ህዝቄላ ማፃፋ 40

ኦራ ፆሳ ኬ

1 ኑኒ ድኤትዳ ላታማነ እቻሻን ላይን፥ የሩሳላመይ ፆነትዳ ታማነ ኦይዳን ላይን፥ ኮይሮ አጌናን፥ ታማን ጋላሳን ጎዳ ኩሸይ ታ ቦላ ደኤስ። እ ታና ደንድ የሩሳላመ ኤፍስ። 2 ፆሳይ ታና ቆንጨን እስራኤለ ቢታ ኤፍድ፥ እስ ዙማ ቦላ ኤስስ። ሄ ዙማፐ ዱገሀ ባጋራ ዳሮ ኬ ኬፀትዳ ካታማ ዳንያባ በአስ። 3 እ ታና ያ ኤፍን ታኒ ናሰ ብራታዳ ጶልያ እስ አድያ በአስ። ሄ ኡራይ ሊኖፐ ኦሰትዳ ዎዶሮነ ዋ ፃምአ ኦይክድ፥ ድርሳ ፐንግያ ማታን ኤቅስ። 4 እ ታኮ፥ "አሳ ናአዉ፥ ታ ነና ሀ በሳ ኤህዳይ ታ ነና በሲያባ ኡባ ነ ምን አኬካና መላሳ። ሄሳ ግሾ፥ ነ አይፍያን ፄላ፤ ነ ሀይን ስአ፤ ነ ዎዛናን ዎ። ነ በእያባ ኡባ እስራኤለ አሳስ ኦዳ" ያግስ።

ዶሎሀ ባጋ ፐንግያ

5 ታኒ ፆሳ ኬ ዩይ አዳ ድርሳ ግምብያ በአስ። ሄ አድያ ኩሸን ኡሱፑን ዋ አዱሰ ግድዳ ፃምእ ደኤስ። እስ አዱሳ ዋይ እስ ዋ ቦላ ኦይዱ ብራታ ጉጃ ግዴስ። ድርሳ ግምብያ ልክያ ዎደ ዳልጋተይ እስ ዋነ ታካ፤ ጎምፓይነ አዱሳተይ ኡሱፑን ዋ።

6 ሄሳፈ ጉየ፥ ዶሎሀ ባጋራ ደእያ ድርሳ ፐንግያኮ ብስ። ደ ከይድ፥ ገልያ ፐንግያ ዋያ ዎደ ኡሱፑን ዋ ግድስ። 7 ያራ አያ ዎደ ኡሻቻራነ ሀድርሳራ ፐንገ ናገይሳት ኤቅያ ሄ ሄ ክፍለት ደኦሶና። እስ እስ ክፍለይ ኡሱፑን ዋ አዱሰነ ኡሱፑን ዋ ዳልጋ። ኤንታ ግዶን ደእያ ጎዳት እቻሹ ዋ ኦርደ። ፐንግያ ናገይሳታ ክፍለታፐ ያ ባጋራ፥ ፆሳ ኬኮ ስምዳ ኡሱፑን ዋ ባራንድ ደኤስ።

8 ሄ ኡራይ ገልያ በሳ ባራንዳ ዋን፥ ሆስፑን ዋ ግድስ። 9 ፆሳ ኬኮ ስምዳ ፐንገይ ዉርሰን ደኤስ። ሄ ባራንዳ ቱቀታ ኦርደተይ ናምኡ ዋ። 10 ዶሎሀ ባጋ ፐንግያን ኡሻቻንነ ሀድርሳ ባጋን እስ ግና ግድዳ ሄ ናጎ ኬ ደኤስ።

11 ሄ ኡራይ ድርሳ ፐንግያ ዋያ ዎደ ዳልጋተይ ታሙ ዋ፥ አዱሳተይ ታማነ ሄ ዋ። 12 እስ እስ ፐንገ ናገይሳታ ክፍልያ ስንን አዱሳተይ እስ ዋ፥ ዳልጋተይ እስ ዋ ግድዳ ጎድ ደኤስ፤ ናገይሳታ ክፍለት ናምኡ ባጋራ ኡሱፑን ኡሱፑን ዋ።

13 ሀፍንን ደእያ ናገይሳታ ክፍለት ጉየ ባጋፈ ሄፍንን ደእያ ናገይሳታ ክፍለታ ጉየ ባጋ ጋካናዉ ደእያ በሳይ ላታማነ እቻሹ ዋ ግድስ። 14 ሄ ኡራይ ዳባባ ስንን ደእያ ዉርሰ ክፍልያ ዋን፥ ላታሙ ዋ ግድስ። 15 ፐንግያ ገልያ በሳፈ ብድ፥ ዉርሰን ደእያ እያ ባራንዳ ጋካናዉ ደእያ ፐንግያ አዱሳተይ እሻታሙ ዋ። 16 ክፍለታ ኡባስ ካረ ባጋ ስምዳ ጉ ማስኮተት ደኦሶና፤ ክፍለታፐ ግዶን ደእያ ጎዳታስ ማስኮተት ደኦሶና። ያነ ሃነ ሻክያ ጎዳታ ቦላ ዛምባ ምስለይ ደኤስ።

ካረ ዳባባ

17 ሄ ኡራይ ታና ካረ ዳባባኮ ኤፍስ። ያን ታኒ ዳባባ ዩሾን ደእያ ሹች ሂፀትዳ ባሱዋነ ሄ ባሱዋ ኬፀትዳ ሀስታሙ ክፍለታ በአስ። 18 ሹቻይ ሂፀትዳ ባሶይ ዳባባ ዩሾ ኡባ ጋክስ፤ ካረ ዳባባይ ግዶ ዳባባፐ ዝቄስ። 19 ግዶ ዳባባ ጋያ፥ ቃን ኦሰትዳ፥ ድርሳ ፐንገይ ደኤስ። ሄ ኡራይ ናምኡ ፐንገታፐ ግዶን ደእያ በሳ ዋን፥ ጎምፓይ ዉሎሀ ባጋ ፄቱ ዋ ዶሎሀ ባጋይ ፄቱ ዋ ግድስ።

ፑደሀ ፐንግያ

20 ሄ ኡራይ ታና ቆሞ ባጋ ኤፍድ፥ ካረ ባጋ ዳባባ ስንን ደእያ ድርሳ ፐንግያ ዋስ። 21 ዉሎሀፐ ኡሻቻንነ ሀድርሳ ባጋራ ደእያ ሄ ናገይሳታ ክፍለት፥ ኤንታፈ ግዶን ደእያ ጎዳትነ እያ ባራንዳይ ኮይሮ ዶሎሀ ፐንግያ ባጋን ዋን እስ ግና ግድዶሶና። ድርሳ ፐንገ አዱሳተይ እቻሹ ዋ፤ ዳልጋተይ ላታማነ እቻሹ ዋ። 22 ባራንዳይ፥ ማስኮተትነ ዛምባ ምስለይ ካሰ ዶሎሀ ፐንግያ ባጋን በእዳይሳዳ እስ ግና። ያ ጋያ ላፑን ደት ደኦሶና። ባራንዳይ ዳባባ ስን ባጋራ ደኤስ። 23 ዶሎሀ ባጋን፥ ቆሞ ባጋ ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋን፥ ፄቱ ዋ ግድስ።

ዱገሀ ፐንግያ

24 ሄ ኡራይ ታና ጋርሳ ባጋ ድርሳ ፐንግያኮ ካለን፥ ያን ሀራ ድርሳ ፐንገ በአስ። እ ቱቀታነ ግዶ ክፍለታ ዋያ ዎደ ሀራታራ ግና ግድስ። 25 ሄ ድርሳ ፐንግያ ማታን ደእያ ክፍለታ ኡባስ ማስኮተት ደኦሶና። ድርሳ ፐንግያ አዱሳተይ እሻታሙ ዋ፤ ዳልጋተይ ላታማነ እቻሹ ዋ። 26 ያ ጋያ ላፑን ደት ደኦሶና። ባራንዳይ ዳባባ ስንን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። 27 ግዶ ዳባባስ ሀራ ፐንገይ ደኤስ። ሄ ኡራይ ሀ ናምኡ ድርሳ ፐንገታፐ ግዶን ደእያ በሳ ዋን፥ ፄቱ ዋ ግድስ።

ግዶ ዳባባ ገልስያ ፐንገታ

28 ሄ ኡራይ ታና ጋርሳ ድርሳ ፐንግያ ባጋራ ግዶ ዳባባኮ ኤፍስ። እ ድርሳ ፐንግያ ዋን፥ ሀራ ፐንገታራ ግና ግድስ። 29 ናገይሳታ ክፍለት፥ ጎዳትነ ባራንዳት ኡባይ ሀራ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሀ ፐንግያ አዱሳተይ እሻታሙ ዋ፤ ጎምፓይ ላታማነ እቻሹ ዋ። 30 ሄ ድርሳ ፐንገይ ዩሹዋን ባራንዳት ደኦሶና፤ ኤንታ አዱሳተይ ላታማነ እቻሹ ዋ፤ ጎምፓይ እቻሹ ዋ። 31 ሄ ባራንዳት ካረ ባጋ ዳባባ ስንን ደኦሶና። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋያ ሆስፑን ደት ደኦሶና።

32 ሄ ኡራይ ታና ዶሎሀ ባጋ ድርሳ ፐንግያራ ግዶ ዳባባኮ ኤፍስ። እ ሄ ድርሳ ፐንግያ ዋን፥ ሀራ ፐንገታራ ግና ግድስ። 33 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ደእያ ክፍለታ ኡባስ ማስኮተት ደኦሶና። ሄ ፐንግያ አዱሳተይ እሻታሙ ዋ፤ ጎምፓይ ላታማነ እቻሹ ዋ። 34 ባራንዳይ ካረ ባጋ ዳባባ ስንን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋያ ሆስፑን ደት ደኦሶና።

35 ሄ ኡራይ ታና ፑደሀ ባጋ ድርሳ ፐንግያኮ ኤፍስ። እ ሄ ድርሳ ፐንግያ ዋን፥ ሀንኮ ፐንገታራ እስ ግና ግድስ። 36 ናገይሳታ ክፍለት፥ ጎዳትነ ባራንዳይ ሀንኮ ድርሳ ፐንገታራ እስ ግና። ሄ ድርሳ ፐንግያ ዩሾን ማስኮተት ደኦሶና። ሄ ፐንግያ አዱሳተይ እሻታሙ ዋ፤ ጎምፓይ ላታማነ እቻሹ ዋ። 37 ባራንዳይ ካረ ባጋ ዳባባ ስንን ደኤስ። ፐንግያ ቦላ ያ ባጋራነ ሀ ባጋራ ዛምባ ምስለይ ደኤስ። ያ ጋያ ሆስፑን ደት ደኦሶና።

ፑደሀ ፐንግያ ማታን ደእያ ኬታ

38 ካረ ዳባባ ቆሞ ባጋራ፥ ግዶ ድርሳ ፐንግያ ባራንዳራ ኦይከትድ፥ ሀራ ክፍለይ ደኤስ። ፁሳ ያርሾ ኤህያ መሄ አሾይ ሜጨተይ ሄ ክፍልያና። 39 ሄ ባራንዳን ሀ ባጋራ ናምኡ ፃርጴዛት፥ ያ ባጋራ ናምኡ ፃርጴዛት ደኦሶና፤ ፁሳ ያርሾስ፥ ናጋራ ያርሾስነ ናቆ ያርሾስ መሄ ኡባይ ሹከትያ ሄ ፃርጴዛታ ቦላና። 40 ባራንዳፈ ካረ ባጋራ ቆሞ ድርሳ ፐንግያ ማታን ናምኡ ፃርጴዛት ሀ ባጋራ፥ ናምኡ ፃርጴዛት ያ ባጋራ ደኦሶና። 41 ሄሳ ግሾ፥ ያርሾስ ሺቅዳ መሄይ ሹከትያ ሆስፑን ፃርጴዛት ደኦሶና፤ ኤንታፈ ኦይዳት ባራንዳን ደኦሶና፤ ኦይዳት ካረ ዳባባን ደኦሶና። 42 ፁሳ ያርሾ ዎናዉ ጊግስዳ፥ ሹቻፈ ማሰትድ ኦሰትዳ ኦይዱ ፃርጴዛት ደኦሶና። ኤንታዉ አዱሳተይ እስ ዋነ ታካ፤ እስ ዋነ ታካ፤ ዳልጋተይ እስ ዋነ ታካ። ፁሳ ያርሾነ ሀራ ያርሾ ኡባ ሹክያ ሚሸት ሄ ፃርጴዛታ ቦላ ኡቶሶና። 43 ኦይዱ ብራ አዱቅያ ካቆታ ጎዳ ቦላ ዩይ አድ ሸትድ ኡትዶሶና። ያርሾስ ሺሽያ አሾ ኡባይ ሄ ፃርጴዛታ ቦላ ኡቴስ።

ካህነታ ክፍለታ

44 ሄ ኡራይ ታና ግዶ ዳባባ ገልስስ። ያን ፐንገት ግዶ ዳባባኮ ዶየትያ ናምኡ ክፍለት ደኦሶና። ኤንታፈ እስ ክፍለይ ቆሞ ድርሳ ፐንግያ ማታራ ጋርሳ ባጋ ስምስ፤ ናምአንይ ጋርሳ ድርሳ ፐንግያ ማታራ ቆሞ ባጋ ስምስ። 45 ሄ ኡራይ፥ "ዱገሀ ባጋ ስምዳ ክፍለይ ፆሳ ኬን ኦያ ካህነታባ። 46 ቆሞ ባጋ ስምዳ ክፍለይ ያርሾ በሳን ኦያ ካህነታባ። ካህነት ኡባይ ሳዶቃ ያራፐ የለትዳ ሌወታ፤ ጎዳ ስንን ኤቅድ ኦናዉ በሰይሳት ሀይሳታ ፃላላ" ያግስ።

47 ሄ ኡራይ ዳባባ ዋን፥ አዱሳተይ ፄቱ ዋ፥ ዳልጋተይ ፄቱ ዋ ግድስ። ዳባባን ፆሳ ኬፈ ስን ባጋራ እስ ያርሾ በሲ ደኤስ። 48 እ ታና ፆሳ ኬ ባራንዳኮ ኤፍስ። ባራንዳ ገልያ በሳን ኤቅዳ ጎባነታ ዋን፥ አዱሳተይ እቻሹ ዋ፤ ዳልጋተይ ታማነ ኦይዱ ዋ። ሀድርሳራነ ኡሻቻራ ደእያ ጎዳታ ኦርደተይ ሄ ዋ ግድስ። 49 ባራንዳ አዱሳተይ ላታሙ ዋ፤ ጎምፓይ ታሙ ዋ። ያ ጋያ ታሙ ደት ደኦሶና። ገልያ በሳን ኡሻቻራነ ሀድርሳራ ኤቅዳ ናምኡ ቱቀት ደኦሶና።