እዮባ ሃሳያ
1 እዮብ ሀይሳዳ ያግድ ዛርስ፤
2 "ኔኒ ዎልቅ ባይናይሳ አይባ ማዳዲ?
ዳቡራንቹዋ ዋታ አሻዲ?
3 ጭንጫተ ፓጭዳይሳስ አይ ዞረ እማዲ?
አይ መላ ኤራተ ቆንጭሳዲ?
4 ኔኒ ሀ ቃላ ኦደታና መላ ነና ማድዳይ ኦኔ?
ነ ኦዳን መላ ነና ደንዳይ ኦደ አያኔ?" ያግስ።
በልዳዶሳ ሃሳያ
5 በልዳዶስ ዛሪድ፥ "ሀይቅዳ አሳ አያናት፥
ጋርሳን ሃ ግዶን ደኤይሳት ኮኮሮሶና።
6 ፆሳ ስንን ስኦለይ ቆንጨ፤
አይብካ እያ ገንናዉ ዳንዳኤና።
7 ፆሳይ ፑደሀ ሳሎታ ጮ ምጭስ፤
ሳኣ ካቆይ ባይና በሳን ካቅስ።
8 እ ሻራታን ሃ ኩንስ፤
ሃ ዴፁዋን ሻራት ዳከቶኮና።
9 እ ባ ሻራ ምጭድ፥
ኩም አጌና ካሜስ።
10 ፖኦ ማፐ ሻካናዉ፥
አባ ጋፃን ፆሳይ ዛዋ ዎስ።
11 እ ሀንቀትያ ዎደ፥
ሳሎ ቱቀት ዳጋማን ኮኮሮሶና።
12 ባ ዎልቃን አባ ስእ ኦስ፤
ባ ጭንጫተን ራኣባ ጌተትያ ዶኣ ይሴስ።
13 እ ባ ሸምፑዋን ሳሎታ ጌሼስ፤
እያ ኩሸይ ፆንገትያ ሾሻ ጫዴስ።
14 ሀይሳቲ ፆሳይ ኦያ ኦሶታፐ ጉታ፤
ኑ እያ ካልካሻ ፃላላ ስኦስ፤
እያ ዎልቃ ደሹዋ አኬካናዉ ዳንዳኤይ ኦኔ?" ያግስ።