ህዝቄላ ማፃፋ 24

ድስተ ሌምሶ

1 ኑኒ ድኤትዳ ኡዱፉን ላይን፥ ታማን አጌናን፥ ታማን ጋላስ፥ ጎዳ ቃላይ ሀይሳዳ ያግሸ ታኮ ይስ። 2 "አሳ ናአዉ፥ ሀች ጋላስ ማዝጋበን ፃፋ። ባብሎነ ካዎይ የሩሳላመ ተቅዳይ ሀች። 3 ሀ ማካላንቾ አሳስ ኡባ ሃርያ ጎዳይ ሀይሳዳ ያጌስ ጋዳ ሀ ሌምሱዋ ኦዳ። ማዳበ ድስተ ታማ ቦላ ዎዳ ሃ እያን ትጋ። 4 ገዳነ አንጋሱዋ፥ ሎኦ አሾ ኡባ ሙፃዳ፥ እያን የጋ፤ ሎኦ መቀ ቃንፀረዳ እያን ኩን። 5 ሄሳስ ነ ኤካና ዶርሳይ ዉድያፐ ዶረትዳይሳ ግዶ። ድስትያ ጋርሳን ም ዎዳ አሹዋነ መቀ ካፃና ጋካናዉ ዶይሳ።"

6 ኡባ ሃርያ ጎዳይ ሀይሳዳ ያጌስ፦ "ሱ ጉስያ ካታማ አየ! እያ ሽእድ ጌዮና እፅዳ ናሰ ብራታ ድስተ መላ ግዳሱ። እ ግዶን ደእያ ሙፀትዳ አሹዋ ሳማ የጎና ኩሸን ጋሄትዳይሳ ከሳ ከሳ ኤካ። 7 ሄ ካታማይ ዎዳ አሳ ሱይ ሀኖ ጋካናዉ እን ደኤስ። ሱ ጉሳሸ፥ አይብካ ካሞና ዳንዳኦና ዛላ ቦላ ጉሳሱፐ አትሽን፥ ባናን ካማና ቢታ ቦላ ጉሳቡኩ። 8 ሀሎ ከያናዉ፥ ታ ሀንቁዋ ደንናዳ፥ ካመቶና መላ እያ ጉስዳ ሱ ታኒ ዛላ ቦላ ዎስ።"

9 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ "ሱ ጉስያ ካታማ አየ! ታኒ ም ጉጃዳ ዎና። 10 ዳሮ ም ዎ፤ ታማ ኤ። አሹዋ ሎይዳ ዶይሳ፤ ጫምባ ማልኤ፤ መቀ ፁጋ። 11 ካይሳ ማዳበ ድስተ ታማ ቦላ ዎ። እያ ቦላ ደእያ ቡቃይ ሴርድ ክቻና ጋካናዉነ እያ ቦላ ደእያ ሽአይ ፁገትድ ያና ጋካናዉ ሱልድ ምቻና መላ ታማ ቦላ ዎ። 12 ሄ ዳቡራይ ኡባይ ጮ መላ ግድስ፤ እያ ቦላ ደእያ ዳሮ ሽአይ ሀር አቶሽን፥ ታማን ክችቤና። 13 የሩሳላመ፥ ነነ ቱንዳይ ነ ኢታ ኦሱዋና። ታ ሀንቆይ ነ ቦላ ዉራና ጋካናዉ ህዛፐ ኔኒ ጌያካ። ነ ቱናተፈ ነና ጌሻናዉ ኮያስ ሽን፥ ነ ጌያናዉ ኮያባካ። 14 ታኒ ጎዳይ ሀይሳ ኦዳስ፤ ሄስ ሀናና። ታኒ ጉየ ስምከ፤ ነዉ ቃትከ፤ ታ ቆፋ ላምከ። ነ ኦግያዳነ ነ ኦሱዋዳ ታኒ ነና ፕርዳና። ታኒ ኡባ ሃርያ ጎዳይ ሀይሳ ኦዳይስ" ያግስ።

ህዝቄላ ማቸ ሀይቁዋ

15 ቃስካ ጎዳ ቃላይ ሀይሳዳ ያግሸ ታኮ ይስ። 16 "አሳ ናአዉ፥ ነ ሲቅያነ ነ አይፈ ስንን ሎእያ ነ ማችዉ አኬኮና ዎና። ሄሳን ካዮቶፋ፥ ዬኮፋነ አፉፆፋ። 17 ኦላ፥ ሽን ነ ኦልያ አስ ስኦፖ፤ ሀይቅዳርስ ካዮቶፋ። ኔኒ ነ ሁጰን ቃጨ ፃፃ፤ ነ ቶሁዋን ጫማ አ። ነ ዶና ካሞፋ፤ ሾች ሞፓ።"

18 ዎንታ ታኒ አሳስ ኦዳስ፤ ኦማርስ ታ ማችያ ሀይቃሱ። ዎንተ ጋላስ ጎዳይ ታና ኪትዳይሳዳ ኦስ። 19 አሳይ ታኮ፥ "ሀ ኔኒ ኦያባስ ብርሸይ አይበኮ ኑስ አይስ ኦድኪ?" ያግስ።

20 ጎዳ ቃላይ ሀይሳዳ ያግሸ ታኮ ይስ ያጋዳ ኤንታዉ ኦዳስ። 21 ኡባ ሃርያ ጎዳይ እስራኤለ አሳ ሀይሳዳ ያጌስ፤ "ህንተ ጬቀትያ፥ ህንተ አይፈ አሙዋነ ህንተ ሸምፖይ አሞትያ ታ ኬ ታኒ ቱንሳና ሀናይስ። ህንተ ጉየ አሽዳ ህንተ አደ ናይትነ ህንተ ማጫ ናይት ማሻን ዉራና። 22 ሄ ዎደ ታ ኦዳይሳዳ ህንተ ኦና። ህንተ ዶና ካመከታ፤ ሾቹ ሜከታ። 23 ህንተ ሁጵያ ፃፅተ፤ ህንተ ቶሁዋን ጫማ አተ። ካዮተከታ ዎይኮ ዬከከታ። ሽን ህንተ ህንተ ናጋራ ጋሶን ግልቃናነ እሶይ እሱዋራ ኦላና። 24 ሄ ዎደ ህዝቄል ህንተዉ ማላታ ግዳና፤ እ ኦዳይሳዳ፥ ህንተ ኦና። ሄስ ሀንያ ዎደ፥ ታኒ ኡባ ሃርያ ጎዳ ግደይሳ ህንተ ኤራና።

25 "አሳ ናአዉ፥ ታኒ ኤንታ ኡፋይሳነ ቦንቹዋ፥ ኤንታ አይፈን ሎእያባነ ኤንታ ዎዛናይ አሞትያባ ምኖ በሳ፥ ቃስ ኤንታ አደ ናይታነ ኤንታ ማጫ ናይታ ኤንታፈ ኤካና። 26 ሄ ጋላስ ነዉ ዎረ ኦዳናዉ እስ አስ ከስ ኤክድ ያና። 27 ሄ ጋላስ ነ ዶናይ ዶየታና፤ ነ እያራ ኦደታና፤ ዛራዳ ሙመ ግዳካ። ሄሳዳ ሀናዳ፥ ነ አሳስ ማላታ ግዳና። ታኒ ጎዳ ግደይሳ ኤንቲ ሄ ዎደ ኤራና" ያግስ።