1 አሳ ደኦይ ሳአ ቦላ ዎልቃማ ባፀ ግደነዬ?

እያ ላይይ ኡነ ኦያ አሳ ደኦ መላ ግደነዬ?

2 ዉልያ አዋ አሞትያ ጋቻ መላ፥

ዎይኮ ባ ዳሞዝያ ኤካናዉ ናግያ ኦሳንቾዳ፥

3 ሄሳዳ ታዉ መላ አጌናት

መቶ ቃማት እመትዶሶና።

4 ታኒ ዝንእያ ዎደ አዉደ ባርካንድናሻ ጋይስ፤

ሽን ቃማይ ታዉ አዱቄስ፤

ሳእ ዎንታና ጋካናዉ ሂፃን ሽረታ ሽረታ ዎይስ።

5 ታ አሳተይ ጉፁንትስ፤

ታ ማዱንይ ጊሽ ጎጌስ።

6 ታ ላይይ ዶርዘ ሞቀፐ አድ ኤለሴስ፤

ኡፋይስ ባይናሽን ታ ላይይ ዉሬስ።

7 አቤት ፆሳዉ፥ ታ ላይይ እስ ሸምፖ መላ ግደይሳ ቆፓ!

ታ አይፈይ ዛሪድ ኬሀባ በኤና።

8 ሀእ በኤይ ዛሪድ በኤና፤

ታና ኮያና ሽን ዛር ደመና።

9 ሻር ላለትድ የይሳዳ፥

ዱፎ ዎያ አስ ስሚድ ከየና።

10 ባ ሶ ስሚድ ዬና፤

እያ ኤርያ አሳይካ ዶጌስ።

11 "ሄሳ ግሾ፥ ታ ስእ ጊከ፤

ታ አያና ኡንኤተ ኦዳና፤

ታ ሸምፑዋ ጫመተ ግሾ ዙዙማና።

12 ሄሳ መላ ኔኒ ታና አይስ ናጋይ?

ታ ነዉ አባ ዎይኮ አባን ደእያ ኢታ ዶአ ጋድዬ?

13 ‘ታ ሂፃይ ታና ምንና፤

ታ አርሳይ ታና ዙዙንፈ ሸምፕሳና!’ ጋዳ ቆፓስ፤

14 ሽን ኔኒ ታና አሙሆን ያሽሳሳ፤

ቆንጨን ታና ዳጋንሳ።

15 ታኒ ሀ ዋየይ ኩምዳ አሳተ ቶካዳ ዳናፐ፥

ሱለታዳ ሀይቅያኮ ዶሳይስ።

16 ታኒ ታ ደኡዋ ሻተታስ፤ ዳናዉ ኮይከ፤

ታ ላይይ እስ ሸምፖ መላ ግድያ ግሾ ታና አጋርክ።

17 ነ እያ ግታያዳ ፄላናዉ አስ አይቤ?

ነ እያዉ ቆፓናዉ አስ አይቤ?

18 ዎንታ ዎንታ ነ እያ ፆሞሳሳ፤

ዎደን ዎደን ነ እያ ፓጫሳ።

19 ነ ታ ቦላ አይፈ ዎይሳ አግኪ?

ጩቹ ምትያ ዎደ ታዉ እምኪ?

20 አቤት አሰ ካለይሶ፥

ታ ናጋራ ኦን ነና አይ ቆህዴ?

ነ አይስ ታና ጫዳ ኦይካይ?

ነዉ ታ ቶሆ ግዳድናዬ?

21 ታ ናቁዋ አይስ አግኪ?

ታ ናጋራ አይስ አቶ ጊኪ?

ታ ዱፎ ገልያ ዎደይ ጋክስ፤

ነ ታና ኮያና፥ ሽን ህዛፐ ደማካ" ያግስ።