1 ኡባ ሃርያ ጎዳይ ሀይሳዳ ያጌስ፦ "ግዶ ዳባባ ገልስያ ዶሎሀ ባጋ ድርሳ ፐንገይ ኡሱፑን ኦሶ ጋላሳታን ጎርደትድ ጋምኦ፤ ሽን ሳምባታ ጋላስነ አጌና ፄሮ ጋላሳን ዶየቶ። 2 እስራኤለ ሀላቃይ ድርሳ ፐንግያ ባጋራ ካረ ዳባባፐ ጋ ገልድ፥ ድርሳ ፐንግያ ማታን ኤቆ። ካህነት እ እምዳ ፁሳ ያርሾነ እስፈተ ያርሾ ሺሾ። እ ያን ድርሳ ፐንግያ ማታን ጎይንድ ስሚድ ካረ ከዮ። ሽን ድርሳ ፐንገይ ኦማርስ ጋካናዉ ጎርደተና። 3 ሄ ቢታ አሳይ ሳምባታንነ አጌና ፄሮ ዎደ ሄ ግዶ ዳባባ ፐንግያ ስንን ጎዳ ጎይኖ። 4 ሀላቃይ ሳምባታ ጋላስ ጎዳስ ፁሳ ያርሾ ኦድ፥ ቦረይ ባይና ኡሱፑን ኡርገ ዶርሳታነ እስ ማራዘ ዶርስ ሺሾ። 5 እስ ዶርሳ ኡርግያራ ታማነ ላፑን ክሎ ግራመ ካ ያርሾ እሞ። ኡርገ ዶርሳታር ሺቅያ ካ ያርሾይ ሀላቃይ ባዉ ሺሻናዉ ኮየይሳ መላ ግዶ። ቃስ እስ እስ ታማነ ላፑን ክሎ ግራመ ካራ ሄ ሄ ልትሮ ዛይተይ እሞ። 6 አጌና ፄሮ ጋላስ ቦረይ ባይና እስ ዎፋኖ፥ ኡሱፑን ኡርገ ዶርሳታነ እስ ማራዘ ሺሾ። 7 እስ እስ ዎፋኖነ ኡርገ ዶርስ ያርሽያ ዎደ ካ ያርሾስ እስ እስ ታማነ ላፑን ክሎ ግራመ ግስተነ ሄ ሄ ልትሮ ዛይተ ሺሾ። ኡርገ ዶርሳታራ ሺቅያ ካ ያርሾይ ሀላቃይ ባዉ ሺሻናዉ ኮይዳይሳ መላ ግዶ። 8 ሀላቃይ ገልሸ፥ ድርሳ ፐንገ ባራንዳራ አድ ገሎ፤ ከይሸካ ያራ ከዮ።
9 "አሳይ ባኣለ ጋላስ ጎዳ ጎይናናዉ ያ ዎደ ጎይናናዉ ፑደሀ ፐንግያራ ገልዳይሳት ጋርሳ ፐንግያራ ከዮ፤ ዱገሀ ፐንገራ ገልዳይሳት ፑደሀ ፐንገራ ከዮ። ኦንካ ባ ስንን ደእያ ፐንግያራ ስት ግድ ከዮፖ አትሽን፥ ባ ገልዳ ፐንግያራ ከዮፖ። 10 ኤንቲ ገልያ ዎደ፥ ሀላቃይ ኤንታራ ገሎ፤ ኤንቲ ከይያ ዎደ ኤንታራ ከዮ።
11 "ኡፋይሳ ጋላሳታንነ ላይ ባለታን እስ እስ ኮርማራነ እስ እስ ማራዝያራ ሺቅያ ካ ያርሾይ እስ እስ ታማነ ላፑን ክሎ ግራመ ግስተራ ሄ ሄ ልትሮ ዛይተራ ግዶ። ቃስ ኡርገ ዶርሳራ ሺቅያ ያርሾይ ሀላቃይ ባዉ ሺሻናዉ ኮይዳይሳ መላ ግዶ። 12 ሀላቃይ ባ ዶሳን እምያ ያርሾ፥ ሄስካ ፁሳ ያርሾ ዎይኮ እስፈተ ያርሾ ጎዳስ ኤህያ ዎደ፥ ዶሎሀ ባጋ ድርሳ ፐንገይ እያዉ ዶየቶ። ባ ፁሳ ያርሹዋ ዎይኮ እስፈተ ያርሹዋ ሳምባታ ጋላስ እ ሺሸይሳዳ ሺሾ። እ ከይድ ብን፥ ድርሳ ፐንገይ ጎርደቶ።
ጋላሳ ያርሾ
13 "ሀላቃይ ጋላስ ጋላስ ቦረይ ባይና እስ ላይ ግድዳ እስ ዶርሰ ፁሳ ያርሾ ኦድ፥ ጎዳስ ሺሾ፤ እ ሄሳ ዎንታ ጉራ ፓጨይ ባይና ኦ። 14 ሄሳዳካ ናምኡ ክሎ ግራመ ለይ እስ ልትሮ ዛይተራ ሙኑቀትድ፥ ዎንታ ጉራ ካ ያርሾ ግድድ ሺቆ። ሄስ ህንተ ጎዳስ ጋላስ ጋላስ ሺሽያ ያርሾ ዎጋ። 15 ሀይስ ኡርገ ዶርሳይ፥ ካነ ዛይተይ ፓጭ ባይና ዎንታ ዎንታ ፁሳ ያርሾ ግድድ ሺቃናዉ በሴስ" ያጌስ።
16 ኡባ ሃርያ ጎዳይ ሀይሳዳ ያጌስ፦ "ሀላቃይ ባ ጋድያፐ ሻክድ፥ ባ አደ ናይታፐ እሱዋስ እምኮ፥ ሄስ ሄ ናኣስነ እያ ናይታስ ላታ ግዴስ። 17 ሽን ሀላቃይ ባ ጋድያፐ ሻክድ፥ ባ አይለታፐ እሱዋስ እምኮ፥ እሻታማን ላይ ባለይ ጋካናዉ፥ ሄ ጋደይ እያባ ግዴስ። ሄሳፈ ጉየ፥ ሀላቃስ ስሞ፤ ሄስ ሀላቃሳ ግድያ ግሾ፥ መርናዉ እያዉነ እያ ናይታስ ላታ ግዴስ። 18 ሀላቃይ አሰ ናቅድ፥ አሳ ላታ ጋድያ ዎልቃን ኤኮፎ። ታ አሳይ ባ ላታ ጋድያፐ ሾደቶና መላ እ ባ አደ ናይታስ ባ ጋድያፐ እሞ" ያጌስ።
ያርሾ ጊግስያ በሳታ
19 ሄሳፈ ጉየ፥ ሄ ኡራይ ታና ቆሞ ባጋን ደእያ ካህነታ ክፍለታ ገልያ ፐንግያኮ ኤህስ። ሄሳት ግዶ ዳባባ ጋያ ጋርሳ ባጋ ድርሳ ፐንግያ ማታን ደኤይሳታ። ክፍለታፐ ዉሎሀ ባጋራ ታኒ እስ በሲ በአስ። 20 እ ታኮ፥ "ሀ በሳይ ካህነት ናጋራ ያርሾነ ናቆ ያርሾ አሹዋ ዶይስያ በስነ ካ ያርሾ ኡክያ በሲ። ሄ በሳን ጎኤትያ ጋሶይ አሳ ቆሆይ ጋኮና መላ ጌሻ ያርሹዋፈ ካረ ዳባባ ከየና" ያግስ።
21 ሄሳፈ ጉየ፥ ሄ ኡራይ ታና ካረ ባጋ ዳባባ ኤፍድ፥ ዳባባ ኦይዱ ማዛነታ ዩሽድ በስስ። እስ እስ ማዛንያን ጉ ዳባብ ደኤስ። 22 ኦይዱ ማዛነታን ደእያ ዳባባት እስ ግና፤ ኤንቲ ኦይታሙ ዋ አዱሰ፤ ሀስታሙ ዋ ኦርደ። 23 ሄ ኦይዱ ዳባባታ ዩሾን ሹቻ ግምበይ ደኤስ፤ ግምብያ ጋርሳን ታማ ኤያ በሲ ደኤስ። 24 ሄ ኡራይ ታኮ፥ "ሀይስ ኡባይ ፆሳ ኬን ኦይሳት አሳይ ኤህያ ያርሹዋ ዶይስያ በሳታ" ያግስ።