1 Siyite! Aadho erateththaya ba qaala

doqqu histta xeygekkee?

Akeekaykka ba cenggurssaa

dhoqqu histta sissekee?

2 Oge doonan de7iza

zumbullata bollanne

daggala ogetan eqqawus.

3 Gimbeza lanqen katamata

geliza pengen eqqada

ba qaala dhoqqu histtada,✝

4 hayto asatoo! Tani inttena xeygays;

tani asa zereth ubbaa xeygays.

5 Intteno akeekay paccidaytoo!

wozinama gidite;

intteno eeyatoo akeeka demmite.

6 Tani go7iza miish

yootiza gishshas ezgite;

ta doonappe suure yo7oy kezees.

7 Ta doonay tuma haasayees;

ta metershatikka

iita miish ixxeettes.

8 Ta doonappe keziza qaalati

ubbay tuma;

geella woykko bokka gidettenna.

9 Akeekay diza asas

ta haasayay likke;

erateththi dizaytas

ta haasayan wordoy deenna.

10 Birappe aaththidi ta zore ekkite;

muuruta worqqafe aaththidi

erateth doorite.

11 Ays giikko, «Tani aadho erateththi

zo7o inqqufekka keeha al7ays;

neni amottiza miish ubbayka

tanara ginattanaas dandayenna.

12 Tani aadho erateththi

akeekara days;

erateththinne wozinamateththi

ta miishshata.

13 Godaas yashshateththi iita ixo;

tani otoronne hallaca,

menxe iitateththinne

geella haasaya ixxays.

14 Zoreynne lo7o pirday tayta;

taas akeekaynne wolqqay dees.

15 Kawoti tanan kawoteettes;

dere ayssizayti

suure woga kesseettes.

16 Daannati tani maaddiin

deraa aysseettes;

deraa haariza gita asati

ubbay haareettes.

17 Tana siiqizayta tani siiqays;

minni koyzayti tana demmana.

18 Dureteththinne bonchchoy

ta matan deettes;

wurontta aqotaynne

injjey ta matanna.

19 Intte taappe demmiza go7ay

muuruta worqqafe aadhdhees;

ta imotaykka

seerisi kessida birappe darees.

20 Tani xilloteththa ogen hemettays;

suure pirda kaallays.

21 Tana siiqizaytas

tani dureteth immana;

istta minjja keeththaaka

tani kunththana.

22 «GODAY tana ba ooso ubbaafe

koyro medhdhides;

benippeka iza oosaas

koyroy tana.✝

23 Saloynne sa7ay

medhettanaappe kase

Beni mernaasofe

tani shuumettadis.

24 Wogga gita abbati baynda wode,

haaththa pulttoti

dhuuqqanaappe kase

tani yelettadis.

25 Zumatinne zumbullati

medhettanaappe

kase tani yelettadis.

26 GODAY sa7anne

sa7a bolla diza dembata

woykko alame bolla diza gudullata

medhdhanaappe kase tani yelettadis.

27 GODAY salota miccida wodenne

gita abbatappe bollara

salo gufanththo giigsida wode

tani heen de7ays.

28 GODAY shaarata bollan

woththida wode,

gita abbaa pulttota

dhuussida wode,

29 abbaa haaththati

banttas imettida zawappe

pinnidi aadhdhontta mala

zawa woththida wode,

sa7as yoch yeggida wode,

30 he wode tani iza matan

waanna oosanchcha;

ubbaa gallas tani

ufayssan kumays;

tanikka iza sinththan ufayettays.

31 Izas gidida alame ubbaan

ta ufayettays;

asaa naytankka ta ufayettays.

32 «Ha7ikka ta naytoo!

Tani gizayssa ezgite;

ta oge naagizayti anjjettidayta.

33 Ta timirte siyite;

aadho eranchchata gidite;

wuda dhayopite.

34 Tani yootizayssa siyiza asi,

hach hach ta pengen beettiza asi,

taso gelizasonkka

naagiza asi anjjettidaade.

35 Tana demmiday de7o demmees;

GODAAPPE izi saba demmees.

36 Gido attiin tana

demmontta aggida asi

bana qohees;

tana ixxiza ubbati

hayqo siiqeettes» gadus.