ህዝቄላ ማፃፋ 20

ጌላ እስራኤለ

1 ኑ ድኤትዳ ላፑን ላይን፥ እቻሻን አጌናን፥ ታማን ጋላሳን፥ እስራኤለ ጭማታፐ ጉት ጎዳ ሸንያ ኦይቻናዉ ይድ፥ ታ ስንን ኡትዶሶና።

2 ሄ ዎደ ጎዳ ቃላይ ሀይሳዳ ያግሸ ታኮ ይስ፤ 3 "አሳ ናአዉ፥ ኡባ ሃርያ ጎዳይ፥ እስራኤለ ጭማታኮ ጎዳይ ሀይሳዳ ያጌስ ያጋ፦ ‘ህንተ ታ ሸንያ ኦይቻናዉ ይደቲ? ታኒ ኡባ ሃርያ ጎዳይ ታ ደኡዋን ጫቃስ፦ ህንተ ታና ኦይቻና መላ ታ ኮይከ።’

4 "አሳ ናአ ነ ኤንታ ቦላ ፕርዳኔ? ቱማ ኤንታ ቦላ ፕርዳኔ? ሄሳ ግድኮ፥ ኤንታ ማይዛታ ቱና ኦሱዋ ኤንታ ኤርሳ። 5 ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። ‘ታኒ እስራኤለ ዶርዳ ዎደ ታ ኩሽያ ደንዳ ያይቆባ ዘረስ ጫቃስ። ታኒ ታናተ ግብፀ ቢታን ኤንታዉ ቆንጭሳስ። ታ ኩሽያ ደንዳ፥ ታኒ ጎዳ፥ ህንተ ፆሳ። 6 ታ ህንተና ግብፀፈ ከሳዳ፥ ህንተዉ ዶርዳ ቢታ፥ ማነ ኤስ ጎግያ ቢታ፥ ሀራ ቢታ ኡባፈ አዳ ሎኦ ቢታ ኤሀና’ ጋዳ ጫቃስ። 7 ታ ኤንታኮ፥ ‘ህንተ እሶይ እሶይ ዶስያ ቱና ኤቃታ ድግተ፤ ግብፀ ኤቃታን ህንተና ቱንሶፕተ። ታኒ ጎዳ ህንተ ፆሳ’ " ያጋስ።

8 ግዶሽን፥ ኤንቲ ታዉ ማካልድ፥ ታ ኦድያባ ስኦና እፅዶሶና። ኤንቲ ባንታ አሞትዳ ቱና ኤቃታ ድግቦኮና፤ ግብፀ ኤቃታ ጎይኖ አግቦኮና። ሄሳ ግሾ፥ ኤንቲ ግብፀን ደእሽን፥ ታ ሀንቁዋ ኤንታ ቦላ ጉሳናዉ ቆፓስ። ታ ሸንያ ዉርሳናዉ ቆፋ ቃቻስ። 9 ሽን ኤንቲ ደእያ ካዎተታ ግዶንነ እስራኤለ አሳ ግብፀፈ ከሳናዉ ጫቅያ ዎደ ታ ታናተ ኤርስዳ አሳ ስንን ታ ሱንይ ቱኖና መላ ኦስ። 10 ሄሳ ግሾ፥ ታ ኤንታ ግብፀፈ ከሳዳ መላ ቢታ ኤሀስ። 11 ኪተትያ ኡባስ ደኦ እምያ ታ ህግያ ኤንታዉ እማስ፤ ታ ዎጋ ኤንታ ታማርሳስ። 12 ኤንታ ጌሸይ ታና ጎዳ ግደይሳ ኤንቲ ኤራና መላ፥ ታ ሳምባታ ታፐነ ኤንታፈ ግዶን ማላ ኦዳ እማስ።

13 ሽን እስራኤለ አሳይ መላ ቢታን ታ ቦላ ማካልዶሶና። ኪተትይዳ ኡባስ ደኦ እምያ ታ ህግያ መንዶሶና፤ ታ ዎጋ ካልቦኮና፤ ታ ሳምባታ ቱንስዶሶና። ታኒ መላ ቢታን ታ ሀንቁዋ ኤንታ ቦላ ጉሳዳ ኤንታ ይሳናዉ ቆፓስ። 14 ሽን ታ ኤንታ ግብፀፈ ከስያ ዎደ በእዳ ካዎተታ ስንን ታ ሱንይ ቱኖና መላ ኤንታ ይሳብከ። 15 ኤንቲ መላ ቢታን ደእሽን፥ ኤንታዉ እምዳ፥ ሀራ ቢታ ኡባፈ ሎኦ ግድዳ ማነ ኤስ ጎግያ ቢታ፥ ኤንታ ገልስከ ጋዳ ጫቃስ። 16 ሄስ ሀንዳይ ኤንቲ ኤቃ ጎይንድ፥ ታ ህግያ መንዳ ግሾ፥ ታ ዎጋ ካልቦና ግሾነ ታ ሳምባታ ቱንስዳ ግሾሳ። 17 ግዶሽን፥ ታ ኤንታዉ ቃትዳ ግሾ፥ መላ ቢታን ኤንታ ዉርሳ ይሳብከ።

18 ኤንቲ መላ ቢታ ደእሽን፥ ኤንታ ናይታኮ ሀይሳዳ ያጋስ፤ "ህንተ አዋታ ዎጋ ካሎፍተ፤ ኤንታ ህግያ ናጎፕተ፤ ዎይኮ ኤንታ ኤቃታን ቱኖፕተ። 19 ታኒ ጎዳ ህንተ ፆሳ። ታ ዎጋስ ኪተትተ፤ ታ ህግያ ናግተ። 20 ታ ህንተራ ጫቅዳ ጫቁዋስ ማላ ግዳና መላነ ታኒ ጎዳ ህንተ ፆሳ ግደይሳ ህንተ ኤራና መላ ሳምባታ ዱማይተ" ያጋስ።

21 "ሽን ኤንታ ናይት ታ ቦላ ማካልዶሶና፤ ኪተትያ ኡባስ ደኦ እምያ ታ ዎጋ መንዶሶና፤ ታ ህግያ ናግቦኮና፤ ታ ሳምባታ ቱንስዶሶና። ያትን፥ መላ ቢታን ታ ሀንቁዋ ኤንታ ቦላ ጉሳዳ ታ ይሎይ ዉራና ጋካናዉ ኤንታና ይሳናዉ ቆፓስ። 22 ሽን ታኒ ኤንታ ግብፀፈ ከስያ ዎደ በእዳ ካዎተታ ስንን ታ ሱንይ ቱኖና መላ ኤንታ ይሳብከ። 23 ኤንታ ሀራ ካዎተታ ግዶነ ዱማ ዱማ ቢታ ላላናዉ መላ ቢታን ታ ኩሽያ ደንዳ ጫቃስ። 24 ኤንቲ ታ ዎጋስ ኪተቶና እፅዶሶና፤ ታ ህግያ መንዶሶና፤ ታ ሳምባታ ቱንስዶሶና፤ ባንታ አዋታ ኤቃ አሞትዶሶና። 25 ያትን፥ ኤንታዉ ሎኦ ግዶና ዎጋታነ ደኦ እሞና ህገታ እማስ። 26 ኤንቲ ባንታ ያርሹዋን ቱናናዳ፥ ባንታ ባይራ ናይታ ያርሻናዳ፥ ታ ኤንታ የዳ በሳስ። ታ ሄሳ ኦዳይ ኤንታ ዳጋንናሳነ ታኒ ጎዳ ግደይሳ ኤንቲ ኤራና መላሳ" ያግስ።

27 "ሄሳ ግሾ፥ አሳ ናአዉ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ሄሳ ኦድ ህንተ አዋት አማነቶና እፅድ ታና ጫይዶሶና። 28 ታ ኤንታዉ እማና ጋዳ ታ ኩሽያ ደን ጫቅዳ ቢታ ኤንታ ኤህዳ ዎደ፥ ኤንቲ ደረታ ኡባነ እርፃ ም ኡባ በእዶሶና። ያን ባንታ ያርሹዋ ያርሽዶሶና። ባንታ፥ እፃንያንነ ኡሻ ያርሹዋን ታና ይሎይዶሶና። 29 ታኒ፥ ‘ሀይስ ህንተ ብያ ቃ በሳይ አይቤ?’ ያጋዳ ኦይቻስ። ሀች ጋካናዉ ሄ በሳይ ‘ባማ’ ጌተቴስ እያ ብርሸይ ‘ቃ ጎይኖ በሳታ’ ጌተትድ ፄገቴስ" ያጌስ።

ሴራነ ማሮታ

30 "ሄሳ ግሾ፥ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ያጋዳ ኦዳ፦ ‘ህንተ ማይዛት ኦዳ ናጋራ ኦድ፥ አይስ ህንተና ቱንሴቲ? ኤንታ ቱና ኤቃ ጎይናናዉ አሞትድ አይስ ካሌቲ?’ 31 ሀችካ ህንተ ያርሹዋ ያርሽያ ዎደ ህንተ ናይታ ታማን ያርሽድ፥ ኤቃ ኡባን ህንተና ቱንሴታ። ህንተኖ፥ እስራኤለ አሳዉ፥ ታኒ ህንተናን ኦይሸቶ? ታኒ ኡባ ሃርያ ጎዳይ ታ ደኡዋን ጫቃስ፦ ታ ህንተናን ኦይሸትከ። 32 ህንተ፥ ‘ኑኒ ምነ ሹቹ ጎይንያ ሀራ ካዎተታ መላነ ቢታን ደእያ ሀራ አሳ መላ ግዳና ያግድ ቆፔታ። ሽን ህንተ ቆፋይ ፖሎ ሀነና።’ "

33 ኡባ ሃርያ ጎዳይ ሀይሳዳ ያጌስ፦ "ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተ ቦላ ካዎታና። 34 ካዎተታ ግዶፈ ታ ህንተና ከሳና፤ ህንተ ላለትዳ ቢታ ኡባፈ ታ ምኖ ቀስያን፥ ታ ምጨትዳ ኩሽያንነ ታ ሀንቁዋን ህንተና ሺሻና። 35 ታ ህንተና ‘ካዎተታ መላ ቢታ’ ግያ መላ ቢታ ኤሀዳ፥ ህንተና ታ ስንን ኤሳዳ፥ ህንተ ቦላ ፕርዳና። 36 ግብፀ መላ ቢታን ህንተ ማይዛታ ቦላ ፕርድዳይሳዳ፥ ህንተ ቦላ ፕርዳና። 37 ታኒ ህንተና ታ ካዎተ ፃምአ ጋርሳን ሃራና፤ ህንተ ታ ጫቁዋ ናጋና መላ ኦና። 38 ማካላንቾታነ ናጋራንቾታ ታ ህንተ ግዶፈ ድጋና፤ ሀእ ኤንቲ ደእያ ቢታፈ ታ ኤንታ ከሳና። ሽን ኤንቲ እስራኤለ ቢታ ገሎና መላ ተቃና፤ ሄ ዎደ ታኒ ጎዳ ግደይሳ ህንተ ኤራና" ያጌስ ኡባ ሃርያ ጎዳይ።

39 እስራኤለ አሳዉ፥ ህንተኮ ኡባ ሃርያ ጎዳይ ሀይሳዳ ያጌስ፦ "ሀእ ታ ኦደይሳ ህንተ ስኦና እፅኮ፥ ኡባይ ብድ ህንተ ኤቃ ጎይንተ። ሽን ህዛፐ ጉየ፥ ህንተ እሞታንነ ህንተ ኤቃታን ታ ጌሻ ሱን ቱንሶፕተ። 40 ታ ጌሻ ዙማ ቦላ፥ ቃ እስራኤለ ዙማ ቦላ ህንተ እስራኤለ አሳይ ታና፥ ኡባ ሃርያ ጎዳ ጎይናና። ታኒ ህንተና ኤካና፤ ህንተ ያርሹዋ፥ ህንተ ዶርዳ እሙዋነ ህንተ ጌሻ እሙዋ ታ ህንተፈ ኮያና። 41 ህንተ ላለትዳ ካዎተታ ግዶፈ ታኒ ህንተና ኤህያ ዎደነ ሀራ ቢታታፐ ታ ህንተና ሺሽያ ዎደ ሳዎ ቶንኩ ግያ ያርሾዳ ታ ህንተና ኤካና። ካዎተት ፄልሽን፥ ህንተ ግዶን ታ ጌሻተ ቆንጭሳና። 42 ካሰ ህንተ ማይዛታስ እማና ጋዳ ታ ኩሽያ ደንዳ ጫቅዳ እስራኤለ ቢታ ህንተና ዛራዳ ኤህዳ ዎደ ታኒ ጎዳ ግደይሳ ህንተ ኤራና። 43 ህንተ ኢታ ሀኖታነ ህንተ ቱና ኦሱዋ ህንተ ሄ በሳን ሀሳያና፤ ህንተ ኦዳ ኢታ ኦሶ ኡባ ህንተ ሻተታና። 44 ህንተኖ፥ እስራኤለ አሳዉ፥ ህንተ ኢታ ሀኖታ መላነ ህንተ ቱና ኦሱዋ መላ ግዶናሽን፥ ታ ሱን ግሾ ታ ኦያ ዎደ ታኒ ጎዳ ግደይሳ ህንተ ኤራና" ያጌስ ኡባ ሃርያ ጎዳይ።

ዱገሀ ባጋ ቦላ ኦደትዳ ትንብተ

45 ጎዳ ቃላይ ሀይሳዳ ያግሸ ታኮ ይስ። 46 "አሳ ናአዉ፥ ዱገሀ ባጋ ስማዳ ፄላ፤ ዱገሀ ባጋስ ኦዳ፤ ዱገሀ ዎራ ቦላ ትንብተ ኦዳ። 47 ዱገሀ ዎራስ፥ ኡባ ሃርያ ጎዳይ ኦድያባ ስአ ያጋዳ ኦዳ። ‘ታ ነ ግዶን ታማ የዳና፤ ሄ ታማይ ጭልኦ ምነ መላ ም ኡባ ማና። ሄ ኤፅያ ታማይ ቶኤና፤ ዱገሀፐ ብድ፥ ፑደሀ ባጋ ጋካናዉ ደእያ አሳ ሶምኦ ኡባ ሄ ላጮይ ላባና። 48 ሄ ታማ ኦይዳይ ታና ጎዳ ግደይሳ አሳ ኡባይ በአና። ሄ ታማይ ቶኤና’ " ያጌስ።

49 ታኒ ዛራዳ፥ "ኡባ ሃርያ ጎዳዉ፥ ሄሳ ኦዳ ጋዳ ታና ኪቶፋ። ኤንቲ፥ ‘እ ኡባ ዎደ ሌምሶን ኦዴስ ግደኔ?’ ያጎሶና" ያጋስ።