1 ካናነን ኦላ ሜዘትቦና እስራኤለ አሳ ፓጫናዉ ጎዳይ ካናነን አሽዳ አሳይ ሀይሳታ። 2 እ ሄሳ ኦዳይ ሀይሳፈ ካሰ ኦላ ሜዘትቦና እስራኤለ የለተ ኦላ ሂላ ታማርሳናሳ። 3 ሄሳትካ እቻሹ ፍልስፄመ ሀላቃታ፥ ካናነታ፥ ስዶናታነ ባኣል-አርሞና ዙማፐ ዶምድ ሀማታ ጋካናዉ ልባኖሰ ዙማ ቦላ ደእያ ህወታ። 4 ጎዳይ ሙሰ ባጋራ ካሰ እስራኤለ ማይዛታስ እምዳ ኪታ ኤንቲ ኪተትያኮነ ኪተቶናኮ ፓጫናዉ ኤንታ ከሶና አግስ። 5 ያትን፥ እስራኤለ አሳይ ካናነታራ፥ ህተታራ፥ አሞረታራ፥ ፓርዘታራ፥ ህወታራነ ያቡሰታራ እስፈ ደእዶሶና። 6 ኤንታ ማጫ ናይታ ባንታዉ ኤክዶሶና፤ ባንታ ማጫ ናይታ ኤንታ አደ ናይታስ እምዶሶና። ያትድ ኤንታ ፆሳታ ጎይንዶሶና።

7 እስራኤለ አሳይ ጎዳ ስንን ኢታባ ኦዶሶና። ኤንቲ ጎዳ ባንታ ፆሳ ዶግድ፥ ባኣለነ አሼራ ጌተትያ ፆሳታ ጎይንዶሶና። 8 ሄሳ ግሾ፥ ጎዳ ሀንቆይ እስራኤለ አሳ ቦላ ኤፅስ። ጎዳይ ማሰጰፆመ ካዋ ኩሻን-ርሻታይም ኤንታ ሃራና መላ አድ እምን፥ ኤንቲ እያዉ ሆስፑን ላይ ሃረትዶሶና።

9 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ካለባ ካሎ እሻ ቃናዘ ናኣ ጎቶንያላ ደንስ። 10 ጎዳ አያናይ እያ ቦላ ዎን፥ እ እስራኤለ ቦላ ፕርደይሳ ግድስ። እ ኦላስ ከይዳ ዎደ ጎዳይ ማሰጰፆመ ካዋ ኩሻን-ርሻታይማ እያዉ አድ እምን ፆንስ። 11 ያትን፥ ቢታይ ኦይታሙ ላይ ዎፑ ግድ ደእስ። ሄሳፈ ጉየ፥ ቃናዘ ናአይ ጎቶንያል ሀይቅስ።

12 እስራኤለ አሳይ ዛሪድ ጎዳ ስንን ኢታባ ኦዶሶና። ሄሳ ግሾ፥ ጎዳይ ሞአበ ካዎይ ኤግሎን እስራኤለ ቦላ ዎልቃታናዳ ኦስ። 13 ኤግሎን አሞነታነ አማለቃታ ሺሽድ እስራኤለ አሳ ኦል ፆንድ፥ ዛምባ ካታማ እያርኮ ኦይክስ። 14 ያትን፥ እስራኤለ አሳይ ሞአበ ካዋ ኤግሎናስ ታማነ ሆስፑን ላይ ሃረትዶሶና።

15 ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ብንያመ ኮቸ ግድዳ ጌራ ናኣ ናኦዳ፥ ሀድርሳ ኩሸን ኦይሳ ደንስ። እስራኤለ አሳይ ናኦዳ ሞአበ ካዋ ኤግሎናኮ ጊራራ ኪትስ። 16 ናኦድ ናምኡ ባጋራ ቃራትዳ እስ ዋ ማሸ ጊግስድ ኡሻቻ ባጋን ባ ማኡዋ ጋርሳን ዳንጭስ። 17 ሄሳፈ ጉየ፥ ዳሮ ኦርደ ግድዳ ሞአበ ካዋ ኤግሎናስ ጊራ ኤፍድ እሚስ። 18 ናኦድ ጊራ ካዋስ እምዳፐ ጉየ፥ ጊራ ቶክድ ብዳ አሳ ሞይዝስ። 19 ሽን ናኦድ ጋልጋላ ማታን ደእያ ማሰትዳ ሹቻታ ማታፐ ኤግሎናኮ ጉየ ስም ብድ፥ "ካዋዉ፥ ታ ነዉ ኦድያ እስ ፁር ደኤስ" ያግስ።

ካዎይ፥ "ስእ ጋ" ያግስ። እያ ናገይሳት ኡባይ ካረ ከይዶሶና።

20 ሄ ዎደ ካዎይ ፖቅያ ቦላ እስ ክፍልያን ባርካ ኡትዳሽን፥ ናኦድ እያኮ ሺቅድ፥ "ፆሳይ ነዉ ኪትዳባይ ደኤስ" ያግን፥ ካዎይ ባ ኡትዳ በሳፈ ደንድ ኤቅስ። 21 ናኦድ ባ ሀድርሳ ኩሽያ የድድ፥ ኡሻቻ ባጋ ፄሳን ደእያ ማሻ ሾድድ፥ ካዋ ኡሉዋን ድርግም ኦስ። 22 ማሻ ቱይተይ አቶና ኡሎ ግዶ ገልድ፥ ዞኩዋራ ካን ከይስ። ሞይ ካምዳ ግሾ ናኦድ ማሻ ካዋ ኡሉዋፐ ሾድቦና። 23 ሄሳፈ ጉየ፥ ናኦድ ካረ ከይድ፥ ክፍልያ ፐንግያ ጎርድድ እያ ቦላ ቁልፕስ።

24 ናኦድ ብዳፐ ጉየ አይለት ይድ፥ ፐንገይ ጎርደትዳይሳ በእድ፥ "ካዎይ ግዶ ክፍልያን ሼሻስ ኡቶና አገና" ያግድ ቆፕዶሶና። 25 ኤንቲ ሳለታና ጋካናዉ ናግዶሶና። ሽን ካዎይ ፐንግያ ዶዮና እፅን፥ ቁልፐ ኤክድ ፐንግያ ዶይድ፥ ባንታ ጎዳይ ሀይቅድ፥ ዉይገን ኩንድዳይሳ በእዶሶና።

26 ኤንቲ ያን ኤቅድ ናግሽን፥ ናኦድ ከስ ኤክድ ኤቃ ሹቻታ ማታራ አድ ሳኢራ ባቃትስ። 27 እ ብድ ደረይ ዳርያ ኤፍሬማ ቢታ ጋክዳ ዎደ እስራኤለ አሳይ ኦላስ ሺቃና መላ ሞይዘ ፑንን፥ አሳይ እያ ካልድ ዱገ ዎዶሶና። 28 እ ኤንታኮ፥ "ታና ካልተ፤ ጎዳይ ህንተ ሞርከታ፥ ሞአበታ ህንተ ኩሸን አድ እሚስ" ያግስ። ኤንቲ እያ ካል ዎድ፥ ዮርዳኖሰ ሻፋ ፕንያ በሳ ኦይክዶሶና። ሞአበ አሳፐ እስ አስካ ያራ አና መላ ተቅዶሶና። 29 ሄ ዎደ ሞአበ አሳፐ ታሙ ሙኩሉ ግድያ ዶረትዳ ምኖ ኦላንቾታ ዎዶሶና፤ እስ አስካ ከስ ኤክቤና። 30 ሄ ጋላስ እስራኤለ አሳይ ሞአበ አሳ ፆንዶሶና። ቢታይ ሆስፑን ታሙ ላይ ዎፑ ግድ ደእስ።

31 ናኦዳፐ ጉየ፥ አናታ ናአይ ሳምጋር ደንድድ፥ ፍልስፄመ አሳፐ ኡሱፑን ፄቱ አሳ ቦሩ ላግያ ብራታ ፃምአን ዎድ እስራኤለ አሳ አሽስ።