1 GODAY wordo geeddara ixxees;

gido attiin suure

geeddaran ufayettees.

2 Otoroteththi kawushshateth kaaleththees;

ashketeththi gidikko

aadho erateth ehees.

3 Xillota istta suureteththi kaaleththees;

gido attiin wordanchchata

istta wordoteththi dhayssees.

4 Hanqo gallas dureteththi go7enna;

gido attiin xilloteththi

hayqoppe ashshees.

5 Borey baynda asata

istta xilloteththi

isttas oge suurisees;

gido attiin iitati bantta

iitateththan kundeettes.

6 Suureta istta xilloteththi ashshees;

gido attiin malteti

bantta iita

amon oykettana.

7 Iita asi hayqqiza wode

iza hidotay hada gidees;

ba wolqqan izi ceeqettizaazi

ubbayka dhayees.

8 Xilloy metoppe attees;

gido attiin metoy

iita asa bolla gakkees.

9 Iita asi ba doonan

ba laggeza dhayssees;

gido attiin xilloti erateththan

kessi ekki atteettes.

10 Xillotas injjetiza wode

katamay ufayettees;

qasse iitati dhayza wode

hashshu gees.

11 Suureta anjjo gaason

katamay diccees;

iita haasayan gidikko

katamay dhayees.

12 Wozina pace asi

ba shooroza kadhees;

akeekanchcha asi gidikko

ba doona shiishshi ekkees.

13 Zigirza asi xuura laallees;

ammanettiza asi gidikko

xuura naagees.

14 Kaaleththo pacen

kawoteththi kundees;

daro zoranchchati de7ikko

saroy dees.

15 Erontta asas waasettizay

meton gelees;

waase gelanaas caaqqonttaade

aykkoyka bochchenna.

16 Ulo kiya maccassaya

bonchchettawus;

wolqqaththiza asati

dureteth xalla duretteettes.

17 Kiya asi bana go7ees;

menxe iita asi gidikko

ba bolla meto ehees.

18 Iita asi demmiza wodhey deenna;

xilloteth zeriza asi gidikko

suure woyto ekkana.

19 Xilloy de7o demmana;

gido attiin iitateth

kaalliza asi hayqqana.

20 GODAY iita qofay

de7iza asata shaatettees;

gido attiin suure

hemettizaytan ufayettees.

21 Iita asi qaxxayettontta attenna;

gido attiin xilloti

qaxxayettettenna.

22 Akeekay paccida

maccassa puulateththi

guddunththa siidhen

aaththida worqqa mala.

23 Xillota amos wurseththi lo7o xalla;

gido attiin iitata amos

wurseththi hanqo xalla.

24 Issi issi asati

coo kiyateth immeettes;

gido attiin isttas aqoy

haa haa darees.

Baggati keehi uuzetteettes;

gido attiin istti

manqi manqi beettes.

25 Kiya asi durettana;

haratas immizay

baas woppa demmees.

26 Geemara kath dagasizaade

derey qanggees;

kessi bayzizaadey gidikko

anjjettees.

27 Lo7o miish minththi koyzaade

lo7o miishshi naagees;

gido attiin iita miish koyzaade

iita miishshi gakkees.

28 Ba dureteththan

ammanettiza asi kundana;

xilloti gidikko

lo7o miththa mala cililana.

29 Soo asaa bolla shiro denththiza

asi go7ay baynda attana;

Eeyatikka aadho eranchchatas

aylle gidana.

30 Xillo asi de7o ayfe

ayfiza miththa mala;

shemppota ashshizay

aadho eranchcha.

31 Xilloti sa7an

bantta ooso waaga

ekkizaa gidikko,

iitatinne nagaranchchati

bantta oosos ekkana waagay

waani darandeeshaa!✝