እዮባ ሃሳያ
1 ያትን እዮብ ሀይሳዳ ያግድ ዛርስ፤
2 አነ ታ ኦዳ አኬክድ ስእተ፤
ሄስ ህንተ ታና ምንዳ መላ ግዶ።
3 ታኒ እስ ቶሆ ኦደታና መላ ታዉ ዎደ እምተ፤
ታኒ ሃሳያ ስምኮ ታና ቀልቅስተ።
4 ታኒ ሞተተይ አሳራ ግደና።
ያትን፥ ዳንዳአይ ዉርኮ ሄስ ማላልስዬ?
5 አነ ታና ፄልድ ማላለትተ፤
ህንተ ኩሽያ ህንተ ዶና ቦላ ዎተ።
6 ታ ሄሳ ቆፕያ ዎደ ታና ዳጋንስ፤
ታ አሳተይ ኮኮሬስ።
7 ኢታ አሳት አይስ ፓፃ ደኦና?
ኤንታ ላይይ አይስ አዱቂ?
ኤንታ ዎልቃይ አይስ ዳር ዳር ብዴ?
8 ኤንታ ናይትነ ናይታ ናይት፥
ድጭሽንነ እንጀን ደእሽን ኤንቲ አይስ በኦና?
9 ኤንታ ሶይ ህርግ ባይና ሳሮ ደኤስ፤
ፆሳ ፃምአይ ኤንታ ጋከና።
10 ኤንታ ሚዛት ብራይስ ኤክድ ኮፆኮና፤
የልሸ አዉጫዮኮና።
11 ባንታ ናይታ ዶርሳ ዉደዳ ከሶሶና፤
ኤንታ ናይት ዱሮሶና።
12 ካራቦ ባቅሸ ዲ ዲፅሸ፥
ሱሱልኤ ፑንሸ ኡፋይሳን የፆሶና።
13 ኤንቲ ባንታ ደኦ ላይ እንጀን ደእድ፥
ዱፎ ሳሮራ ቦሶና።
14 ግዶሽን፥ ኤንቲ ፆሳኮ "ኑፐ ሃካ!
ኑኒ ነ ኦግያ ኤራናዉ ኮዮኮ" ያጎሶና።
15 "ኑ እያ ጎይናናዉ ኡባ ዳንዳእያ ፆሳይ ኦኔ?
ኑ እያ ዎስድ አይ ጎኤታኔ?" ያጎሶና።
16 ኤንቲ ዱረተ ባንታ ምኖተን ደምዳ ጎሶና፤
ሽን ታኒ ኤንታ ቆፋ ኤክከ።
17 "ሀኖሽን፥ ኢታ አሳ ፆምፐይ ቶኢ?
ኤንታና ቦሽ ጋክ ኤሪ?
ፆሳይ ባ ሀንቁዋን ኤንታ ሴር ኤሪ?
18 ጫርኮይ ኤንታ ካለዳ ኤፍዳ ዎደይ፥
ጎተይ ኤንታ ባናዳ ደንዳ ዎደይ ደኢ?
19 ህንተ፥ ‘ፆሲ አዋታ ባላ ግሾ ኤንታ ናይታ ሴሬስ’ ያጌታ።
አነ ፆሳይ ናጋራንቾታ ኤንታ ሁጰን ሴሮ፤
ያትኮ ኤንቲ ባንታ ናቁዋ ኤራና።
20 ናጋራንቾት ባንታ ሴራ ባንታዉ ኤኮ፤
ኡባ ዳንዳእያ ፆሳ ሀንቆይ ኤንታ ቦላ ዎ።
21 አስ ሀይቅዳፐ ጉየ፥
ባ ናይታባ አይ ኤሪ?
22 "ቃ በሳን ደኤይሳታ ፕርድያ ፆሳ፥
ኤራተ ታማርሳናዉ ዳንዳእያ አስ ደኢ?
23 እስ እስ አስ ኩመ ዎልቃይነ ሳሮይ ደእሽን፥
እንጀ ዱሱ ደእሸ ሀይቆሶና።
24 ኤንታ አሳተይ ኦርደ ሽን፥
ኤንታ መቀ ኮልዘይ ሽጫ ደእሽን ሀይቆሶና።
25 ሽን ሀራት ሎኦባ በኦና፥
መቶን ኡንኤትድ ካዮትዳ መላ ሀይቆሶና።
26 ናምአይካ ሀይቅድ ቢታን ሞገቶሶና፤
ኤንቲ ጉፁንቶሶና።
27 "ህንተ ታና ቆሀናዉ ቆፕድ፥
ህንተ ዎዛናን ቆፕዳ ቆፋ ታ ሎይዳ ኤራይስ።
28 ህንተ፥ ‘ሄ ግታ ኡራ ኬይ አዉኔ?
ኢታ ኦያ ኡራይ ደእያ ሶይ አዉኔ?’ ያጌታ።
29 ኦገ አሳታ ኦይችቤከቲ?
ኤንታ ማርካተ አማንበከቲ?
30 ኤንቲ፥ ‘ኢታ አሳይ ዮ ጋላስ ቆሄቶኮና፤
ፆሳ ሀንቆይ ቆንጭያ ጋላስ ኤንቲ አታና’ ያጎሶና።
31 ኢታ አስ እያ ኢታተ ግሾ ካጫናይ ኦኔ?
እያ ኦሱዋ ግሾ እያ ሴራናይ ኦኔ?
32 እ ሀይቅን፥ እያ አሀ ዱፎ ኤፎሶና፤
እያ ዱፎይ ቦንቾን ናገቴስ።
33 ዛንጋራ ቢታይ እያዉ እንጀቴስ፤
ዳሮ አሳይ እያ ስንን ቦሶና፤
ታይቦይ ባይና አሳይ እያ ካሎሶና።
34 ያትን፥ ህንተ ታና ፓና ቃላን ዋት ምንኔ?
ህንተ ታ ኦይሻስ ዛርያ ዛሮ ኡባይ ዎርዶ" ያግስ።