1 Liiqo zaaroy hanqo irxxisees;

pordolo qaalay gidikko

hanqo denththeththees.

2 Aadho eranchcha inxarsafe

erateththi pulttees;

gido attiin dogata doonappe

eeyateththi pulttees.

3 GODAA ayfeti ubbaso xeelleettes;

iitatanne lo7ota ubbaa

lo7eththi be7eettes.

4 Shongay de7iza lo7o haasayay

de7o miththa mala;

gido attiin baleththo haasayay

ayana qohees.

5 Eeyay ba aawa seera kadhees;

gido attiin zore ekkizay

ba akeekateththaa qonccisees.

6 Xillo asa keeththan

daro aqotay dees;

gido attiin iitatas

geliza miishshi meto ehees.

7 Aadho eranchchata doonay

erateth zerees;

eeyata wozinay gidikko

hessa mala deenna.

8 GODAY iitata yarsho shaatettees;

suureta woosay gidikko

iza ufayssees.

9 GODAY iita asata oge shaatettees;

gido attiin xilloteth

kaallizayta dosees.

10 Suure oge aggidi kare ke7idaade

hanqoy naagees;

seera ixxiza asi hayqqees.

11 Duufoninne dhayo giddon dizayssi

GODAA sinththan qoncce;

histtiin asa wozina qofay

waani izappe geemmanee?

12 Qilcciza asi seera dosenna;

aadho eranchchatappekka

zore oychchenna.

13 Wozina ufayssi sinth poo7isees;

wozina ceecey gidikko

ayana qohees.

14 Akeekiza wozinay erateth koyees;

gido attiin dogata doonay

eeyateth banchikees.

15 Manqota de7oy

ubbaa gallassika baaxe.

Ufayettiza asati ubbatokka

bantta de7on ufayetteettes

16 Ooshshi dizason diza gita aqotappe

GODAA yashshateththara diza

guuththa aqotay aadhdhees.

17 Ooshshi dizason

modhdho asho maanaappe

siiqoy dizason

santh muusi aadhdhees.

18 Eeson hanqettiza asi oosh kessees;

dandayza asi gidikko

oosh irxxisees.

19 Azalla asa ogey

agunththan diretti uttides;

suure asa ogey gidikko

baasa gidees.

20 Aadho erara diza nay

ba aawa ufayssees;

gido attiin eeya nay

ba aayo kadhees.

21 Wozina pace asi

ba eeyateththan ufayettees;

gido attiin akeeki

suure oge kaallees.

22 Zorey dhaykko

halchchoy ogen attees;

daro zoranchchati dizason

halchchoy polettees.

23 Asi bessiza zaaro immidi

ufays demmees;

koshshiza woden imettida qaalay

ay mala lo7oo!

24 Duge duufon woththiza

oge bontta mala

de7o ogey aadho eranchcha

pude kaaleththawus.

25 GODAY otoranchchata

keeththa laallees;

gido attiin am7ey zawa naagees.

26 GODAY iitata qofa shaatettees;

geeshshata qofay gidikko

iza ufayssees.

27 Uuze asi baso asa bolla

meto ehees;

gido attiin matta7e ixxiza asi

paxa daana.

28 Xillo asi haasayanaappe

kasetidi qoppees;

gido attiin iita asa doonappe

iita qaalay goggees.

29 GODAY iitatappe haakon dees;

gido attiin xillota woosa siyees.

30 Pashka hanoy wozina ufayssees;

mishiraachcho qaalay

meqeth cililisees.

31 De7o immiza seera ekkiza asi

aadho eranchchatara

issife daana.

32 Seera ixxiza asi bana kadhees;

seera ekkiza asi gidikko

akeeka demmees.

33 GODAAS yashshi

aadho erateth tamaarssees;

bonchchettana koyida asi

koyro bana

kawushshanaas koshshees.