1 Yuhuda Kawo Hizqiyaasa asati duuqqidi xaafida Solomoone leemisoti hayssafe kaallizayta.

2 Xuura genththoy Xoossas bonchcho;

xuura pilggidi kesoy

kawotas bonchcho.

3 Salota dhoqqateththanne

sa7a ciimmateththa

asi gakkonttayssa mala,

kawota qofaakka asi pilggi

eranaas dandayenna.

4 Birappe qita diggaycha;

wogaceykka qoxxidi

lo7o miish kessana.

5 Kawo sinththafe iitata diggaycha;

histtiko iza kawoteththa araatay

xilloteththan minni eqqana.

6 Kawo sinththan nena

dhoqqu dhoqqu histtofa;

gita asata giddon

beettanaas amottofa.

7 Gita asa sinththan

nena kawushshanaappe

izi barkka nena,

«Haysso dhoqqu ga»

giikko nees lo7o.✝

8 Ne ayfezan be7ida ubbaa

markkattanaas dubbusha

baanaas eesotoppa;

ays giikko

neni markkatta simmiin,

hara asi ne markkateththay

bala gididayssa qonccisikko

neni yeellatana.

9 Neessinne ne laggezas giddon

palamay medhettiko,

he palama garsan

hara asa xuura qonccisoppa.

10 Histtontta aggiko

neni yootizayssa siyida asi

nena kawushshana;

hessan ne sunththay

nam7anththo simmidi

lo7ontta mala moorettana.

11 Koshshiza wodezan

haasayettida likke

qaalay bira bolla tigettida

worqqa alleqo mala.

12 Aadho erateththi diza asi

zoriza zorey ezgiza asas

hayththan aaththiza worqqa mala;

woykko muuruta worqqafe

oosettida alleqo mala.

13 Kath shiishshiza wode irxxa haaththi

uyiin aliza mala;

ammanettiza kiitanchchay

bana kiittizayta ufayssees.

14 Immonttayssa, «Immana» giidi

coo paapottiza asi

iray baynda shaaranne carko mala.

15 Dandayanchcha asi

dere haarizaade

yooti mayzees;

liiqo qaalay

meqeth kanththi gelees.

16 Ees demmiko ginara ma;

gido attiin darssiko

nena xuuggana.

17 Nena uufidi ixxontta mala

ne lagge soo ubbato booppa.

18 Ba laggeza bolla wordora

markkattiza asi koxey,

giththa mashshaynne wondafey

as qohiza mala qohees.

19 Metto wode ammanettontta

asan zemppoy,

qaaxxiza achchan

coommiza malanne

silida tohon hemettiza mala.

20 Ceeci uttida asas mazamure yexeththi

meego gallas

may7o qaariza malanne

madunththa bolla xuuggiza miish

tigiza mala.

21 Ne morkkey gafikko miza;

saamettiko ushsha.

22 Neni hessaththo ooththiko

iza hu7en tama bonqo kaashidi

qolizaade mala.

GODAYKKA ne oosos

waaga immana.✝

23 Arshey mokkiza bagga carkoy

ira ehiza mala,

zigirsi hanqo ehees.

24 Duunama machchira

issi keeththan de7anaappe

keeththa daaranchchan

deeththi lo7o.

25 Daaburda asi irxxa haath

uyidi aliza mala

haakko biittafe yiza

lo7o qaalay ufayssees.

26 Iita asa sinththan

kundiza xillo asi

bulqottida pulttonne

moorettida olla haaththa mala.

27 Daro eessa muusi lo7o gidenna;

hessaththoka baas bonchcho

koshshi bonchchisenna.

28 Bana haarontta asi

gimbey laalettida katama mala.