ህዝቄላ ማፃፋ 45

ጎዳስ ዱማትዳ ግሾ

1 "ቢታ ላታናዉ ህንተ ሳማን ሻክያ ዎደ ሄ ቢታፈ እስ ሳማ ጎዳስ ዱማይተ። ሄስካ ታማነ ናምኡ ክሎ ምትረነ ባጋ አዱቅያነ ታሙ ክሎ ምትረ ዳልግያ በሰ ግዶ። ሄ በሳይ ኡባይ ጌሻ በሰ ግዶ። 2 ሄ በሳፈ ኦይዱ ማዛነ ደእያ አዱሳተይነ ዳልጋተይ እስ ግና ግድያ እቻሹ ፄቱ ዋ፥ በሲ ፆሳ ኬስ ተቀቶ፤ እያ ዩሾን እሻታሙ ዋ ግድዳ ካይሳ በሲ ደኦ። 3 ሄ ጎዳስ ዱማይዳ በሳፈ አዱሳተይ ታማነ ናምኡ ክሎ ምትረነ ባጋ፥ ጎምፓይ እቻሹ ክሎ ምትረ ግድዳ በሰ ዋዳ ሻካ። ሄ በሳይ ኡባፈ ጌሻ በሳይ ደእያ ፆሳ ኬስ፥ ግድድ ደኦ። 4 ሄስ ፆሳ ኬ ግዶን ጎዳስ ሀጋዛናዉ፥ እያኮ ሺቅያ ካህነታስ ዱማትዳ ጌሻ በሲ ግዶ። ሄስ ካህነታ ኬይነ ፆሳ ኬይ ኬፀትያ በሰ ግዶ። 5 ቃስ አትዳ ታማነ ናምኡ ክሎ ምትረ ባጋ አዱቅያነ እቻሹ ክሎ ምትረ ባጋ ዳልግያ በሳይ ፆሳ ኬን ኦያ ሌወታስ ላታ ግዶ፤ ኤንቲ ባንታዉ ዱሳ ካታማታ ያን ኬፆ።

6 "ጎዳስ ዱማይዳ በሳ ማታን ታማነ ናምኡ ክሎ ምትረነ ባጋ አዱቅያነ ናምኡ ክሎ ምትረነ ባጋ ዳልግያ በሳይ ካታማ ኬፃናዉ ደኦ፤ ሄ በሳይ እስራኤለ አሳ ኡባስ ግዶ። 7 እስራኤለ ሀላቃስ እመትዳ ግሾይ ናምኡ ባጋራ ጎዳስ ዱማይዳ በሳንነ ካታማ በሳን ዛዋቴስ። እ ዉሎሀ ባጋራ መደትራነ አባ ጋኬስ፤ ዶሎሀ ባጋራ እስራኤለ ቢታ ዛዋ ጋኬስ። እያ አዱሳተይ እስራኤለ ኮቻፈ እሱዋ ግሹዋዳ ዉሎሀ ባጋ ዛዋፐ ብድ፥ ዶሎሀ ባጋ ዛዋ ጋኬስ። 8 ሄ ግሾይ እስራኤለ ሀላቃስ ላታ ጋደ ግዶ። ህዛፐ ጉየ ታ ሀላቃት ታ አሳ ኡንኤፎ፤ ኤንቲ እስራኤለ አሳ ኡባይ ባ ኮቻን ኮቻን ቢታ ኤካናዳ ኦና" ያጌስ።

9 ኡባ ሃርያ ጎዳይ ሀይሳዳ ያጌስ፤ "ህንተኖ፥ እስራኤለ ሀላቃቶ፥ ህንተዉ ሀእ ግዳና! ቡቀነ አሳ ኡንኤ አግተ፤ ሱረ ፕርድተ፤ ፅሎተ ኦተ። ታ አሳ ኤንታ ላታ ቢታፈ ሾድድ ጎደይሳ አግተ። ሀይሳ ኦደይ ታና ኡባ ሃርያ ጎዳ። 10 ህንተዉ እሱዋስ እሱዋስ ልከ ምዛነይነ ማካ ሚሸይ ደኦ። 11 ማካ ሚሸ ኡባስ ግዶ ግድያ ጎማረ ጌተትያ ማካ ሚሸ ግዶ። መላባ ማክያ እፋ ጌተትያ ሚሸይነ ጉክያባ ማክያ ባተ ጌተትያ ሚሸይ እስ ልከ ግዶ። ሄሳ ጉሳይ፥ እስ ጎመረይ ታሙ እፋራነ ታሙ ባተራ እስ ግና ግዴስ። 12 ጉባ ማክያ ዎደ ህንተ ማካ ሚሸይ ሳቅለ ግዶ። ላታሙ ጌር እስ ሳቅለ ግዶ፤ ኡሱፑን ታሙ ሳቅለይ እስ ምናነ ግዶ።

ያርሾታነ ጌሻ ጋላሳታ

13 "ህንተ እሙዋ እምሸ ሀይሳዳ እምተ። ህንተ ሺሽያ ግስተፈ ኡሱፑን ታማፈ እስ ኩሸ፥ ባንጋፈ ኡሱፑን ታማፈ እስ ኩሸ ግዶ። 14 ሻማሆ ዛይትያፐ ፄታፐ እስ ኩሸ እምተ። ሄሳ ማክያ ዎደ ነ ማክያ ሚሸይ ባተ ግዶ። ታሙ ባተይ እስ ጎማረ ዎይኮ እስ ቆረ ግዴስ። 15 እስራኤለ አሳይ ሄምያ ናምኡ ፄቱ መሄፐ ደእያ እስ ዉድያፐ እስ እስ መሄ እምተ። ሄስ አሳ ናጋራ አቶተስ ያርሸትያ፥ ካ ያርሾራ፥ ፁሳ ያርሾራነ እስፈተ ያርሾራ ሺቃና" ያጌስ ኡባ ሃርያ ጎዳይ። 16 ቢታን ደእያ አሳ ኡባይ ሄሳ ኡባ እስራኤለ ሀላቃስ እሞ። 17 ሀላቃይ ኦያ ኦሶይ፥ እስራኤለ አሳይ ቦንችያ ባለታን፥ አጌና ፄሮን ሳምባታታ ጋላሳን፥ ፁሳ ያርሾ፥ ካ ያርሾነ ኡሻ ያርሾ ሺሾ። እስራኤለ አሳ ናጋራ አቶተስ ናጋራ ያርሾ፥ ካ ያርሾ፥ ፁሳ ያርሾነ እስፈተ ያርሾ ኮሽያባ እሞ።

18 ኡባ ሃርያ ጎዳይ ሀይሳዳ ያጌስ፦ "ኮይሮ አጌናን፥ ኮይሮ ጋላሳን ቦረይ ባይና እስ ዎፋኖ ፆሳ ኬ ጌሻናዉ ሺሻ። 19 ካህነይ ናጋራ ያርሾ ሱፈ ኤክድ፥ ፆሳ ኬ ፐንገ ፃንገታ፥ ያርሾ በሳ ዩሾን ደእያ ደን ደእያ ኦይዱ ማዛነታነ ግዶ ዳባባ ኤፍያ ድርሳ ፐንገ ፃንገታ ትዮ። 20 ኦንካ ቆፖና ዎይኮ ኤሮና ኦዳ ናጋራ አቶተስ፥ ሄ አጌናን ላፑን ጋላስ ሄሳዳ ኦ። ያታዳ ፆሳ ኬ ጌሻ።

21 "ኮይሮ አጌናን፥ ታማነ ኦይዳን ጋላስ ፓስካ ባኣለ ቦንችተ፤ ላፑን ጋላስ ጋካናዉ፥ እርሾይ ባይና ኡይ ሚተ። 22 ኮይሮ ጋላስ ሀላቃይ ባ ግሾነ ባ አሳ ግሾ ናጋራ ያርሾ ኦድ እስ ኮርማ ሺሾ። 23 ሄ ባለይ ቦንቸትያ ላፑን ጋላሳታን ጋላስ ጋላስ ቦረይ ባይና ላፑን ኮርማታነ ላፑን ማራዘ ዶርስ ፁሳ ያርሾ ኦድ፥ ጎዳስ ሺሾ። ሄሳራ ጋድ ናጋራ ያርሾስ ጋላስ ጋላስ እስ ዴሻ ኮለ ሺሾ። 24 እስ እስ ኮርማነ ማራዘ ያርሽያ ዎደ፥ ካ ያርሾስ ታማነ ላፑን ክሎ ግራመ ግስተነ ሄ ልትሮ ዛይተ ሺሾ።

25 "ላፑን አጌናን፥ ታማነ እቻሻን ጋላሳን ዶምያ ላፑን ጋላሳ ባኣለ ዎደ ናጋራ ያርሾ፥ ፁሳ ያርሾ፥ ካ ያርሾነ ዛይተ ካሰይሳፈ ዱማዮና ሀላቃይ ሺሾ" ያጌስ።