እዮባ ማፃፋ 39

1 "ዎሽኤይ አዉደ የልያኮ ኔኒ ኤራይ?

ባቾት ባናክድ ባንታ ማራታ የልያ ዎደ በአዲ?

2 ኤንቲ አይ መላ አጌና ጋምእያኮ፥

አዉደ የልያኮ ነ ኤራይ?

3 ኤንቲ ጉልባት ኤቀትድ፥

ባንታ ማራታ የለይ አዉደኮ ኤራይ?

4 ኤንታ ማራት ባዞን ድጭድ ምኖሶና፤

ባንታ አየታ አግድ ቦሶና፤ ናምአን ጉየ ስሞኮና።

5 "ዎራ ሀረት የዳ ዳናዳ ኦዳይ ኦኔ?

ቃሾፐ ኤንታ ብርሽድ የድዳይ ኦኔ?

6 ኤንታዉ ባዙዋ ደእያ በሲ ኦዳ እማስ፤

ማፅነ ቢታን ኤንቲ ዳናዳ ኦስ።

7 ካታማ ዋሱዋፐ ሃክድ ደኦሶና፤

ላገይስታ ቆደ ስኦኮና።

8 ኤንቲ ደረታ ቦላ ባንታና ሄሞሶና፤

ያን ምያ ፑርጮ ማታ ቆሮሶና።

9 "መን ነዉ ኦናዉ ኤሮ ጋንዴ?

ዎይኮ ነ ዛዳሎን ቃማ አቃንዴ?

10 ጎያና መላ ነ እያ ዋፃኔ?

ዎይኮ ዋፃዳ ጎያናዉ ዳንዳአይ?

11 ኔኒ እያ ዎልቃ ምኖተን አማነታኔ?

ዴፆ ኦሶ እ ኦና መላ እያዉ የጋ አጋኔ?

12 ኔኒ ካ ሻለን ቆላና መላ፥

ዎይኮ ዉዱማን ሺሻና መላ እያ አማናይ?

13 "ያንቾይ ባ ቀፍያ ኤለሳዳ ቃዉሱ፤

ሽን ሃ ካፎዳ ፕራናዉ ዳንዳኡኩ።

14 ያንቾይ ባ ጱጱልያ ቢታን ጱጱላዉሱ፤

ሻፈን ሆአና መላ አጋጋዉሱ።

15 ‘ቶሆይ መንና፥

ባዞ ዶአት የና’ ጋዳ ቆፑኩ።

16 ናይት ባባ ግዶናዳ ኦዳ ኤንታዉ ዳሮ ኢታዉሱ።

እ ዳቡራ ኡባይ መላ አተይስ እዉ አይኮካ ዳነና።

17 ሄሳዳ ኦዳ እዮ ጭንጫተ ድግዳይነ

አኬካ ይስዳይ ታና።

18 ሽን ደንዳዳ እያ ዎፅያ ዎደ፥

ባራ ጋደትያ ፓራ ቦላነ ፓራዋ ቦላ ሚጫዉሱ።

19 "እዮባ፥ ፓራታስ ዎልቃ እምዳይ፥

ዎይኮ ፓራታ ሞርገን ጭምባ ማይዝዳይ ነኔ?

20 ፓራት ቦለዳ ጉፓናዳነ

ጋርማምድ ዳጋንናዳ ኦዳይ ነኔ?

21 ፓራት ባንታ ዎልቃን አማነትድ ስኮሶና፤

ኦለታናዉ ኦላ ደምባ ጋላቦሶና።

22 ያሽ ኤሮኮና፤ ኤንታ አይብካ ዳጋንና፤

ኤንታ ቦላ ማሻ ሾድኮካ ጉየ ስሞኮና።

23 ኤንታ ቶግያ ኦላንቾት ኦይክዳ ኦላ ሚሸት፥

ጶልሸ እሶይ እሱዋራ ጋሄትድ ጊሮሶና።

24 ሽን ፓራት ቢታ ካሽሸነ ያሽስሸ ጋላቦሶና፤

ሞይዘ ግርስ ስእያ ዎደ ስእ ግድ ኤቃናዉ ዳንዳኦኮና።

25 ሞይዘይ ፑነትያ ዎደ ኡፋይሳን ጋርማሞሶና፤

ኦላ ፔኖ ሃሆን ኤኮሶና፤

ቶራ ሞጮና ኪታነ ኦላንቾታ ጬቁዋ ስኦሶና።

26 "ፅሎይ ባ ቀፍያ ዱገሀ ባጋ ምጭድ፥

ፓላናዉ ዳንዳኤይ ነ ጭንጫተኔ?

27 አርጋን ፑደ ከይድ፥

ባ ኬ ቃ ደረታ ቦላ ኬፀይ ነ ኪታኔ?

28 አርጋን አፎ ዶናን ባ ኬ ኬፅድ ደኤስ፤

ዛላ ቆጶት እያዉ ቆልአ ግድዶሶና።

29 ያን ኡትድ ባዉ ምያባ ዎቼስ፤

እያ አይፈይ ሃሆን ጌሽድ ደሜስ።

30 አርጋን ናይት ሱ ኡዮሶና፤

ጋዉፅ ደእያ በሳን ሺቆሶና" ያግስ።