1 Geella yo7o haasayza iita asappe

ba de7on borey baynda

hiyeesa asi lo7o.

2 Erateththi baynda zil7eteththi

lo7o gidenna;

eeso hemetay oge baleththees.

3 Issi issi asay ba eeyateththan

ba de7o moorees;

histtidi GODAA bolla yiillotees.

4 Dureteththi daro lagge medhdhees;

gido attiin manqoteththi

kase diza lagge haassees.

5 Wordo markkay

qaxxayettontta attenna;

wordo puukkizaykka

qaxxayettontta attenna.

6 Daro asay lo7o misatanaas

daanna sinththan alaanththees;

coo immiza asara

asi ubbay dabbotees.

7 Manqo iza dabbo ubbay ixxees;

histtiin iza laggeti ay keena

izappe baqatanee!

Kaalli aadashidikka

izi istta demmenna.

8 Aadho erateth

baas miish ooththizay

bana siiqees;

akeeka siiqizaades injjetees.

9 Wordo markkay

qaxxayettontta attenna;

wordo puukkizaykka dhayana.

10 Eeyati ishalo duus

daanaas bessenna;

aylley godaa bolla godatikko

hessi ay keena iitaa!

11 Aadho erateththi

as dandayanchcha kessees;

qoho yedhdhi aadheththi bonchchon gaththees.

12 Kawo hanqoy gaammo xaago mala;

gido attiin iza sinththan

saba demoy

maata cililissiza ira mala.

13 Eeya nay ba aawa

bashshas aaththi immees;

oosh ehiza machcha

ira aaththiza keeththa mala.

14 Keeththinne aqotay

yelidaytappe laatteettes;

akeekara diza machcha GODAAPPE beettawus.

15 Azallateththi deexo dhisko ehees;

ooso ooththontta asi gafees.

16 Azazo naagizay

ba shemppo naagees;

gido attiin

izo ixxizaadey hayqqees.

17 Manqos kiyiza asi

GODAAS tal7ees;

GODAY he lo7o ooso

waaga qanxxana.

18 Wodera ne naa seera;

izi hayqos bishin

co7u ga xeellofa.

19 Eeson yiillotiza asi

qaxxayettanaas bessees;

neni agga aadhdhiko

hara wodekka

nees hessaththo oosoy attenna.

20 Zore siya; seerakka ekka.

Histtiko neni wurseththan

aadho eranchcha gidana.

21 Asa wozinan daro halchchoy dees;

gido attiin

GODAA qofay polettees.

22 Asappe koyettizay mino siiqo;

wordanchcha gidanaappe

manqoteththi lo7o.

23 GODAAS yashshi de7os kaaleththees;

hessa mala asi woppan dees;

iitaykka iza bochchenna.

24 Azallay ba kushe maaddan yeddees;

gido attiin pude ba doonan

zaaranawu waayettees.

25 Qilccizaade shocikko

wozina pacey akeeka taamarana;

akeekanchcha asa seerikko

izi erateth demmana.

26 Ba aawa bonqqiza nay,

ba aayokka kessi yedeththiza nay

izi yeellateththinne

kawushshateth ehiza naa.

27 Ta naazoo!

Ta zore ne siyontta aggiko,

ne eriza qaalaakka balana.

28 Wordo markkay

suure pirda bolla qilccees;

iita asa doonay

iitateth banchikees.

29 Qilccizaytas pirday,

eeyata zokkos lissoy

giigi uttides.