1 जब आदम अपनी लुगय हवा का पास गयो तब ओने पेटसे हुय खे कैन खे जन्म दियो अरु बोल्यो, मेने परमेश्वर का मदत से एक बेटा खे जन्म दियो हइ. 2 फिर उ ओको भैइ जन्म्यो, हाबिल तो मेडाहोन को चरान आलो बनी गयो, पर कैन जमीन कि खेत करन आलो कि किरसान बन्यो. 3 कुछ दिन का बाद कैन परमेश्वर का पास जमीन को उग्यो मे से कुछ भेट लि आयो. 4 अरु हाबिल भी अपनी मेडाहोन को कुछ एक पयलो जन्म्यो बच्चो भेट चडान लि आयो अरु उनकी चर्बी भेट चडैइ; तब परमेश्वर ने हाबिल अरु ओकी भेट खे अपनायो.* 5 पर कैन अरु उनकी भेट खे ओने अपनायो नी तब कैन भोत घुस्सा हुयो, अरु ओका मुंडा पर उदासी छै गय. 6 तब परमेश्वर ने कैन से बोल्यो, "तू क्यु घुस्सा हुयो? अरु तरो मुंडा पर उदासी क्यु छै गय हइ? 7 अगर तू भलो कर्ये, ते का तरी भेट कबुल नी की जाये? अरु अगर तू भलो नी कर्ये, ते पाप द्वार पर लुक्यो र्‍हेस हइ, अरु ओकी लालुच तरा तरफ हुये, अरु तो खे ओ खे हकालनो पड्ये." 8 तब कैन ने अपना भैइ हाबिल से कुछ बोल्यो; अरु जब वे मैदान मे थो, तब कैन ने अपना भैइ हाबिल पर चडी खे ओको खुन करी दियो.* 9 तब परमेश्वर ने कैन से पुच्छो, "तरो भैइ हाबिल कहा हइ?" ओने बोल्यो, "मालुम नी; का मी अपना भैइ को रखवालो हइ?" 10 ओने बोल्यो, "तोने का कर्यो हइ? तरा भैइ को खुन जमीन मे से मरा तरफ चिल्लैइ खे मरो दुहाइ दि र्हो हइ.* 11 येकालिये अब जमीन जेने तरा भैइ को खुन तरा हाथ से पीना का लिये अपना मुंडो खोल्यो हइ, ओका तरफ से तू श्रापित हइ. 12 चाहे तू जमीन पर खेती कर, ते भी ओकी पूरी उग्यो फिर तो खे नी मिल्ये, अरु तू धरती पर भटकन आलो अरु भगोडो हुये." 13 तब कैन ने परमेश्वर से बोल्यो, "मरी सजा असहनीय हइ. 14 देख तोने आज का दिन मे खे जमीन पर से निकल्यो हइ अरु मि तरी नजर का आड मे र्हियु अरु धरती पर भटकन आलो अरु भगोडो र्हियु; अरु जो कोय मे खे मरी हत्या कर्ये," 15 यो कारण परमेश्वर ने ओकासे बोल्यो, "जो कोय कैन को खुन कर्ये ओकासे साथ गुणा बदलो लियो जाये," अरु परमेश्वर ने कैन का लिये एक चिन्ह ठैरायो असो नी हो कि कोय ओ खे पैइ खे मारी डाल्ये.

16 तब कैन परमेश्वर का सामने से निकली गयो अरु नोद* नामको देश मे, जो अदन का पूर्व का तरफ हइ, र्‍हेन लग्यो. 17 जब कैन अपनी लुगय का पास गयो तब वा पेट से हुय अरु हनोक खे जन्म दियो; फिर कैन ने एक नगर बसायो अरु उ नगर को नाम अपना बेटा का नाम पर हनोक रख्यो. 18 हनोक से इराद पैदा हुयो, अरु इराद से महूयाएल से पैदा हुयो अरु मतूशाएल पैदा हुयो अरु मतुशाएल से लेमेक पैदा हुयो. 19 लेमेक ने दो बइहोन भ्याव कर्यो जेमे से एक को नाम आदा अरु दूसरी को सिल्ला हइ. 20 आदा ने याबाल खे जन्म दियो, उ उन इन्सानहोन को बाप थो जो झोपडीहोन मे र्हेतो थो अरु जनवरहोन को पालन करी खे जीवन जीया करतो थो. 21 ओका भैइ को नाम यूबाल थो; उ उन इन्सान होन बाप थो जो वीणा अरु बासुरी बजातो थो. 22 अरु सिल्ला ने भी तूबल कैन नामको एक बेटा खे जन्म दियो; उ पीतल अरु लोहा को सब धार आलो हथियार होन खे बनान आलो हुयो अरु तूबल कैन की भैइन नामाह थी. 23 लेमेक ने अपनी लुगय होन से बोल्यो, "हे आदा अरु हे सिल्ला मरी सुन : हे लेमेक कि लुगय होन, मरी बात पर कान लगानु; मेने एक अदमी खे जो मे खे चोट लगातो थो, अर्थात एक जवान खे जो मे खे घायल करतो थो मारी डाल्यो हइ. 24 जब कैन को बदलो सात गुना लियो जाये ते लेमेक को सतहत्तर गुणा लियो जाये.*"

25 अरु आदम अपनी लुगय का पास फिर गयो; अरु ओने एक बेटा खे जन्म दियो अरु ओको नाम यो बोली खे शेत रख्यो कि "परमेश्वर ने मरा लिये हाबिल खे बदल्यो, जे खे कैन ने मार्यो थो, एक अरु कुल प्रदान कर्यो." 26 अरु शेत खे भी एक बेटो पैदा हुयो अरु ओने ओखो नाम एनोश रख्यो उय टेम्म से इन्सान प्रभु का नाम से आराधणा करन लग्यो.