ፓሮናስ ከስዳ ዘለልስ
1 ኑኒ ድኤትዳ ታማነ ናምአን ላይን፥ ታማነ ናምአን አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ። 2 "አሳ ናአዉ፥ ግብፀ ካዋስ ሀይሳዳ ያጋዳ ዘሌላ። ኔኒ ካዎተታስ ግዶን ነና ጋሞ መላ ከሳዳሳ፤ ሽን ነ አባ ግዶን ደእያ ዬሩን መላ። ነ ሃፈ ከያዳሳ፤ ነ ቶሁዋን የዳ፥ ሃ ቡሎያዳሳ። 3 ዳሮ አሳይ ሺቅያ ዎደ ታኒ ታ ግትያን ነና ኦይካና፤ አሳይ ነና ጎችድ፥ ሃፈ ጋፃ ከሳና። 4 ታኒ ነና ቢታን ሆላ አጋና፤ ሳአ ቦላ ምጫና፤ ሳሎ ካፎታ ነ ቦላ ኡትሳና፤ ባዞ ዶአታ ነ አሹዋ ካልሳና። 5 ታ ነ አሹዋ ደረታ ቦላ ላላና፤ ዛንጋራታ ነ አሀን ኩንና። 6 ሻፋታ ኩምድ ደረታ ካማና፥ ጋካናዉ፥ ነ ሱይ ጉካና መላ ኦና። 7 ታ ነና ይስያ ዎደ ሳሎይ ጎዘታና፤ ፆልንቶት ማና፤ አዋይ ሻራን ካመታና፤ አጌናይ ባ ፖኡዋ ድጋና። 8 ኔፐ ቦላራ ደእያ ሳሎ ፖኦታ ኡባ ይሳዳ፥ ቢታ ምሳና" ያጌስ ኡባ ሃርያ ጎዳይ።
9 ነ ቦላ ጋክዳ ዩዋ ነ ኤሮና ካዎተታ ስስያ ዎደ ዳሮ አሳ ዎዛናይ ኡንኤታና። 10 ዳሮ ካዎተት ነና በእድ ዳጋማና። ታኒ ታ ማሻ ኤንታ ስንን ሾዳዳ ሴስያ ዎደ፥ ካዎተት ያሻን ኮኮራና፤ ነ ኩንድያ ዎደ ኤንቲ ኡባይ ባንታ ሸምፑዋስ ያያና።
11 ኡባ ሃርያ ጎዳይ ግብፀ ካዋኮ ሀይሳዳ ያጌስ፦ "ባብሎነ ካዋ ማሻይ ነ ቦላ ያና። 12 ሀራ ካዎተታፐ አዳ፥ ዎዛና ምኖ ኦላንቾት ባንታ ማሻን ዳሮ አሳ ዉርሳናዳ ታኒ ኦና። ኤንቲ ግብፀ ኦቶሩዋ ይሳና፤ ዳሮ አሳይ ዉራና። 13 ዳሮ ሃ ማታን ደእያ መሄ ኡባ ታ ይሳና፤ ህዛፐ ጉየ፥ ሃ ቡሎያ አስ ዎይኮ መሄይ ዴና። 14 ሄ ዎደ ታኒ ነ ሃታ ፅልሳና፤ ነ ሻፋታ ዎፑ ኦዳ ጎግሳና። ታኒ ኡባ ሃርያ ጎዳይ ሀይሳ ኦዳይስ። 15 ታኒ ግብፀ ባይሳ ከስያ ዎደ እያን ደእያ ኡባ ቁቻዳ ይስያ ዎደነ እያን ደእያ አሳ ኡባ ሾጭያ ዎደ ታኒ ጎዳ ግደይሳ ኤንቲ ኤራና። 16 ሀ ኡባይ ኤንታዉ ዘሌለትያ ዘለልስ ግዳና። ካዎተታ ማጫሳት ግብፀስነ እያ ዳሮ አሳስ ዘሌላና" ያጌስ ኡባ ሃርያ ጎዳይ።
17 ኑኒ ድኤትዳ ታማነ ናምአን ላይን፥ ሄ አጌናን፥ ታማነ እቻሻን ጋላሳን፥ ጎዳ ቃላይ ሀይሳዳ ያግሸ ታኮ ይስ፦ 18 "አሳ ናአዉ፥ ዳሮ ግድዳ ግብፀ ኦላንቾታ ግሾ ዬካ። እዮነ፥ ዎልቃማ ካዎተታ ማጫ ናይታ ሀይቅድ ዱፎ ገለይሳታራ እስፈ ዱገ ዱፎ ሞይዛ። 19 ኤንታኮ፥ ‘ህንተኖ ግብፀቶ፥ ህንተ ሀራታፐ አድ ማላ ሎኦ? ህንተ ዱፎ ገላና፤ ያን ህንተ ጎዳ ቃፃረቶናይሳታራ እስፈ ሞገታና።’ 20 ግብፀ ቢታስ ማሽ ሾደትድ ኡትዳ ግሾ፥ ኤንቲ ማሻን ሀይቅዳይሳታ ግዶን ኩንዳና፤ ግብፀይ ባ ዳሮ አሳራ ዱገ ጎሸታና። 21 ዱፎን ደእያ ዎልቃማ ሀላቃት ግብፀባነ ግብፀራ እስፍዳይሳታባ ሃሳይሸ፥ ‘ኤንቲ ዱገ ይዶሶና፤ ጎዳ ቃፃረቶናይሳታ ማሻን ሀይቅዳይሳታራ ኤንቲ ዝንእዶሶና’ ያጎሶና።
22 "አሶረይ ዱፎን ደኤስ። ኦላን ሀይቅዳ አሶረ ኦላንቾታ ዱፎት እያ ዩሹዋ ተቅድ ኡትዶሶና። 23 ኤንታ ዱፎት ኦላስ ዉርሰ ጋፃን ደኦሶና። እያ ኦላንቾት ዱፉዋ ዩሾን ኬለትዶሶና፤ ካሰ ደኦን ደእያ አሳ ሄራን ቡቀ ደንያ አሳይ ሹከትዶሶና፤ ማሻን ዉርዶሶና።
24 "ኤላም ዱፎን ደኤስ፤ እያ ኦላንቾት ኡባይ ሹከትዶሶና ማሻን ኩንድዶሶና። ደኦን ደእያ አሳ ማታን ቡቀ ደንዳሳት ኡባይ ቃፃረቶና ቢታ ጋርስ አዶሶና ዱፎ ገልድ ዝንእዶሶና። 25 ሀይቅዳይሳታ ግዶን ኤላማስ በሲ ጊግድ ኡትስ። ኤላማ ኦላንቾታ ዱፎት እያ ዩሹዋን ደኦሶና፤ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረትቦናይሳታነ ማሻን ሀይቅዳይሳታ ኤንቲ ደኦን ደኤይሳታ ግዶን ቡቀ ደንዳ ግሾ ዱፎ ጌልዳይስታራ እስፈ ዝንእዶሶና።
26 "ሞሳህነ ቶባል ባንታ ኦላንቾታራ ዱፎን ደኦሶና፤ ኤንቲ ካሰ ካዎተታ ኡባ ያሻን ኮኮርስዳይሳታ ግድኮካ፥ ኤንቲ ኡባይ ማሻን ሀይቅዶሶና። ኤንቲ ኡባይ ቃፃረቶናይሳታ። ኤንቲ ደኦን ደኤይሳታ ግዶን ቡቀ ደንዳ ግሾ ማሻን ሀይቅዶሶና። 27 ኤንቲ በን ጎባ ኦላንቾት ባንታ ኦላ ሚሽያ ዳንጭድ ባንታ ጎንዳልያ ትራን ዎድ ባንታ ማሻ ቦርኮትድ ሞገተይሳዳ ቦንቾን ሞገትቦኮና። ሀ ኦላንቾታ ደኦን ደእያ አሳ ግዶን ቡቀ ደንዳ ግሾ ኤንታ ናጋራይ ኤንታ መቀ ቦላ ደኤስ።
28 "ህንተ ግብፀ አሳት ፆነታናነ ማሻን ሀይቅዳ፥ አማኖና አሳታራ እስፈ ዝንአና።
29 "ኤዶመይ ባ ካዎታራነ ባ ሀላቃታራ እስፈ ዱፎን ደኤስ፤ ኤንቲ ካሰ ምኖ ኦላንቾታ፤ ሽን ሀእ ኦላን ሀይቅዳ፥ አማኖና አሳታራ ኦላን ገልዶሶና።
30 "ፑደሀ ባጋ ሀላቃትነ ስዶና አሳይ ዱፎን ደኦሶና። ኤንቲ ካሰ ባንታ ዎልቃን አሳ ያሽስዶሶና፤ ሽን ሀእ ኤንቲ ባንታ ዬላራ ያ ገልዶሶና። ማሻን ሀይቅዳ ቃፃረትቦና አሳራ እስፈ ዱፎ ገሎሶና።
31 "ግብፀ ካዎይነ እያ ኦላንቾት፥ ማሻን ሀይቅዳ ኦላንቾታ ያን በእድ ምነታና" ያጌስ ኡባ ሃርያ ጎዳይ።
32 "ታ ሀይሳፈ ካሰ ካዎተት ግብፀ ካዋስ ያያና መላ ኦዳባ ግድኮካ፥ እነ እያ ኦላንቾት ጎዳ አማኖና፥ ማሻን ሀይቅዳ አሳታራ እስፈ ዝንአና" ያጌስ ኡባ ሃርያ ጎዳይ።