ቱንስስ። 12 ናጋራ ጋሶን ኦላንቾትነ ጋላስ ጋላስ ያርሸትያ ያርሾይ ሄ ካጭያስ እመትስ። ቱም ሳአን ሆለትስ፤ ሄ ካጨይ ኦያባ ኡባይ እያዉ እንጀትስ።

13 ሄሳፈ ጉየ፥ እስ ጌሻ ኪታንቾይ፥ ሀራ ጌሻ ኪታንቹዋራ ኦደትሽን ታኒ ስአስ። እሶይ እሱዋ፥ "ጋላስ ጋላስ ያርሸትያ ያርሹዋባ፥ ዮ ኤህያ ማካላተባ፥ ሳሎ ኦላንቾትነ ፆሳ ኬይ የትሸ ዳናባ ኦድያ፥ ቆንጨይ አዉደ ፖለታኔ?" ያግድ ኦይችስ።

14 እ ዛሪድ፥ "ናምኡ ሙኩሉነ ሄ ፄቱ ዎንታነ ኦማርስ ጋካናዉ ጋምአና፤ ሄሳፈ ጉየ፥ ፆሳ ኬይ ጌያና" ያግድ ኦድሽን ስአስ።

ቆንጨ ብርሸ

15 ታኒ፥ ዳነል፥ ሀ ቆንጨ በአሸነ እያ ብርሸ ኤራናዉ ቆፓሸ ደእሽን፥ እስ አሰ ዳንያባይ ታ ስንን ኤቅዳይሳ በአስ። 16 ኡባላ ሻፋፐ፥ "ጋብሬላ፥ ሀ አድያስ ሀ ቆንጨ ብርሸ ኦዳ" ግያ ግርስ ስአስ።

17 እ፥ ይድ ታ ማታን ኤቅዳ ዎደ፥ ታኒ ዳጋማዳ፥ ሳአን ኩንዳስ። እ ታኮ፥ "አሳ ናአዉ፥ ሀ ቆንጨይ ዉርሰ ዎድያባ ኦደይሳ አኬካ" ያግስ።

18 እ ታራ ኦደትያ ዎደ፥ ታኒ ሳአን ታ ሶምኡዋራ ጉፋናዳ፥ ታና ባላ አጋስ። እ ታና ሳኣፐ ደንድ፥ ታ ቶሁዋን ኤስስ። 19 እ ታኮ፥ "ሀ ቆንጨይ ዉርሰ ዎድያባ በሲያ ግሾ፥ ጎዳ ሀንቆ ጋላሳን ሀናናዉ ደእያባ ታ ነዉ ኦዳና። 20 ኔኒ በእዳ ናምኡ ካጨራ ደእያ ዶርሳይ፥ ሜዶናነ ፋርሰ ካዎታ ሌምሶ። 21 ዴሻይ ግርከ ካዋ ሌምሶ፤ እያ ናምኡ አይፍያፐ ግዶን ደእያ ግታ ካጨይ ግርከ ካዋ። 22 ካጨ መቅን እያ በሳን ዶልዳ ኦይዱ ካጨት እያ ካዎተፈ ሻከትድ ከያና ኦይዱ ካዎተታ ሌምሶ። ሽን ኤንታ ዎልቃይ ኮይሮ ካዋ ዎልቃ ጋከና።

23 "ኤንታ ካዎተ ዉርሰን፥ ኤንታ ናጋራይ ዛዋ ጋክያ ዎደ፥ ኢታነ ጭምያ ካዎይ ደንዳና። 24 እ ዳሮ ምኖ ግዳና፤ ሽን ባ ዎልቃን ግደና። እ ዳጋንያ ዮ ይሳና፤ እ ኦያባ ኡባይ እያዉ እንጀታና። እ ምኖ አሳታነ ጌሻ አሳታ ይሳና። 25 እ ጭምያ ግሾ እያዉ እንጀታና፤ እ ባና ኡባፈ ቁ ቁ ኦና። ኤንቲ ሳእ ሳሮ ግድ ደእሽን፥ ኤንታፈ ዳሮታ ዎና። እ ሀላቃታ ሀላቃራ ኤቀታና፥ ሽን እ፥ አስ ቦቾና ባዉ ያና።

26 "ነዉ ኦደትዳ ናምኡ ሙኩሉነ ሄ ፄቱ ዎንታነ ኦማርሳ ቆንጨይ ቱማ። ሽን ሀ ቆንጨይ ዳሮ ዎደፐ ጉየ ፖለታናዉ ደእያ ግሾ፥ ማታመ እያ ቦላ ዎዳ ጎርዳዳ ናጋ" ያግስ።

27 ታኒ ዳነል፥ ዳሮ ዳቡርዳ ግሾ፥ ሳከታዳ ዳሮ ጋላስ ዝንአስ። ሄሳፈ ጉየ ደንዳዳ፥ ካዋ ኦሶስ ባስ። ሀ ቆንጨን ታኒ ዳሮ ዳጋማስ፤ አኬካናዉ ዳንዳአብከ።