उत्पत्ति 10

नूह का बेटा कि वंशावली

1 नूह को बेटा शेम, हाम अरु येपेत था; ओका बेटा जल प्रलय का बाद पैदा हुया; उनको कुल यो हइ.

2 येपेत को बेटा:गोमेर, मागोग, मादै, यावान, तूबल, मेशेक अरु तीरास हुये. 3 अरु गोमेर का बेटा: अशकनज, रीपत अरु तोगर्म हुया. 4 अरु यावान का कुल मे एलीशा अरु तर्शीश, अरु कित्ती, अरु दोदानी इन्सान हुया. 5 इनका कुल गैरयहुदिहोन का द्वीपहोन का देशहोन मे से बठी गया कि वे अलग अलग भाषाहोन, कुलहोन, अरु जातहोन का अनुसार अलग अलग हुय गया.

6 फिर हाम का बेटा : कूश, मिस्र, पूत अरु कनान हुया. 7 अरु कूश का बेटा सबा, हवीला, सबता, रामाह, अरु सबुतका हुया. अरु रामाह का बेटा शेबा अरु ददान हुया. 8 कूश का कुल मे निम्रोद भी हुयो; पृथ्वी पर पयलो शक्तिशाली विजेता उय हुयो हइ. 9 उय परमेश्वर का नजर मे पराक्रमी शिकार खेलनआलो ठैइर्यो, येकासे या बोल्यो वत चली हइ; "निम्रोद का सामने परमेश्वर का नजर मे पराक्रमी शिकार खेलनआलो." 10 ओका राज्य कि सुरवात शिनार देश मे बेबिलोन, एरेख, अक्कल, अरु कलने से हुयो. 11 उ देश से उ वु नीकली खे अश्शूर खे गयो, अरु नीनवे, रहोबोतीर अरु कालह, 12 अरु नीनवे अरु कालह का बीच जो रेसेन हइ, ओने भी बसायो; बडो नगर योही हइ. 13 मिस्र का कुल मे लूदी, अनामी, लहाबी, नप्तूही, 14 अरु पत्रुसी, कसलूही अरु कप्तोरी इन्सान हुये, कसलूहिहोन मे से ते पलिश्ति इन्सान निकल्या. 15 कनान का कुल मे ओको बडो बेटो सीदोन, तब हित्ती, 16 यबूसी, एमोरी, गिर्गाशी, 17 हिव्वी, अर्की, सीनी, 18 अर्वदी, समारी, अरु हमाती इन्सान भी हुया; फिर कनानिहोन का कुल भी फैली गया. 19 अरु कनानिहोन का सीमा सीदोन से लि खे गरार का रस्ता से हुय खे गाजा तक अरु फिर सदोम अरु गमोरा अरु अदमा अरु सबोयीम का रस्ता से हुय खे लाशा तक हुयो. 20 हाम का कुल मे ये ही हुया; अरु ये अलग अलग कुलहोन, भाषाहोन, देशहोन, अरु जातहोन का अनुसार अलग अलग हुय गया.

शेम को कुल

21 फिर शेम, जो सब एबेर वंशिहोन को मूल इन्सान हुयो, अरु जो येपेत को बडो भैइ थो, ओका भी बेटो पैदा हुयो. 22 शेम को बेटो; एलाम, अश्शूर, अर्पक्षद, लूद अरु अराम हुया. 23 अराम का बेटा: उस, हूल, गेतेर अरु मश हुया. 24 अरु अर्पक्षद ने शेलह खे, अरु शेलह ने एबेर खे जन्म दियो. 25 अरु एबेर खे बेटा हुया, एक को नाम पेलेग यो कारण रख्यो गयो कि ओका दिन मे पृथ्वी बठी गय, अरु ओका भैइ को नाम योक्तान थो. 26 अरु योक्तान ने अल्मोदाद, शेलेप, हसर्मावेत, येरह, 27 हदोराम, उजाल, दिक्ला, 28 ओबाल, अबीमाएल, शेबा, 29 ओपीर, हवीला, अरु योबाब खे जन्म दियो : यो ही सब योक्तान को खे बेटा हुया. 30 इन खे र्‍हेन की जगा मेशा से लि खे सपारा, जो पूर्व मे एक पहाडी प्रदेश हइ, ओका रस्ता तक हुया. 31 शेम का बेटा ये ही हुया; अरु ये अलग अलग कुलहोन, भाषाहोन, देशहोन अरु जातहोन, का अनुसार अलग अलग हुय गया. 32 नूह का बेटाहोन का घराना ये ही हइ; अरु उनकी जातहोन का अनुसार उनकी कुलहोन ये ही हइ; अरु जल प्रलय का बाद पृथ्वी भर की जातिहोन इन्ही मे से हुय खे बठी गयं.