እስራኤለ ሄንንቾታ
1 ጎዳ ቃላይ ሀይሳዳ ያግድ ታኮ ይስ። 2 "አሳ ናአዉ፥ እስራኤለ ሄንንቾታ ቦላ ሀይሳዳ ያጋዳ ትንብተ ኦዳ፦ ህንተኖ፥ ህንተና ሄምያ እስራኤለ ሄንንቾቶ፥ ህንተና አየ! ህንተ ዶርሳታ ሄማናዉ በሰኔ? 3 ኤንታ ማ ኡዬታ፤ ኤንታ እክስያፐ ዳደትዳ ሱፍያ ማኤታ፤ ኤንታፈ ሞዋ ሹክድ ሜታ፤ ሽን ዶርሳታ ሱረ ሄመከታ። 4 ዳቡርዳይሳታ ጋሽትስበከታ፤ ሀርግዳይሳታ ፓቤከታ፤ መቅዳይሳታ ኮልቤከታ፤ በትዳይሳታ ዛርቤከታ፤ ይዳይሳታ ኮይበከታ። ሄሳ አግድ ኤንታ ዎልቃን ኡንኤድ ሃርደታ። 5 ዶርሳት ኡባይ ሄምያ አስ ይን ላለትዶሶና፤ ባዞ ዶአታስ ካ ግድዶሶና። 6 ታ ዶርሳት ላለትዶሶና፤ ኤንቲ ዙማታ ቦላነ ደረታ ቦላ ቶይላትዶሶና። ቢታ ጋፃ ጋካናዉ ላለትዶሶና፤ ሽን ኤንታ ፆሞሰይ ዎይኮ ኮየይ ባዋ" ያጌስ ኡባ ሃርያ ጎዳይ።
7 ሄሳ ግሾ፥ ህንተኖ፥ ሄንንቾቶ፥ ጎዳ ቃላ ስእተ። 8 "ታኒ ታ ደኡዋን ጫቃይስ፦ ታ ዶርሳታ ሄምያ አስ ይን፥ ታ ዶርሳት ኦይከትድ፥ ባዞ ዶአታስ ካ ግድዶሶና። ታ ሄንንቾት ታ ዶርሳታ ኮይቦና ግሾነ ኤንቲ ታ ዶርሳታ ሄሞና አግድ፥ ባንታና ሄምዳ ግሾ፥ 9 ህንተኖ፥ ሄንንቾቶ፥ ጎዳ ቃላ ስእተ። 10 ታ ህንተዉ፥ ሄንንቾሆታስ ሞርከ ግዳና፤ ታ ዶርሳታ ታኒ ህንተፈ ኤካና፤ ታ ህንተና ናምአን ኤንታዉ ሄንንቾ ኦከ። ህዛፐ ጉየ ህንተ ህንተና ሄምሸ ደኤከታ። ታ ዶርሳታ ታ ህንተፈ ኤካና፤ ህዛፐ ኤንቲ ህንተዉ ካ ግዶኮና" ያጌስ ኡባ ሃርያ ጎዳይ።
11 "ታኒ ታ ሁጰን ታ ዶርሳታ ፆሞሳናነ ኮያና። 12 ሄንንቾይ ባ ዶርሳታፐ ይን ኮየይሳዳ፥ ታኒ ታ ዶርሳታ ኮያና፤ ሻርነ ም ጎዝዳ ጋላስ ኤንቲ ይዳ በሳፈ ታ ኤንታ ሺሻና። 13 ታኒ ካዎተታ ግዶፈነ ሀራ ቢታ ኡባፈ ሺሻዳ፥ ኤንታና፥ ኤንታ ቢታ ኤሀና። እስራኤለ ደረታን፥ ፑልቶታንነ አሳይ ደእያ በሳታን ኤንታ ሄማና። 14 ታኒ ኤንታ ሎኦ ቆሮን ሄማና፤ እስራኤለ ዙማት ኤንቲ ሄመትያ በሰ ግዳና። ኤንቲ ሎኦ ቆሮይ ደእያ እስራኤለ ዙማታ ቦላ ሄመታናነ አላታና። 15 ታኒ ታ ሁጰን ታ ዶርሳታ ሄማናነ ሸምፕሳና። 16 ታኒ ይዳይሳ ኮያና፤ በትዳይሳ ዛራና፤ መቅዳይሳ ኮላና፤ ሀርግዳይሳ ፓና። ሽን ታኒ ሱረ ፕርድያ ሄንንቾ ግድያ ግሾ ገነን ሞዳይሳነ ምንዳይሳ ይሳና" ያጌስ ኡባ ሃርያ ጎዳይ።
17 ህንተኖ፥ ታ ዶርሳቶ፥ "ህንተና ኡባ ታ ፕርዳና፤ ኬሀ ኢታፐ፥ ዶርሳ ዴሻፐ ታ ሻካና። 18 ህንተ ሎኦ ቆሮን ሄመተይስ ግዶና እፅን፥ አትዳ ማታ ቶሆን የቲ? ቃስ ህንተ ፅሎ ሃ ኡየይስ ግዶና እፅን፥ አትዳ ሃ ቶሆን ቡሎየቲ? 19 ታ ዶርሳት ህንተ ቶሆን የዳ ማታ ማናዉነ ህንተ ቶሆን ቡሎይዳ ሃ ኡያናዉ በሲ?" ያጌስ ኡባ ሃርያ ጎዳይ።
20 ሄሳ ግሾ፥ ኡባ ሃርያ ጎዳይ ኤንታኮ ሀይሳዳ ያጌስ፦ "ሞ መህያ ግዶንነ ግልቃ መህያ ግዶን ታ ታ ሁጰን ፕርዳና። 21 ዳቡራንቾታ፥ ህንተ፥ ህንተ ምያነ ህንተ ሀሽያን ሱግያ ግሾነ ጋፃ ከሳና ጋካናዉ ህንተ ኤንታ ህንተ ካጭያን ቃይጭያ ግሾ፥ 22 ታኒ ታ ዶርሳታ አሻና። ህዛፐ ጉየ ኦንካ ኤንታ ኦይከና፤ ታ ኬሀ ዶርሳታ ግዶንነ ኢታ ዶርሳታ ግዶን ታ ፕርዳና። 23 ታ ኤንታ ቦላ እስ ሄንንቹዋ፥ ታ አይልያ ዳዊታ ሹማና፤ እ ኤንታ ሄማናነ ኤንታዉ ሄንንቾ ግዳና። 24 ህዛፐ ጉየ ታ ጎዳይ ኤንታ ፆሳ ግዳና፤ ታ አይለይ ዳዊቲ ኤንታ ግዶን ሀላቃ ግዳና" ያጌስ ጎዳይ።
25 "ታ ኤንታራ ሳሮተ ጫቆ ጫቃና፤ ኢታ ዶአታ ታኒ ቢታፈ ድጋና፤ ታ ዶርሳት ባዞን ሳሮ ዳና፤ ዎራ ጋርሳን ህርግ ባይና አላታና። 26 ታ ኤንታነ ታ ዙማ ዩሾን ደእያ በሳታ አንጃና። ኤንታዉ ኮሽያ እራ ዎደን ዎደን እማና፤ ሄ እራይ ኤንታዉ አንጆ ግዳና። 27 ጋደን ደእያ ምት አይፋና፤ ቢታይ ካ ዶልሳና፤ ኡባይ ባንታ ቢታን ሳሮ ዳና። ታ ኤንታ ቃምባራ መንዳ፥ ኤንታ አይለ ኦድ ሃርዳይሳታ ኩሸፐ ከስያ ዎደ ታኒ ጎዳ ግደይሳ ኤንቲ ኤራና። 28 ሀራ ካዎተት ኤንታ ቦንቆኮና፤ ቢታን ደእያ ዶአት ኤንታ ሞኮና፤ አይኮይካ ዳጋንና ኤንቲ ሳሮ ዳና። 29 ታ ኤንታዉ አራዳ ቢታ እማና፤ ኤንቲ ዛሪድ ኮሻን ዉሮኮና፤ ዎይኮ ሀራ ካዎተታስ ጫሻስ አቶኮና። 30 ሄ ዎደ ኤንቲ ታኒ ጎዳይ፥ ኤንታ ፆሳይ ኤንታራ ደኤይሳነ እስራኤለ አሳይ ታ አሰ ግደይሳ ኤንቲ ኤራና። 31 ህንተኖ፥ እስራኤለ አሳዉ፥ ህንተ ታ ዉደ፤ ታ ቆሮን ምያ ታ ዉድያ፤ ህንተ ታ አሰ፥ ታኒ ህንተ ፆሳ" ያጌስ ኡባ ሃርያ ጎዳይ።