1 Kawo wozinay

GODAA kushen dees;

izi iza wozinaa

goggiza haaththa mala

ba dosidaso zaarees.

2 Asi biza ogey izaades

suure misatees;

GODAY gidikko

wozinaa pilggi xeellees.

3 Yarshofe bollara xillonne

suure pirda GODAY dosees.

4 Otoroynne hallacay

iita asata bessiza malata;

hessika nagara.

5 Mino oosanchcha

halchchoy duresees;

gido attiin bichcharisi manqisees.

6 Wordotidi dagasida aqotay

dhayza pentta mala;

qasseka wodhiza woximade mala.

7 Iitati suure ooso dosontta gishshas

iitata istta makkallateththi

dhayssana.

8 Mooranchchati

geella ogera hemetteettes;

gido attiin geeshshati

suure haneettes.

9 Duunama machchira daanaappe

keeththa daaranchchan

aqoy lo7o.

10 Iitati iita miish ooththanaas

keehi amotteettes.

Iza laggey izappe

qadheta demmenna.

11 Qilccizaadey qaxxayettida wode

wozinay paccida asi

aadho erateth tamaarees;

wozinama asikka tamaardi

erateth demmees.

12 Xillo Xoossay iitatason

oosettiza ubbaa caddi xeellees;

istta mulera dhayssees.

13 Manqo waaso siyanaappe giidi

ba hayth tucciko

izikka waassiza wode

alliza asi dhayana.

14 Geeman immiza imotay

hanqo doshisees;

afala giddora immida matta7ey

suule hanqo irxxisees.

15 Suure pirday xillota ufayssees;

iita ooththizayta gidikko

shirosees.

16 Akeeka ogeppe kare keziza asi

moytille duulatan shemppees.

17 Hallaca duus daana

koyza asi manqees;

ushshinne muus

gooddiza asi durettenna.

18 Xillota bolla yida metoy

iitata bolla simmana;

suure asata bolla yida metoy

ammanettonttayta bolla gakkana.

19 Wocamizanne doonatiza

machchira daanaappe

bazzon duussi kiya.

20 Wozinama asa soon

mal7o qumaynne

zaytey dagatti dees;

gido attiin eeya asi

baas dizayssa, bayndaa

ubbaa dippi histti mees.

21 Xilloteththinne siiqo

kaallizaadey de7o,

dureteththinne

bonchcho demmees.

22 Wozinama asi

wolqqama olanchchati diza

katama menththi gelees;

istti ammanettida miixatakka

laalli yeggees.

23 Ba doonanne ba inxars naagiza asi

bana boshappe naagees.

24 Otoranchchaynne hallaca asi

qidhanchcha geetettees;

izi otoro hano hanees.

25 Azalla amoy wodhees;

ays giikko

izi ooththanaas koyenna.

26 Azallay gallas kumeth

amottishe pe7ees;

xilloy gidikko uuzettontta immees.

27 Iita asa yarshoy harassees;

iita qofan shiishshizaa gidikko

ay mala iita gidanee?

28 Wordo markkay dhayana;

gido attiin tumu markkattizay

minnidi de7ana.

29 Iita asi bessonttaz xala xalees;

gido attiin suure asi

yuushshi qoppees.

30 Asi ba eran, akeekaninne

halchchon GODAARA

eqettanaas dandayenna.

31 Ola gallassas para giigssees;

gido attiin xoonoy GODAAPPE yees.