Levítico 21

ካህነታስ እመትዳ ዎጋ

1 ጎዳይ ሙሰኮ፥ "ካህነ ግድዳ አሮና አደ ናይታስ ሀይሳዳ ያጋዳ ኦዳ። ህንተፈ ኦንካ 2 ባ ማታ ዳቦ፥ ባ አየ፥ ባ አዋ፥ ባ አደ ናኣ፥ ባ ማጫ ናኤ፥ ባ እሻ፥ 3 ዎይኮ አዝና ገሎና፥ እያ ሶን ደእያ ባ ምቸ አሀ ግዶና እፅኮ፥ ሀይቅዳ አሳ አሀ ቦችድ ባና ቱንሶፖ። 4 ኤኮንነ ገሎን ዳቦትዳ አሳ አሀ ቦችድ ባና ቱንሶፖ።

5 "ካህነት ካዮስ ባንታ ሁጵያነ ባንታ ቡቻ ሜዶፖ፤ ዎይኮ ባንታ አሳተ ጋሮፖ። 6 ኤንቲ ጎዳስ ፁሳ ያርሾነ ካ ያርሾ ሺሽያ ካህነታ ግድያ ግሾ ባንታ ፆሳስ ጌሽ ግዶ፤ ባንታ ፆሳ ሱን ቱንሶፖ። ሄሳ ግሾ፥ ኤንቲ ጌሽ ግዳናዉ በሴስ።

7 "ካህነት ባንታ ፆሳስ ጌሽ ግድያ ግሾ፥ ካህነት ላይማ ማጫስ፥ ጌላኦ ግዶና ማጫስ ዎይኮ አዝን የድዳ ማጫስ ኤኮፎ። 8 ካህነት ህንተ ፆሳስ ካ ያርሾ ያርሸይሳታ ግድያ ግሾ፥ ህንተ ኤንታ ጌሽ ኦድ ኤክተ። ህንተና ጌሽያ ጎዳይ፥ ታኒ፥ ጌሽ ግድያ ግሾ፥ ኤንቲ ጌሽ ግዶ። 9 ካህንያ ናእያ ላይማታዳ ባና ቱንስኮ፥ እያ ባ አዋ ካዉሻሱ፤ እያ ታማን ፁገታዳ ሀይቆ።

10 "ካህነ ሀላቃይ፥ እያ ሁጰን ትዮ ዛይተይ ጉክዳይስነ ካህነተ ማኡዋ ማአናዉ ዱማትዳይስ፥ ባ ሁጵያፐ ፃ ቃጭያ ደንፎ፤ ባ ማኡዋ ዳኮፎ። 11 አህ ደእያ ሶ ገሎፖ፤ ሀር አቶሽን ባ አዋ ዎይኮ ባ አየ አሀ ግድኮካ፥ ሄሳ ቦችድ ባና ቱንሶፖ። 12 እያ ዱማያናዉ ትይዳ ፆሳ ዛይተይ እያ ቦላ ደእያ ግሾ፥ ካህነይ ጌሻ ዱንካንያፐ ከዮፖ፤ ጌሻ ዱንካንያ ቱንሶፖ። ታኒ ጎዳ።

13 "እ ኤክያ ማችያ ጌላኦ ግዶ። 14 አዝን ሀይቅዳ ማጫስ ዎይኮ አዝን የድዳ ማጫስ ዎይኮ ላይማ ማጫስ ማቾ ኤኮፎ። ሽን ባ አሳ ግዶፈ ጌላኦ ማጫ ናአ ዶርድ ማቾ ኤኮ። 15 ሄስ ሀኖና እፅኮ፥ ባ አሳ ግዶን ባ ናይታ ቱና ኦስ። ታኒ እያ ጌሸይሳ፥ እያ ጎዳ።"

16 ጎዳይ ሙሰኮ ሀይሳዳ ያግስ። 17 "ኔኒ አሮናስ ሀይሳዳ ያጋዳ ኦዳ፤ ነ ኮቻፈ አሳተን ቦረይ ደእያ ኦንካ ካ ያርሾ ታዉ ያርሻናዉ በሰና። 18 አሳተን ቦረይ ደእያ አስ፥ ሄስካ ቆቀ ዎይኮ ዎበ ዎይኮ ሶምኦይ ኢትዳ አስ ዎይኮ ላቆይ ደእያ አስ፥ 19 ዎይኮ ቶሆይ ዎይኮ ኩሸይ ስልዳ አስ፥ 20 ዎይኮ ኩና አስ ዎይኮ ዳሮ ቃን አስ ዎይኮ አይፈ ሙልጫ አስ ዎይኮ ፑሶይ ኦይክዳ አስ ዎይኮ እራለይ ደእያ አስ ዎይኮ ሹፋ አስ ታዉ ካ ያርሾ ያርሻናዉ በሰና። 21 ካህንያ አሮና ኮቻፈ አሳተን ቦረይ ደእያ አስ ኦንካ ጎዳስ ፁሳ ያርሾነ ካ ያርሾ ሺሻናዉ ያርሾ በሳ ያናዉ በሰና። 22 እ ጌሻ ካነ ኡባፈ ጌሽ ግድዳ ባ ፆሳ ካ ማናዉ ዳንዳኤስ። 23 ሽን እያ አሳተን ቦረይ ደእያ አስ ግድያ ግሾ፥ እ ታ ዱንካንያ ቱንሶና መላ ማጋራጁዋኮ ዎይኮ ያርሾ በሳኮ ሺቆፖ። ኤንታና ጌሽያ ጎዳይ ታና።"

24 ሙሰይ ሄሳ ኡባ አሮናስ፥ እያ አደ ናይታስነ እስራኤለ አሳ ኡባስ ኦድስ።