ህዝቄላ ማፃፋ 27

ፅሮሳስ ከስዳ ዘለልስ

1 ጎዳ ቃላይ ሀይሳዳ ያግሸ ታኮ ይስ። 2 "አሳ ናአዉ፥ ፅሮሳስ ዘለልስ ከሳ። 3 ዩሾይ አባን ተቀትዳ ቢታን ደእያነ አባ ጋፃን ደእያ ዳሮ አሳራ ዛልእያ፥ ካታማስ፥ ኡባ ሃርያ ጎዳይ ሀይሳዳ ያጌስ።

" ‘ነኖ ፅሮሳ፥ ታኒ ፑላነ

ቦረይ ባይና ማላ ሎኦ’ " ያጋዳሳ።

4 ነ ዛዋይ አባ ጉልኣና፤

ነና ኬፀይሳት ሎይድ ኦድ ኬፅዶሶና።

5 ነ ሳንቃ ሳንራ ፂዳን ኦዶሶና፤

ነ ማርካብያ ቱሳ ልባኖሰ ዝጋን ጊግስዶሶና።

6 ሃ ፕያ ምት

ባሳነ ዎላፐ ኦሰትዶሶና።

ነ ማርካብያ ሂፃይ ቆጵሮሳ ፂዳን፥

እያ ዩሾይ ዳንጋርሳ ዛለን አሌቀትስ።

7 ነ ሻራይ ባንድራዳ ሃሆን በንታና መላ፥

ግብፀታ ሊኖፐ አሌቀትድ ኦሰትስ።

ነ ካማ ገሸይ ቆጵሮሳፐ ይዳ፥

ካሎሰ ኦቻ ቴራ ዳንያ ማኦፐ ኦሰትዳይሳታ።

8 ነ ማርካብያ ኮልፅሰይሳት ስዶናነ አርዋዳ ካታማታፐ ይዳይሳታ፤

ነ ማርካብያ ላገይሳት ሎህዳ ነ አሳታ።

9 ማርካብያ ጊግሰይሳት ገባላፐ ይዳ ኤራንቾታነ ካለያ ሂላንቾታ፤

አባን ብያ ማርካበ ኡባን ደእያ ኦሳንቾት ዎ ከያ ግድ ነ ግዶን ዛልኦሶና።

10 "ፋርሰፈ፥ ሊደፐነ ሊበፐ ይዳ ኦላንቾት፥

ነ ኦላንቾታ ማድድ ኦለትዶሶና።

ባንታ ጎንዳልያነ ባንታ ኦላ ባርኔፃ ነ ግዶን ካቅዶሶና፤

ኤንቲ ነና ቦንችዳ አሳታ።

11 አርዋዳነ ሄለካ ኦላንቾት፥

ነ ድርሳ ግምብያ ናጎሶና።

ጋማዳ አሳይ ነ አዱሳ ግምብ ሻኮ ቦላ ናጎሶና፤

ባንታ ጎንዳልያ ነ ግምብያ ቦላ ካቅዶሶና፤

ነ ፑላታና መላ ኦዳይ ኤንታና።

12 ነ ዳሮ ዱረተ ጋሶን ታርሰስ ኔራ ዛልእስ፤

እ ብራ፥ ብራታ፥ ቆርቆሮነ እርሳሰ ኔራ ላምድ ዛልኦሶና።

13 ያዋን፥ ቱባልነ ሞሳህ ኔራ ዛልእዶሶና፤

አይለታነ ናሰ ብራታ እምድ፥ ነ ሚሽያራ ላምዶሶና።

14 ቤት-ቶርጋማ አሳይ

ቶጋ ፓራታ፥ ኦላ ፓራታነ ባቁሎታ እምድ፥ ነ ሚሽያራ ላምስ። 15 ድዳና አሳይ ኔራ ዛልእዶሶና፤ ዩሾይ አባን ተቀትዳ ቢታታን ደእያ አሳይ ዳንጋርሳ ዛለነ ዞጰ ም ነዉ ኤሆሶና።

16 "ነ ዳሮ ዱረተ ጋሶን፥ ሶረ አሳት ኔራ ዛልእዶሶና፤ ኤንቲ ጭሊሎ አልኦ ሹች፥ ዞኦ አልኦ ሹች፥ የሌሎ አሌቆ፥ ኦቻ ቴራ ዳንያ ማኡዋ፥ አልኦ ሊኖነ አሌቀትዳ ማኦ ኤህድ ነ ሚሽያራ ላምዶሶና። 17 ይሁዳነ እስራኤለ አሳይ ኔራ ዛልእዶሶና፤ ኤንቲ ምንተ ጋደ ግስተ፥ ማልዶ፥ ኤስ፥ ዛይተነ ልያ ባልሳመ ዛይተ ነ ሚሽያራ ላምዶሶና። 18 ነ ዳሮ ዱረተነ ሻሎይ ደእያ ግሾ፥ ዳማስቆይ፥ ከልቦና፥ ዎይንያነ ዛሃራ ዶርሳ እክሰ እምድ ነ ሚሽያራ ላምዶሶና። 19 ኡዛለን ደእያ ዳነነ ያዋና አሳይ ነ ዱማ ዱማ ሚሸታ ሻምዶሶና። ኤንቲ ነ ሚሽያራ ላማናዉ አሌቀትዳ ብራታነ ዱማ ዱማ ሳዎ ኤህዶሶና።

20 "ድዳና አሳይ ኮራ ግላሰ ኤህድ ዛልእዶሶና። 21 አራበትነ ቀዳረ ሀላቃት ኡባይ ነ ዛልኤ ሚሽያስ ዶርሳ ኡርገታ፥ ማራዘታነ ዴሻታ ኤህዶሶና። 22 ሳባነ ራማ ዛልአንቾት አልኦ ሹቹ፥ ዎርቃነ ዶረትዳ ሳዎታ እምድ፥ ነ ሚሽያራ ላምዶሶና። 23 ካራነ፥ ካነ፥ ኤደነ፥ ሳባ አሶረነ ከልማዳ ካታማት ኡባይ ኔራ ዛልእዶሶና። 24 ኤንቲ ሎኦ ማኦታ፥ ካሎሰ ዳንያ ማኡዋ፥ አሌቀትዳ ማኡዋ፥ ጋዛ ስጋጃታ፥ ሎይ ዶቅዳ ስባጎታነ ዎዶሮታ እምድ፥ ነ ግያን ዛልኦሶና።

25 "ታርሰሳ ማርካበት ነ ሚሸታ ጫንዶሶና። ኔኒ ዳሮባይ ጫነትን፥ አባ ቦላ ብያ ማርካበ መላ ግዳዳሳ። 26 ነ ማርካብያ ላገይሳት ነና ኤክድ፥ አባ ግዶ ግና ኤፍዶሶና፤ ሽን ዶሎሀ ጫርኮይ ነና አባ ግዶን መንረስ። 27 ኔኒ መቀረትዳ ዎደ ነ ዱረተይነ ነ ዛልኤ ሚሸ ኡባይ፥ ነ ማርካብያ ላገይሳት፥ ነ ማርካብያ ጊግሰይሳት፥ ነ ዛልአንቾትነ ነ ግዶን ደእያ ኦላንቾት ኡባይ አባ ግዶን ሙከትዶሶና። 28 ኤንታ ዋሶይ አባ ጋፃ ደእያ ቢታ ዳጋንስ።

29 "ማርካብያ ቦላ ኡትድ ሃ ፕይሳት ኡባይ ማርካበታፐ ከይድ፥ አባ ጋፃን ኤቅዶሶና። 30 ኤንቲ ኡባይ ባንታ ሁጰን ባና ቆልድ፥ ብዶን ጎንዶረትሸ፥ ነ ዩዋ ግሾ ኢታ ዬሆ ዬክዶሶና። 31 ነዉ ካዮትድ፥ ባንታ ሁጵያ ሜድድ፥ ካዮ ማኦ ማእዶሶና፤ ኤንቲ ዳሮ አዛንድ ነዉ ዬክዶሶና። 32 ኤንቲ ሀይሳዳ ያግድ ነዉ ዘሌልዶሶና፦

"ሀእ አባ ግዶን ስእ ግዳ፥

ፅሮሳ መል ኦኔ?"

33 "ነ ዛልኤ ሚሸይ አባ ፕንድ ያ ዎደ፥

ዳሮ አሳ ካልሳዳሳ፤

ነ ሻሉዋን ቢታን ደእያ ካዎት ዱረትዶሶና።

34 ሽን ሀእ ጪሞ አባን መቀረታዳሳ፤

ነ ዛልኤ ሚሸይነ ነዉ ኦያ አሳ ኡባይ፥

ኔራ አባ ግዶን ሙከትድ ይዶሶና።

35 ዩሾይ አባን ተቀትዳ ቢታን ደእያ አሳ ኡባይ

ነ ቦላ ጋክዳባ በእድ ዳጋምዶሶና።

ኤንታ ካዎት ዳሮ ያይዶሶና፤

ኤንታ ሶምኦይ ያሻን ሹልስ።

36 ነ ዉርሰይ ዳጋንያባ ግድስ፤

ኔኒ ዛራዳ ዳካ።

ሄሳ ግሾ፥ ቢታ ኡባን ደእያ

ዛልአንቾት፥ ሽንቻለ ግዶሶና" ያግስ።