1 Lo7o sunththi

daro dureteththafe aadhdhees;

asa matan bonchcheteththika

birappenne worqqafe aadhdhees.

2 Durenne manqo ubbaa

GODAY medhdhides;

hessan istta naykka issi gina.

3 Akeekanchcha asi iita be7idi

attanaas baqatees;

gido attiin akeekay paccida asi

meton gelidi qohettees.

4 Ashketeththinne GODAAS yashshi,

dureteth, bonchchonne

de7o immees.

5 Iita asa ogen agunththinne

yardey dees;

gido attiin bana naagiza asi

hessafe haakkees.

6 Nayi waanidi de7ana bessizaakko

tamaarsa;

histtiko izi cimmidikka

hessafe haakkenna.

7 Durey manqo haarees;

tal7e ekkidaadey tal7e

immidaades aylle gides.

8 Iitateth zeriza asi waaye cakkees;

iza hanqo guufey dhayana.

9 Kiya asi anjjettees;

ba qumappeka hiyeesas immees.

10 Qilcciza as digga;

histtiko palamay attana;

ooshshinne cashshika dhayana.

11 Wozina geeshshateth dosiza asinne

doonappe lo7o haasayza asara

kawoy laggetees.

12 GODAA ayfeti erateth naagettees;

gido attiin wordanchchata qaala

hada kessees.

13 Azalla asi,

«Gaammoy karen dees;

tana ogen wodhana» gees.

14 Layma maccassa doonay

ciimma olla mala;

GODAY hanqettida asi

izin wullees.

15 Naa wozina eeyateththi

baqqi oykkees;

gido attiin seera shoch

izappe haassees.

16 Baas aqota gujjana giidi

hiyeesa naaqqizaynne

duresi imota immizay

naykka manqana.

17 Aadho eranchcha zore

wozinappe siya;

ne wozinaykka

ta timirtekko simmo!

18 Ays giikko

istta ne wozinan woththiko,

ne doonanka

istta ubbaa haasaykko

ne ufayettana.

19 Ne ammanoy

GODAAN gidana mala

tani nena hach tamaarsays.

20 Tani neessi zorenne

erateth immiza

lo7o timirteta xaafabeekkinaa?

21 Nena kiittidayssas bessiza

zaaro zaarana mala,

tani nena tumanne

ammanettida qaalata

tamaarsana mala gidennee?

22 Hiyeesatasi aykkoyka baynda

gishshas istta bonqofa;

shilotankka metotanchchata

waayisoppa.

23 Ays giikko GODAY

istta gishshas mootettana;

istta bonqqidaytakka

izi bonqqana.

24 Hanqettiza asara laggetoppa;

hanqettanaas eesotiza

asarakka zuppetoppa.

25 Neni iza hanoza meezetikko,

guyeppe agganawu dandayakka.

26 Waase gelanaas caaqqofa;

asa aco qanxxanaas

waase geloppa.

27 Neessi qanxxizaazi dhaykko,

ne ichchiza algayka

attontta ekettana.

28 Ne aawati essida

beniisofe diza zawaa shoddofa.

29 Ba ooson loohida as beyadii?

Izi kawotas ooththeesippe attiin

bessontta asatas ooththenna.