1 ጎዳ ቃላይ ሀይሳዳ ያግሸ ታኮ ይስ። 2 "እስራኤለ ቢታባ አሳይ፥ ‘አዋቲ ቃዉኤ ዎይነ ምን፥ ናይታ አቻይ ሀይቅስ’ ያግድ ኦድያ ሌምሶይ አይቤ? 3 ታኒ ኡባ ሃርያ ጎዳይ ታ ደኡዋን ጫቃስ። ህዛፐ ጉየ ህንተ እስራኤለ ቢታን ሀ ሌምሱዋ ሌምሰከታ። 4 አሳ ኡባ ሸምፖይ ታባ፤ አዋ ሸምፖይነ ናኣ ሸምፖይ ታባ። ናጋራ ኦያ ሸምፖይ እ፥ ባዉ ሀይቃና።

5 "እስ አስ ፅሎ ግድኮ፥ ቱማ ፕርዳነ ሱረባ ኦኮ፥ 6 እ ደርያ ቦላ ደእያ ኤቃ ጎይንያ በሳን ሜና፤ እስራኤለ አሳ ኤቃ ጎይነና፤ ባ ሾሩዋ ማችዉ ቱንሰና፤ ኩሸ መቶራ ደእያ ማጫራ አቀና፤ 7 ኦናካ ኡንኤና፤ አጮስ ኦይክዳባ ጉየ ዛሬስ፥ ቦንቀና፤ ኮሻትዳ አስ ሙዜስ፤ ካሎትዳ አስ ማይዜስ፤ 8 ባ ሚሽያ የሎራ ታልኤና፤ ባ ኩሽያ ኢታባፐ ናጌስ፤ አሰ ስገሸ ፅሎ ፕርዴስ። 9 ታ ህግያ ናጌስ፤ ታ ዎጋ አማነተን ፖሌስ፤ ሄ ኡራይ ፅሎ አስ ግድያ ግሾ እ ደኦን ዳና" ያጌስ ኡባ ሃርያ ጎዳይ።

10 ግዶሽን፥ ሄ ኡራስ ሸምፖ ዎያ ዎይኮ ካልድ ደኤይሳታፐ እሱዋ ኦያ ኢታ ናእ ደእኮ፥ 11 እያ አዋይ ሀይሳታፐ እሱዋካ ኦና አግን፥ እያ ናአይ ደረ ቦላ ኤቃ ጎይኖ በሳታን ሚኮ፥ አሳ ማቾ ቱንስኮ፥ 12 መቶታንቾታነ ማንቆታ ኡንኤኮ፥ ቦንቅኮ፥ አጮስ ኦይክዳባ ዛሮና እፅኮ፥ ኤቃ ጎይንኮ፥ ቱናባ ኦኮ፥ 13 ባ ሚሽያ የሎራ ታልእድ ዎ ኤክኮ፥ ሄሳ መላ አስ ደኦን ደአኔ? እ ደኦን ዴና! እ ሄሳ መላ ቱናባ ኦዳ ግሾ ቱማ ሀይቃና፤ እያ ጎመይ እያ ኦይካና።

14 "ሀ ኢታ ኡራስ ናእ ደእኮ ሄ ናአይ ባ አዋይ ኦያ ሀ ናጋራ ኡባ በእሸ፥ ሄሳ መላባ ኦና እፅኮ፥ 15 እ ደረ ቦላ ደእያ ኤቃ ጎይኖ በሳታን ሞና እፅኮ፥ እስራኤለ አሳ ኤቃ ጎይኖና እፅኮ፥ ባ ላግያ ማችዉ ቱንሶና እፅኮ፥ 16 ኦናካ ኡንኤና እፅክ፥ አጮስ ኦይክዳባ ጉየ ዛርኮ፥ ቦንቆና እፅኮ፥ ኮሻትዳይሳ ሙዝኮ፥ ካሎትዳይሳ ማይዝኮ፥ 17 ኢታ ኦሶፐ ባ ኩሽያ ተቅኮ ዎ ኤካናዉ የሎራ ታልኦና እፅኮ፥ ታ ህግያ ናግኮ፥ ታ ዎጋ ካልኮ፥ ያትኮ፥ ሄ ናአይ ደኦን ዳናፐ አትሽን፥ ባ አዋ ናጋራ ጋሶን ሀይቀና። 18 ሽን እያ አዋይ አሳ ማታ ሱግዳ ግሾ፥ ባ እሻታ ቦንቅዳ ግሾነ ባ አሳ ግዶን ኢታ ኦዳ ግሾ ባ ናጋራ ጋሶን ሀይቃና።

19 "ሽን ህንተ፥ ‘ናአይ ባ አዋ ናጋራ ጋሶን አይስ ሴረተኔ?’ " ያጌታ። ናአይ ቱማ ፕርዳነ ሱረ ኦድ፥ ታ ህግያ ምንድ ናግኮ፥ ቱማ ደኦን ዳና። 20 ናጋራ ኦያ ኡራይ ባዉ ሀይቃና። ናአይ አዋ ናጋራ ጋሶን ሴረተና፤ ሄሳዳካ፥ አዋይ ናኣ ናጋራ ጋሶን ሴረተና። ፅሎ አስ ባ ፅሎተ ጋትያ ኤካና፤ ኢታ አስ ባ ኢታተን ሴረታና።

21 ሽን ኢታ አስ ባ ናጋራ ኡባፈ ስሚድ፥ ታ ኪታ ናግኮ ቱማ ፕርዳነ ሱረ ኦኮ፥ እ ቱማ ደኦን ዳናፐ አትሽን፥ ሀይቀና። 22 እ ኦዳ ናጋራፐ እሶይካ ቆፈተና፤ ባ ኦዳ ፅሎ ኦሱዋ ጋሶን እ ደኦን ዳና። 23 ታኒ ኡባ ሃርያ ጎዳይ፥ ኢታ አስ ባ ኢታ ኦግያፐ ስሚድ፥ ደኦን ደኤይሳን ኡፋይታይስፐ አትሽን፥ እያ ሀይቁዋን ኡፋይትከ።

24 ሽን ፅሎ አስ ባ ፅሎተ አግድ፥ ኢታ አስ ኦያ ቱና ኦሶታ ኡባ ኦኮ፥ እ ደኦን ዳኔ? ሀነና፥ እ ኦዳ ፅሎ ኦሱዋፐ እሶይካ ቆፈተና፤ እ አማነቶና እፅዳ ግሾነ እ ኦዳ ናጋራ ግሾ እ ሀይቃና።

25 ግዶሽን፥ "ህንተ፥ ‘ጎዳ ኦገይ ሱረ ግደና’ ጌታ። እስራኤለ አሳዉ፥ ስእተ፤ ሱረ ግዶናይ ታ ኦግያዬ? ህንተ ኦግያ ግደኔ? 26 ፅሎ አስ ባ ፅሎተ አግድ፥ ኢታ ኦያ ዎደ ባ ናጋራን ሀይቄስ፤ ባ ኦዳ ቆሁዋ ጋሶን ደኦን ደኤና። 27 ሽን ኢታ አስ ባ ኢታተ አግድ፥ ቱማ ፕርዳነ ሱረ ኦያ ዎደ ባ ሸምፑዋ አሻና። 28 እ ባ ኦዳ ናጋራ ቆፕድ ጉየ ስምዳ ግሾ፥ እ ቱማ ደኦን ዳናፐ አትሽን፥ ሀይቀና። 29 ሽን እስራኤለ አሳይ፥ ‘ጎዳ ኦገይ ሱረ ግደና’ ያግዶሶና። እስራኤለ አሳዉ፥ ሱረ ግዶናይ ታ ኦግያ? ህንተ ኦግያ ግደኔ?

30 "ህንተኖ፥ እስራኤለ አሳዉ፥ ታ ህንተና ህንተ ኦሱዋ ኦሱዋ ፕርዳና። ኡባ ሃርያ ጎዳይ ሀይሳዳ ያጌስ፤ ናጋር ህንተዉ ዮስ ጋሶ ግዶና መላ ፓፅተ፤ ህንተ ባላ ኡባፈ ስምተ። 31 ህንተ ኢታ ኦሱዋ ኡባ ዎራ የግድ፥ ኦራ ዎዛናነ ኦራ አያና ኤክተ። ህንተኖ፥ እስራኤለ አሳዉ፥ አይስ ሀይቄቲ? 32 ታኒ እስ አሳ ሀይቆንካ ኡፋይትከ። ሄሳ ግሾ፥ ህንተ ናጋራ ፓፅድ፥ ደኦን ደእተ" ያጌስ ኡባ ሃርያ ጎዳይ።