እዮባ ሃሳያ
1 እዮብ ዛሪድ፥
2 "ኤ፥ ህንተ ገይስ ቱማ ግደይሳ ታ ኤራይስ፤
ሽን አስ ፆሳ ስንን ዋንድ ፅሎ ግዳናዉ ዳንዳኢ?
3 እያራ ኦን ፓላማናዉ ዳንዳኢ?
እ ኦይችያ ሙኩሉ ኦይሻታፐ እሱዋካ ዛራናዉ ዳንዳኤና።
4 ፆሳይ ጭንጫነ ዎልቃማ፤
እያራ ኤቀታናዉ ዳንዳኤይ ኦንካ ባዋ።
5 ቆፖና ደእሽን ደረታ ኤንታ በሳፈ ድጌስ፤
ባ ሀንቁዋን አድ የጌስ።
6 እ ቢታ እያ በሳፈ ቃስ፤
ቢታ ቱቀታካ ይጌስ።
7 አዋይ ከዮና መላ ኦስ፤
ፆልንቶት ፖኦና መላ ድጌስ።
8 እ ባርካ ሳሎታ ምጭስ፤
አባ ሆቢያ ቦላ ሄመቴስ።
9 ፆሳይ ቢረ፥ ኦርዮና፥ ፕላድሳ ጌተትያ ፆልንቶታነ፥
ዱገሀ ባጋራ ደእያ ፆልንቶ ኮጬታ መስ።
10 እ አስ ፕልግድ ኤራናዉ ዳንዳኦና ግታባታ፥
ታይበቶና ማላልስያባታ ኦስ።
11 እ ታ ማታራ አያ ዎደ ታ በአናዉ ዳንዳእከ፤
እ ታኮ ሺቅያ ዎደ ኤራናዉ ዳንዳእከ።
12 እ ቦንቅኮ ድጋናዉ ዳንዳኤይ ኦኔ?
‘ዋታይ?’ ያግድ እያ ኦይቻናይ ኦኔ?
13 ፆሳይ ባ ሀንቁዋ ተቀና፤
ራኣባ ጌተትያ ዶአ ማደይሳት
እያ ቶሁዋ ጋርሳን ኩንዶሶና።
14 ያትን፥ እያ ኦይሻ ዛራናዉ፥
እያራ ሞተታናዉ ታኒ ኦኔ?
15 ታኒ ፅሎ ግድኮካ፥
ፕርድያ ፆሳይ ታና ማራናዳ ዎሳናፐ አትሽን፥
ታኒ እያዉ ዛሮ እምከ።
16 ታ እያ ፄግን፥ እ ታዉ ኮያኮካ፥
ታና ስኤስ ጋዳ አማንከ።
17 ታና ጎተን መንረስ፤
ጋሶይ ባይና ታ ማዱን ዳርሴስ።
18 ታና ሸምፖ ድጌስ፤
ታ ደኡዋ ጫመስ።
19 ዎልቃባ ግድኮ፥ እ ዎልቃማ።
ፅሎ ፕርዳባ ግድኮ፥ እያ ፕርዳ ኬ ሺሻናይ ኦኔ?
20 ታኒ ታና ፅሎ ጊኮካ ታ ዶናይ ታና ባላ ከሴስ፤
ታናን ቦረይ ባዋ ታ ጊኮካ ታ እንፃርሳይ ታና ጌላ ከሴስ።
21 ታኒ ቦረይ ባይና አስ ግድኮካ ታባ ቆፕከ፤
ታኒ ታ ደኡዋ ካይስ።
22 ፆሳይ ቦረይ ባይናይሳነ ኢታ እስፈ ይሴስ፤
ታ ዱማተ ባዋ ገይ ሄሳ ግሾሳ።
23 ጋዶይ ገልድ አሳ ቆፖና ዎያ ዎደ፥
እ ፅሎ አሳ ዋያን ሚጬስ።
24 ሀ ሳአይ ኢታ አሳ ኩሸን ዎያ ዎደ፥
እ ፕርደይሳታ አይፍያ ጎዜስ።
ሄሳ ኡባ ኦይ እያ ግዶና እፅኮ፥ ሀር ኦኔ?
25 ታ ደኦ ላይት ዎፅያ ኡራፐ አድ ኤለሶሶና፤
ኤንቲ ሎኦባ በኦና ፕራድ ዮሶና።
26 ታ ደኦ ላይይ ፓልካ ዎጎሎዳ ዎፄስ፤
አርጋን ምያባ ኦይካናዉ ሳሎፐ ዱገ ፓለይሳዳ ፓለስ።
27 ‘ታ ዙዙን ዶጋና፤
ሶምኦ ቱከይሳ አጋዳ ፖእሳና ግያኮ፥’
28 ኔኒ ታና ጌሽ ጎናይሳ ታኒ ኤርያ ግሾ፥
ታና ጋካና ዋየ ኡባ ታኒ ያያይስ።
29 ያትን፥ ታኒ ባላ ግደይስ አቶና እፅኮ፥
ጮ መላ አይስ ዳቡራይና?
30 ታኒ ታ አሳተ ሀር አቶሽን ሳሙናን ሜጨትያኮካ፥
ታ ኩሽያ ዱማባራ ሜጨትያኮካ፥
31 ታ ማኦይካ ታና ሻተታና ጋካናዉ፥
ኔኒ ታና ኡርቃ ኦላን ሆላና።
32 ታ እያዉ ዛሮ እማናዉ ፆሳይ ታ መላ አሰ ግደና፤
ግድያኮ ኑ ናምአይ ዳይና ስንን ኤቃና።
33 ሽን ኑ ናምኣ ቦላ ባ ኩሸ ዎድ፥
ኑና ስገያ አስ ኑ ግዶን ደኤረነ!
34 እያ ቴሞይ ታና ዳጋንና መላ፥
እስ አስ ፆሳ ፃምኣ ታፐ ድገረነሽን!
35 ያንኮ፥ ታኒ እያዉ ያዮና ኦደታና፤
ሽን ሀእ ታኒ ዳንዳእከ።