Deuteronômio 11

1 ህዛ ጎዳ፥ ነ ፆሳ ዶሳ፤ እያ አዋጁዋ፥ ዎጋ፥ እያ ህግያነ እያ ኪታ ኡባ ዎደ ናጋ። 2 ህንተ ናይት በኦናባነ ኤሮናባ ግድኮካ፥ ህንተ ሀች ጎዳ ሴራ፥ እያ ግታተ፥ እያ ዎልቃማ ኩሽያነ ምጨትዳ ቀስያ በእዳይሳ አኬክተ። 3 ህንተ እ ኦዳ ማላታታነ ግብፀ ካዋ ቦላነ እያ ቢታ ኡባ ቦላ ኦዳ ማላልስያባታ በእደታ። 4 ኤንቲ ህንተና ካልድ ጎድዳ ዎደ፥ ጎዳይ ግብፀ ቢታ ኦላንቾታ፥ ኤንታ ፓራታነ ፓራ ጋረታ ዞኦ አባን ምትስድ፥ ሀች ጋካናዉ ኤንታ ኩመ ይስዳይሳ በእደታ። 5 ህንተ ሀ በሳ ጋካናዉ መላ ቢታን ጎዳይ ህንተዉ ኦዳባ ህንተ ኤሬታ። 6 ሮቤላ ኮቻፈ ኤልኣባ ናይታ ግድዳ ዳታነ ቦላነ አቤሮ ቦላ ጎዳይ ኦዳይሳ አኬክተ። እስራኤለ አሳ ኡባይ በእሽን፥ ቢታይ ዶየትድ፥ ኤንታ፥ ኤንታ ሶ አሳ፥ ኤንታ ዱንካንያነ ሸምፖራ ደእያ ኤንታባ ኡባ ምትስ። 7 ጎዳይ ኦዳ ሀ ግታ ኦሶታ ኡባ ህንተ፥ ህንተ አይፈን በእደታ።

8 ህዛ ህንተ ምኖ ግዳና መላነ ዮርዳኖሰ ፕንድ ህንተ ኤካናዉ ብያ ቢታ ላታና መላ ታኒ ሀች ህንተና ኪትያ ኪታ ኡባ ናግተ። 9 ህንተ ኪተትኮ፥ ጎዳይ ህንተ ማይዛታስነ ኤንታ ኮቻስ እማና ግድ ጫቅዳ፥ ማነ ኤስ ጎግያ ቢታን ህንተ አዱሳ ላይ ዳና። 10 ነ ላታናዉ ብያ ቢታይ፥ ነ ከያዳ ይዳ ግብፀ ቢታ መላ ግደና። ግብፀን ነ ካ ዘራዳ፥ ጎሻ ቢታ ኡባ አታክልተ በሳዳ ሃ ኡሻሳ። 11 ሽን ዮርዳኖሰ ፕንድ ህንተ ላታናዉ ብያ ቢታይ፥ ደረይነ ዛንጋራይ ደእያ፥ ሳሎ እራን አልያ ቢታ። 12 ሄ ቢታይ፥ ጎዳይ ነ ፆሳይ ናግያ ቢታ፤ ላይ ዶመፈ ብድ ላይ ዉርሰ ጋካናዉ ጎዳ፥ ነ ፆሳ አይፈይ እያ ቦላ ደእያ ቢታ።

13 ሄሳ ግሾ፥ ጎዳ፥ ህንተ ፆሳ ሲቅኮ፥ ህንተ ኩመ ዎዛናፐነ ህንተ ኩመ ሸምፑዋፈ እያ ጎይንኮ፥ ታኒ ሀች ህንተዉ እምያ ኪታ ህንተ ናግኮ፥ 14 ነ ካ፥ ዎይነይ ዛይተይ ፓጮና ሺሻና መላ ቶርቸነ ስላ እራ ዎደን ዎደን ቡክሳና። 15 ጎዳይ ነ መህያስ ማታ ዳርሳና፤ ነ ማና፤ ካላና።

16 ህንተ ዎዛና ሀራ ሶ ዛሪድ፥ ሀራ ፆሳታ ጎይኖና መላነ ሆኮና መላ ናገትተ። 17 ሄሳ ህንተ ኦኮ፥ ጎዳ ሀንቆይ ህንተ ቦላ ኤፃና፤ እራይ ቡኮና መላነ ካ ዶሎና መላ እ ሳሉዋ ጎርዳና። ህንተ ጎዳይ ህንተዉ እምያ ሎኦ ቢታፈ ኤሶን ያና።

18 ህዛ፥ ሀ ኪታታ ህንተ ዎዛናንነ ህንተ ቆፋን ዎተ። ማላዳ ኤንታ ህንተ ኩሸን ቃችተ፤ ቃስ ህንተ ሶምኦን ቃችተ። 19 ህንተ ናይታ ታማርስተ። ህንተ ሶን ደእያ ዎደ፥ ኦገን ሄመትያ ዎደ፥ ዝንእያ ዎደነ ደንድያ ዎደ ኤንታዉ ኦድተ። 20 ህንተ ፐንገ ዝዝግያ ቦላነ ህንተ ድርሳ ፐንግያ ቦላ ፃፍተ። 21 ሄሳ ህንተ ኦኮ፥ ጎዳይ ህንተ ማይዛታስ እማና ግድ ጫቅዳ ቢታን፥ ህንተ ላይይነ ህንተ ናይታ ላይይ ሳአፐ ቦላራ ደእያ ሳሎ መላ ግዳና።

22 ህንተ ጎዳ፥ ህንተ ፆሳ ዶስኮ፥ እያ ኦገ ኡባን ህንተ ቢኮ፥ እያዉ አማነትኮ፥ ታ ሀች ህንተዉ እምያ ኪታ ህንተ ምንድ ናግኮ፥ 23 ጎዳይ ሀ ካዎተታ ኡባ ህንተ ስንፈ ጎድድ ከሳና። ህንተፈ ዳርያነ ዎልቃምያ ካዎተታ ቢታ የግስድ ኤካና። 24 ቶሆን ህንተ የዳ ቢታ ኡባይ ህንተባ ግዳና። ህንተ ዛዋይ ዱገሀ መላ ቢታፈ ብድ ልባኖሰ ጋካናዉነ ኤፍራፂሳ ሻፋፐ ብድ ግታ አባ ጋካናዉ ግዳና። 25 ህንተራ አይ አስካ ኤቀታናዉ ዳንዳኤና፤ ጎዳይ፥ ህንተ ፆሳይ ህንተዉ ግዳይሳዳ ህንተ ብያ ሶ ኡባን አሳይ ህንተና በእድ ዳጋማና መላነ ህንተዉ ያያና መላ ኦና።

26 ሄኮ፥ ታ ሀች ህንተ ስንን አንጆነ ባደ ዎይስ። 27 ታ ሀች ህንተና ኪትያ ጎዳ፥ ህንተ ፆሳ ኪታ ናግኮ፥ ህንተ አንጀታና። 28 ሽን ታኒ ህንተና ሀች ኪትያ ጎዳ፥ ህንተ ፆሳ ኪታ ናጎና እፅድ፥ ሀራ ፆሳታ ጎይናናዉ እያ ኦግያፐ ደሽኮ፥ ህንተ ባደታና። 29 ጎዳይ፥ ህንተ ፆሳይ ህንተ ላታናዉ ብያ ቢታ ህንተና ገልስያ ዎደ፥ ባደ ጋርዛና ዙማ ቦላ፥ አንጁዋ ኤባላ ዙማ ቦላ አዋጅተ። 30 ሀ ዙማት ዮርዳኖሰ ሻፋፐ ሄፍንን ኦግያፐ ዉሎሀ ባጋን፥ አራባን ደእያ ካናነታ ቢታን፥ ጋልጋላ ስንን ደእያ ሞረ ም ማታን ደኦሶና። 31 ህንተ ሀእ ጎዳይ፥ ህንተ ፆሳይ ህንተዉ እምያ ቢታ ላታናዉ ዮርዳኖሰ ሻፋ ፕናና ሀኔታ። ህንተ ሄ ቢታ ኤክድ ያን ደእያ ዎደ፥ 32 ታ ሀች ህንተዉ እምያ አዋጆታነ ህግያ ኡባ ምንድ ናግተ።